Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Naimbag a Damag Manipud iti Dios

 Leksion 4

Siasino ni Jesu-Kristo?

Siasino ni Jesu-Kristo?

1. Kasano a nangrugi ti biag ni Jesus?

Ania dagiti galad ni Jesus a namagbalin kenkuana a nalaka a maasitgan?—MATEO 11:29; MARCOS 10:13-16.

Saan a kas iti asinoman a tao, nagnaed ni Jesus idiay langit kas espiritu a persona sakbay a nayanak ditoy daga. (Juan 8:23) Isu ti kaunaan a pinarsua ti Dios ken timmulong iti pannakaparsua ti amin a dadduma pay a bambanag. Mayanatup a maawagan iti “bugbugtong” nga Anak ti Dios ta isu ti kakaisuna a direkta a pinarsua ni Jehova. (Juan 1:14) Nagserbi ni Jesus kas Pannakangiwat ti Dios, isu a naawagan met a “ti Sao.”—Basaem ti Proverbio 8:22, 23, 30; Colosas 1:15, 16.

2. Apay nga immay ni Jesus ditoy daga?

Ti Dios imbaonna ti Anakna ditoy daga babaen ti panangyallatiwna iti nailangitan a biag ni Jesus iti aanakan ti birhen a Judio nga agnagan Maria. Isu nga awan ti tao nga ama ni Jesus. (Lucas 1:30-35) Immay ni Jesus ditoy daga (1) tapno isurona ti kinapudno maipapan iti Dios, (2) tapno iyulidanna kadatayo ti panagaramid iti pagayatan ti Dios uray iti sidong dagiti pakarigatan, ken (3) tapno itedna ti perpekto a biagna kas “subbot.”—Basaem ti Mateo 20:28.

3. Apay a kasapulantayo ti subbot?

Ti subbot ket gatad a maibayad tapno mawayawayaan ti maysa a tao iti pangta ni patay. (Exodo 21:29, 30) Saan a karaman ti ipapatay ken panaglakay iti orihinal a panggep ti Dios agpaay iti sangatauan. Kasanotayo nga ammo? Imbaga ti Dios iti kaunaan a tao a ni Adan nga isu ket matay no aramidenna ti aw-awagan ti Biblia a “basol.” Isu a no saan a nagbasol ni  Adan, saan koma pulos a matay. (Genesis 2:16, 17; 5:5) Sigun iti Biblia, ti ipapatay “simrek” iti sangatauan babaen ken Adan. No kasta, impatawid ni Adan iti amin a kaputotanna ti basol ken ti supapak dayta, ti ipapatay. Kasapulantayo ti subbot tapno mawayawayaantayo iti dusa nga ipapatay a tinawidtayo ken Adan.—Basaem ti Roma 5:12; 6:23.

Siasino ti makaipaay iti subbot a mangwayawaya kadatayo manipud iti ipapatay? No mataytayo, dagiti laeng bukodtayo a basol ti maikarotayo. Awan ti imperpekto a tao a makaikaro iti basbasol ti sabsabali.—Basaem ti Salmo 49:7-9.

4. Apay a natay ni Jesus?

Perpekto ni Jesus, saan a kas kadatayo a managbasol. No kasta, saanna a kasapulan ti matay maipaay kadagiti basolna ta pulos a saan a nagbasol. Imbes ketdi, natay agpaay iti basbasol ti sabsabali. Impakita ti Dios ti naisangsangayan nga ayatna iti sangatauan babaen ti panangibaonna iti Anakna a matay maigapu kadatayo. Impakita met ni Jesus ti ayatna kadatayo babaen ti panagtulnogna ken Amana ken panangtedna iti biagna maipaay kadagiti basoltayo.—Basaem ti Juan 3:16; Roma 5:18, 19.

5. Ania itan ti ar-aramiden ni Jesus?

Idi adda ni Jesus ditoy daga, pinaimbagna dagiti masakit, pinagungarna dagiti natay, ken nangted bang-ar kadagiti agsagsagaba. Impakitana ngarud no anianto ti aramidenna iti masanguanan agpaay iti amin a natulnog a tattao. (Mateo 15:30, 31; Juan 5:28) Kalpasan ti ipapatay ni Jesus, isu ket pinagungar ti Dios kas espiritu a persona. (1 Pedro 3:18) Nagur-uray ni Jesus iti makannawan ti Dios agingga nga inted kenkuana ni Jehova ti pannakabalin nga agturay kas Ari iti intero a daga. (Hebreo 10:12, 13) Ita, agturturayen ni Jesus kas Ari idiay langit, ket ipakpakaammo dagiti pasurotna dayta a naimbag a damag iti intero a lubong.—Basaem ti Daniel 7:13, 14; Mateo 24:14.

Din agbayag, usarenton ni Jesus ti pannakabalinna kas Ari tapno gibusanna ti amin a panagsagaba ken dagidiay mangpatpataud kadagita. Amin a mangipakita iti pammati ken Jesus babaen ti panagtulnogda kenkuana tagiragsakendanto ti biag iti paraiso a daga.—Basaem ti Salmo 37:9-11.

 

Ammuem ti Ad-adu Pay

Ti Subbot—Kapatgan a Sagut ti Dios

Ania ti subbot? Kasanoka a mabenepisiaran iti daytoy?