Mapan iti linaonna

Mapan iti listaan dagiti linaonna

 LEKSION 15

Apay a Masapul nga Agtultuloyka?

Apay a Masapul nga Agtultuloyka?

1. Kasanoka a magunggonaan no agtultuloyka nga agadal iti Biblia?

Awan duadua a napabileg ti panagayatmo ken Jehova iti panangusigmo iti daytoy a sumario dagiti kangrunaan a sursuro ti Biblia. Masapul nga agtultuloy a paunegem dayta nga ayat. (1 Pedro 2:2) Agpannuray ti namnamam a biag nga agnanayon iti panangitultuloymo nga umasideg iti Dios babaen ti panangadal iti Saona.​—Basaen ti Juan 17:3; Judas 21.

Bayat nga umad-adu ti pannakaammom iti Dios, bumilbileg met ti pammatim. Ti pammati ti tumulong kenka tapno maay-ayom ti Dios. (Hebreo 11:1, 6) Dayta ti mangtignay kenka nga agbabawi ken mangaramid kadagiti makagunggona a panagbalbaliw iti biagmo.​—Basaen ti Aramid 3:19.

2. Kasano a magunggonaan ti sabsabali iti pannakaammom maipapan iti Dios?

Mabalinmo ti maaddaan iti naisangsangayan a relasion ken Jehova

Gagangay laeng a kayatmo nga ipakaammo iti sabsabali dagiti naadalmo​—maragsakantayo amin a mangipakaammo iti naimbag a damag. Bayat nga itultuloymo nga adalen ti Biblia, masursurom nga usaren dayta a mangilawlawag iti pammatim ken Jehova ken iti naimbag a damag.​—Basaen ti Roma 10:13-15.

Gagangay a dagiti gagayyem ken kakabagiantayo ti umuna a pangipakaammuantayo iti naimbag a damag. Nataktikaka koma. Imbes nga ibagam nga ulbod ti relihionda, iranudmo ti maipapan kadagiti kari ti Dios. Laglagipem met a masansan nga ad-adda a maallukoy dagiti tattao iti naimbag a kababalinmo imbes nga iti ibagbagam.​—Basaen ti 2 Timoteo 2:24, 25.

3. Ania a relasion iti Dios ti matagiragsakmo?

Ti panagadal iti Sao ti Dios tulongannaka a rumang-ay iti naespirituan. Inton agangay, mabalin a maaddaanka iti naisangsangayan  unay a relasion ken Jehova. Kinapudnona, agbalinka a kukuana kas paset ti pamiliana.​—Basaen ti 2 Corinto 6:18.

4. Kasano a maitultuloymo ti rumang-ay?

Rumang-ayka iti naespirituan no itultuloymo nga adalen ti Sao ti Dios. (Hebreo 5:13, 14) Kiddawem iti maysa kadagiti Saksi ni Jehova a tulongannaka a mangadal iti Biblia, nga usarenyo ti libro nga Ania ti Isuro ti Biblia Kadatayo? Bayat nga umad-adu ti pannakaammom iti Sao ti Dios, ad-addanto met a naballigi ti biagmo.​—Basaen ti Salmo 1:1-3; 73:27, 28.

Ni Jehova, a naragsak a Dios, ti naggapuan ti naimbag a damag. Mabalinmo ti suminged kenkuana babaen ti pannakisinningedmo kadagiti agserserbi kenkuana. (Hebreo 10:24, 25) No itultuloymo a pagreggetan a paragsaken ni Jehova, magun-odmo ti pudpudno a biag​—ti biag nga agnanayon. Talaga a ti iyaasideg iti Dios ti kasayaatan a mabalinmo nga aramiden.​—Basaen ti 1 Timoteo 1:11; 6:19.