Mapan iti linaonna

Mapan iti listaan dagiti linaonna

 LEKSION 14

Apay nga Adda Organisasion ti Dios?

Apay nga Adda Organisasion ti Dios?

1. Apay nga inorganisar ti Dios ti nagkauna nga Israel?

Inorganisar ti Dios dagiti kaputotan ti patriarka a ni Abraham kas maysa a nasion ken inikkanna ida kadagiti linteg. Inawaganna dayta a nasion iti “Israel” ken isu ti nangitalkanna iti pudno a panagdaydayaw ken iti saona. (Salmo 147:19, 20) Iti kasta, magunggonaan dagiti tattao iti amin a nasion babaen ti Israel.​—Basaen ti Genesis 22:18.

Dagiti Israelita ti pinili ti Dios nga agbalin a saksina. Ipakita ti pakasaritaanda no kasano a magunggonaan dagiti tattao no agtulnogda kadagiti linteg ti Dios. (Deuteronomio 4:6) Gapuna, maam-ammo ti sabsabali ti pudno a Dios babaen kadagiti Israelita.​—Basaen ti Isaias 43:10, 12.

2. Apay a naorganisar dagiti pudno a Kristiano?

Napukaw ti Israel ti anamong ti Dios idi agangay ket ti kongregasion Kristiano ti insukat ni Jehova iti dayta a nasion. (Mateo 21:43; 23:37, 38) Kas kasukat dagiti Israelita, dagiti pudno a Kristiano ti mangsaksaksi ita ken Jehova.​—Basaen ti Aramid 15:14, 17.

Inorganisar ni Jesus dagiti pasurotna tapno mangasaba ken agaramidda kadagiti adalan iti amin a nasion. (Mateo 10:7, 11; 24:14; 28:19, 20) Dandanin malpas daytoy a trabaho, bayat daytoy maudi nga al-aldaw ti agdama a sistema ti bambanag. Iti umuna a gundaway iti pakasaritaan ti tao, minilion itan a tattao iti amin a nasion ti pinagkaykaysa ni Jehova iti pudno a panagdaydayaw. (Apocalipsis 7:9, 10) Naorganisar dagiti pudno a Kristiano tapno agpipinnaregta ken agtitinnulongda. Iti intero a lubong, tagtagiragsakenda kadagiti gimongda ti agpapada a programa ti pannakaisuro a naibatay iti Biblia.​—Basaen ti Hebreo 10:24, 25.

 3. Kasano a nangrugi ti organisasion dagiti Saksi ni Jehova iti moderno a panawen?

Idi 1870’s, adda bassit a grupo dagiti estudiante ti Biblia a nangrugi a mangbirok kadagiti nabayagen a napukaw a kinapudno iti Biblia. Naammuanda nga inorganisar idi ni Jesus ti kongregasion Kristiano tapno mangasaba. Gapuna, inrugida ti kampania a panangikasaba iti Pagarian iti intero a lubong. Idi 1931, inawatda ti nagan a Saksi ni Jehova.​—Basaen ti Aramid 1:8; 2:1, 4; 5:42.

4. Kasano ti pannakaorganisar dagiti Saksi ni Jehova?

Idi umuna a siglo, dagiti kongregasion Kristiano iti adu a pagilian ket nagunggonaan iti panangiwanwan ti maysa a bagi a manarawidwid a mangbigbigbig ken Jesus kas Ulo ti kongregasion. (Aramid 16:4, 5) Mabembenepisiaran met ita dagiti Saksi ni Jehova iti intero a lubong iti panangiwanwan ti Bagi a Manarawidwid a buklen dagiti panglakayen nga aduan iti kapadasan. Daytoy ti mangiwanwanwan kadagiti sanga nga opisina dagiti Saksi ni Jehova nga agipatpatarus, agim-imprenta, ken agiwarwaras kadagiti publikasion a maus-usar iti panagadal iti Biblia iti nasurok a 800 a lengguahe. Gapuna, ipapaay ti Bagi a Manarawidwid dagiti Nainkasuratan a pammaregta ken panangiwanwan iti nasurok a 120,000 a kongregasion iti intero a lubong. Iti tunggal kongregasion, adda dagiti kualipikado a lallaki nga agserserbi kas panglakayen wenno manangaywan. Siaayat nga ay-aywananda ti arban ti Dios.​—Basaen ti 1 Pedro 5:2, 3.

Naorganisar dagiti Saksi ni Jehova tapno ikasabada ti naimbag a damag ken agaramidda kadagiti adalan. Kas kadagiti apostol, mangaskasabakami iti binalaybalay. (Aramid 20:20) Ituktukonmi met ti panagadal iti Biblia kadagiti napasnek a mangay-ayat iti kinapudno. Ngem dagiti Saksi ni Jehova ket saan laeng a basta maysa nga organisasion. Maysakami a pamilia nga addaan iti naayat nga Ama. Maseknankami iti maysa ken maysa kas agkakabsat. (2 Tesalonica 1:3) Yantangay naorganisar ti ili ni Jehova a mangaramid iti pagayatan ti Dios ken tumulong iti sabsabali, isuda ti kararagsakan a pamilia ditoy daga.​—Basaen ti Salmo 33:12; Aramid 20:35.