Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Posible nga Agbalin a Naragsak ti Pamiliam

 PASET 9

Dayawenyo ni Jehova kas Pamilia

Dayawenyo ni Jehova kas Pamilia

“Agdaydayawkayo iti daydiay nangaramid iti langit ken iti daga.”—Apocalipsis 14:7

Kas naadalmon iti daytoy a broshur, adda dagiti prinsipio ti Biblia a makatulong kenka ken iti pamiliam. Kayat ni Jehova a naragsakka. Inkarina a no ipangpangrunam ti panagdayaw kenkuana ‘amin a sabsabali pay a bambanag mainayonto kenka.’ (Mateo 6:33) Talaga a kayat ti Dios nga agbalinka a gayyemna. Ikagumaam ti maaddaan iti nasinged a relasion kenkuana. Daytoy ti kapatgan a pribilehio a magun-odan ti tao.—Mateo 22:37, 38.

 1 PABILGEM TI RELASIONMO KEN JEHOVA

TI KUNA TI BIBLIA: “‘Agbalinakto nga ama kadakayo, ket dakayonto ti annak a lallaki ken babbai kaniak,’ kuna ni Jehova.” (2 Corinto 6:18) Kayat ti Dios nga agbalinka a nasinged a gayyemna, posible dayta no agkararagka kenkuana. Aw-awisennaka ni Jehova nga ‘agkararag a di agressat.’ (1 Tesalonica 5:17) Magagaran a dumngeg iti pampanunotem ken pakaseknam. (Filipos 4:6) No agkararagkayo a sangapamiliaan, mariknada a pudpudno ti Dios kenka.

No makisarsaritaka iti Dios, masapul met a dumngegka kenkuana. Maaramidam dayta no adalem ti Saona ken dagiti naibasar iti Biblia a publikasion. (Salmo 1:1, 2) Mennamennaem ti naadalmo. (Salmo 77:11, 12) Dumdumngegka met iti Dios no regular a tumabunoka kadagiti Nakristianuan a gimong.—Salmo 122:1-4.

Bumileg met ti relasionmo ken Jehova no isarsaritam ti maipapan kenkuana. Ad-adda a sumingedka kenkuana no aramidem dayta a kanayon.—Mateo 28:19, 20.

NO ANIA TI MAARAMIDAM:

  • Inaldaw nga iwayaam ti agkararag ken agbasa iti Biblia

  • Kas pamilia, ipangpangrunayo dagiti naespirituan nga aktibidad saan ket a ti panaglinglingay

2 PAGBALINEM A NARAGSAK TI PANAGDAYDAYAW TI PAMILIAYO

TI KUNA TI BIBLIA: “Umadanikayo iti Dios, ket isu umadaninto kadakayo.” (Santiago 4:8) Masapul nga adda regular nga eskediulyo nga agdayaw kas pamilia. (Genesis 18:19) Ngem saan la a dayta ti kasapulan. Masapul a pagbalinem ti Dios a paset ti inaldaw a panagbiagmo. Mapasingedyo a sangapamiliaan ti relasionyo iti Dios no pagsasaritaanyo ti maipapan kenkuana ‘no agtugawkayo iti balayyo ken no magnakayo iti dalan ken no agiddakayo ken no bumangonkayo.’ (Deuteronomio 6:6, 7) Tuladenyo ti determinasion ni Josue a nagkuna: “No maipapan kaniak ken iti sangakabbalayak, agserbikamto ken Jehova.”—Josue 24:15.

NO ANIA TI MAARAMIDAM:

  • Adda koma regular a panagsanay ti pamiliayo nga ikabilangan ti kasapulan ti tunggal maysa

Ammuem ti Ad-adu Pay

Ania ti Panagdaydayaw ti Pamilia?

Ammuem no kasano a makatulong daytoy tapno sumingedka iti Dios ken tumibker ti relasionyo kas pamilia.

Pabilgenyo ti Espiritualidadyo kas Agassawa

Sumayaat ti relasionda nga agassawa no mangiwayada iti tiempo nga agkadua nga agadal iti Biblia.

No Kasano nga Agbalin a Naragsak ti Biag ti Pamiliayo

Ti ayat nga impakita ni Jesus ket nasayaat a tuladen dagiti assawa a lallaki, assawa a babbai, nagannak, ken annak. Ania ti masursurotayo kenkuana?