Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Posible nga Agbalin a Naragsak ti Pamiliam

 PASET 7

No Kasanoyo nga Isuro ti Anakyo

No Kasanoyo nga Isuro ti Anakyo

“Dagitoy a sasao nga ibilbilinko kenka ita nga aldaw addadanto ita pusom; ket masapul nga iyukuokmo ida iti anakmo.”—Deuteronomio 6:6, 7

Idi inaramid ni Jehova ti urnos ti pamilia, imparebbengna kadagiti nagannak ti panangaywan kadagiti annakda. (Colosas 3:20) Responsabilidadyo a nagannak a sanayen dagiti annakyo a mangayat ken Jehova ken agbalin a responsable nga adulto. (2 Timoteo 1:5; 3:15) Ammuenyo met no ania ti linaon ti pusoda. Siempre, nagpateg ti ulidanyo a nagannak. Maisuroyo a naimbag ti anakyo no dakayo a mismo ti mangipapuso iti Sao ni Jehova.—Salmo 40:8.

 1 NALAKANAKAYO KOMA A KASARITA TI ANAKYO

TI KUNA TI BIBLIA: “Nasiglat no iti panagdengngeg, nainayad no iti panagsao.” (Santiago 1:19) Marikna koma dagiti annakyo a nalakadakayo laeng a kasarita. Nakasaganakayo koma a dumngeg no makisaritada kadakayo. Nalakada laeng a maibaga ti riknada no nasayaat ti relasionyo kadakuada. (Santiago 3:18) No ammoda a naungetkayo ken manangkritikar, saanda nga ibaga ti pudno a rikriknada. Anusanyo dagiti annakyo ken kanayon nga ipariknayo nga ipatpategyo ida.—Mateo 3:17; 1 Corinto 8:1.

NO ANIA TI MAARAMIDAM:

  • Adda koma ti panawenyo a dumngeg no makisarita dagiti annakyo

  • Kanayon koma a kasaritayo dagiti annakyo, saan laeng a no adda problemada

2 TARUSAM NO ANIA A TALAGA TI KAYATDA A SAWEN

TI KUNA TI BIBLIA: “Daydiay mangipakita iti pannakatarus iti maysa a banag makasarakto iti naimbag.” (Proverbio 16:20) No dadduma, masapul a tarusam ti ibagbaga dagiti anakmo tapno maammuam ti pudno a riknada. Gagangay nga aglablabes ken saan a pampanunoten dagiti agtutubo ti ibagbagada. “Ti asinoman sumungbat iti maysa a banag sakbay a mangngegna, kinamaag dayta.” (Proverbio 18:13) Dika koma agpungtot a dagus.—Proverbio 19:11.

NO ANIA TI MAARAMIDAM:

  • Aniaman ti ibaga ti anakmo, dika koma bumallaet wenno agpungtot a dagus

  • Lagipem no ania ti riknam idi kasta ti edadmo ken no ania ti napateg idi kenka

 3 IPAKITAYO NGA AGTUNOSKAYO

TI KUNA TI BIBLIA: “Umimdengka, anakko, iti disiplina ni amam, ket saanmo a baybay-an ti linteg ni inam.” (Proverbio 1:8) Inted ni Jehova iti ama ken ina ti autoridad a mangisuro kadagiti annakda. Suruanyo dagiti annakyo nga agraem ken agtulnog kadakayo. (Efeso 6:1-3) Ammo dagiti annak no saan a ‘naan-anay nga agkaykaysa’ dagiti nagannakda. (1 Corinto 1:10) No adda diyo pagkinnaawatan, dikay agsubang iti sanguanan dagiti annakyo ta mapukaw ti panagraemda kadakayo.

NO ANIA TI MAARAMIDAM:

  • Pagsaritaan ken agtunoskayo no kasano a disiplinaen dagiti annakyo

  • Tarusam ti panangmatmat ti asawam no agduma ti kayatyo a panangsanay iti annakyo

 4 AGPLANOKAYO

TI KUNA TI BIBLIA: “Sanayem ti ubing sigun iti dalan nga agpaay kenkuana.” (Proverbio 22:6) Saan a naiparna ti naballigi a panangisuro kadagiti annak. Masapul nga iplanom ti panangisurom, karaman iti dayta ti panangdisiplina kadakuada. (Salmo 127:4; Proverbio 29:17) Ti panangdisiplina ket saan laeng a panangdusa, karaman iti dayta ti panangtulong iti annakmo a mangtarus no apay nga adda dagiti pagannurotan. (Proverbio 28:7) Isurom met ida a mangayat iti Sao ni Jehova ken mangtarus kadagiti prinsipiona. (Salmo 1:2) Daytoy ti tumulong kadakuada a maaddaan iti konsiensia a makailasin iti naimbag ken dakes.—Hebreo 5:14.

NO ANIA TI MAARAMIDAM:

  • Siguraduem a maawatan dagiti annakmo a ti Dios ket pudno a Persona a mapagtalkanda

  • Tulongam ida a mangilasin ken mangliklik kadagiti mamagpeggad kadakuada iti moral, kas iti makitada iti Internet ken social network. Isurom ida a mangliklik kadagiti seksual a mananggundaway

“Sanayem ti ubing sigun iti dalan nga agpaay kenkuana”

Ammuem ti Ad-adu Pay

Aktibidad Para Kadagiti Ubbing

Agbirokka kadagiti makaparagsak nga aktibidad a tumulong iti annakmo a makasursuro kadagiti napateg a leksion iti Biblia.

Kasanom a Disiplinaen Dagiti Annakmo?

Deskribiren ti Biblia ti 3 a kangrunaan a pamay-an ti epektibo a disiplina.

Kasano nga Isuro Dagiti Nagannak ti Annakda Maipapan iti Sekso?

Naglaon ti Biblia kadagiti makagunggona a prinsipio a makatulong kenka a mangisuro kadagiti annakmo maipapan sekso ken mangsalaknib kadakuada kadagiti mananggundaway.

Agsolsolo a Nagannak: Mangikeddengka Kadagiti Nasayaat a Moral a Prinsipio

Kasano a makatulong kenka dagiti prinsipio ti Biblia tapno maisurom dagiti nasayaat a prinsipio kadagiti annakmo?