Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Naimbag a Damag Manipud iti Dios

 Leksion 12

Kasanoka a Makaadani iti Dios?

Kasanoka a Makaadani iti Dios?

1. Denggen kadi ti Dios ti amin a kararag?

Aw-awisen ni Jehova dagiti amin a kita ti tattao nga umadanida kenkuana babaen ti kararag. (Salmo 65:2) Ngem saanna a denggen wenno awaten ti amin a kararag. Kas pagarigan, malapdan ti kararag ti maysa a lalaki a mangmalmaltrato iti asawana. (1 Pedro 3:7) Kasta met, idi intultuloy dagiti Israelita ti agaramid iti dakes, saan a dinengngeg ti Dios dagiti kararagda. Nalawag a maysa a pribilehio ti panagkararag. Nupay kasta, denggen ti Dios ti kararag dagidiay agbabbabawi, uray nadagsen ti basolda.—Basaem ti Isaias 1:15; 55:7.

2. Kasano ti rumbeng a panagkararagtayo?

Ti panagkararag ket paset ti panagdayawtayo, isu a ni laeng Jehova a Namarsua kadatayo ti rumbeng a pagkararagantayo. (Mateo 4:10; 6:9) Kasta met, yantangay imperpektotayo, masapul nga agkararagtayo iti nagan ni Jesus agsipud ta natay maigapu kadagiti basoltayo. (Juan 14:6) Saan a kayat ni Jehova nga ulit-ulitentayo dagiti naikabesa wenno naisurat a kararag. Kayatna a naimpusuan ti kararagtayo.—Basaem ti Mateo 6:7; Filipos 4:6, 7.

Mangngeg ti Namarsua kadatayo uray dagiti naulimek a kararag. (1 Samuel 1:12, 13) Aw-awisennatayo nga agkararag iti amin a gundaway, a kas no rugiantayo dagiti aktibidadtayo iti agsapa ken no agngudo dagiti trabahotayo iti rabii, no mangantayo, ken no adda parikuttayo.—Basaem ti Salmo 55:22; Mateo 15:36.

3. Apay nga agtataripnong dagiti Kristiano?

Saan a nalaka ti umadani iti Dios ta agbibiagtayo iti tengnga dagiti tattao nga awanan pammati iti Dios ken manguy-uyaw  iti karina a talna ditoy daga. (2 Timoteo 3:1, 4; 2 Pedro 3:3, 13) Kasapulantayo ngarud dagiti makapabileg a pannakilangen kadagiti kapammatiantayo, ken kasapulandatayo met.—Basaem ti Hebreo 10:24, 25.

Makatulong ti pannakilangentayo kadagiti tattao a mangay-ayat iti Dios tapno sumingedtayo iti Dios. Dagiti gimong dagiti Saksi ni Jehova mangipaayda kadagiti nasayaat a gundaway tapno magunggonaantayo babaen iti pammati ti sabsabali.—Basaem ti Roma 1:11, 12.

4. Kasanoka a makaadani iti Dios?

Sumingedka ken Jehova no mennamennaem dagiti nasursurom iti Saona. Utobem ti ar-aramid, balbalakad, ken karkarina. Tulongannatayo ti kararag ken panagutob a mangtarus iti kinapateg ti ayat ken sirib ti Dios.—Basaem ti Josue 1:8; Salmo 1:1-3.

Sumingedka laeng iti Dios no agtalekka kenkuana ken no adda pammatim kenkuana. Ngem ti pammati ket kas iti sibibiag a banag a masapul a mataraonan. Nasken nga agtultuloy a taraonam ti pammatim babaen ti panangut-utobmo kadagiti banag a nakaibatayan dagiti patpatiem.—Basaem ti Mateo 4:4; Hebreo 11:1, 6.

5. Kasanoka a magunggonaan iti iyaadanim iti Dios?

Ipatpateg ni Jehova dagidiay mangay-ayat kenkuana. Kabaelanna ida a salakniban iti aniaman a mangdadael iti pammatida ken iti namnamada a biag nga agnanayon. (Salmo 91:1, 2, 7-10) Pakdaarannatayo nga adaywantayo ti wagas ti panagbiag a mamagpeggad iti salun-at ken mangdadael iti kinaragsaktayo. Isursuro kadatayo ni Jehova ti kasayaatan a wagas ti panagbiag.—Basaem ti Salmo 73:27, 28; Santiago 4:4, 8.

 

Ammuem ti Ad-adu Pay

Apay nga Adalem ti Biblia?

Mangipapaay ti Biblia kadagiti sungbat ti agkakapateg a saludsod ti minilion a tattao iti intero a lubong. Kayatmo kadi met ti matulongan?

Umadanika iti Dios Babaen ti Kararag

Denggen kadi ti Dios ti kararagmo? Tapno masungbatan dayta a saludsod, nasken a maawatam no ania ti isursuro ti Biblia maipapan iti kararag.