Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Naimbag a Damag Manipud iti Dios

 Leksion 14

Apay nga Adda Organisasion ti Dios?

Apay nga Adda Organisasion ti Dios?

1. Apay nga inorganisar ti Dios ti nagkauna nga Israel?

Inorganisar ti Dios dagiti kaputotan ti patriarka a ni Abraham kas maysa a nasion ken impaayanna ida iti linlinteg a surotenda. Inawaganna dayta a nasion iti “Israel” ken dayta a nasion ti nangitalkanna iti pudno a panagdayaw ken iti saona. (Salmo 147:19, 20) Iti kasta, magunggonaan dagiti tattao iti amin a nasion babaen iti Israel.—Basaem ti Genesis 22:18.

Dagiti Israelita ti pinili ti Dios nga agbalin a saksina. Ipakita ti pakasaritaanda no kasano a magunggonaan dagiti tattao no agtulnogda kadagiti linteg ti Dios. (Deuteronomio 4:6) Gapuna, maam-ammo ti sabsabali ti pudno a Dios babaen kadagiti Israelita.—Basaem ti Isaias 43:10, 12.

2. Apay a naorganisar dagiti pudno a Kristiano?

Napukaw ti Israel ti anamong ti Dios idi agangay ket ti kongregasion Kristiano ti insukat ni Jehova iti dayta a nasion. (Mateo 21:43; 23:37, 38) Kas kasukat dagiti Israelita, dagiti pudno a Kristiano ti mangsaksi ita ken Jehova.—Basaem ti Aramid 15:14, 17.

Inorganisar ni Jesus dagiti pasurotna tapno mangasaba ken agaramidda kadagiti adalan iti amin a nasion. (Mateo 10:7, 11; 24:14; 28:19, 20) Itan ti katibok daytoy a trabaho, bayat daytoy arinunos ti agdama a sistema ti bambanag. Iti umuna a gundaway iti pakasaritaan ti tao, minilion itan a tattao iti amin a nasion ti pinagkaykaysa ni Jehova iti pudno a panagdayaw. (Apocalipsis 7:9, 10) Naorganisar dagiti pudno a Kristiano tapno agpipinnaregta ken agtitinnulongda. Iti intero a lubong, tagtagiragsakenda kadagiti gimongda ti agpapada a programa ti pannakaisuro a naibatay iti Biblia.—Basaem ti Hebreo 10:24, 25.

 3. Kasano a nangrugi ti organisasion dagiti Saksi ni Jehova iti moderno a panawen?

Idi dekada 1870, adda bassit a grupo dagiti estudiante ti Biblia a nangrugi a mangbirok kadagiti nabayagen a napukaw a kinapudno iti Biblia. Naammuanda nga inorganisar idi ni Jesus ti kongregasion Kristiano tapno mangasaba. Gapuna, inyussuatda ti kampania a panangikasaba iti Pagarian iti intero a lubong. Idi 1931, inawatda ti nagan a Saksi ni Jehova.—Basaem ti Aramid 1:8; 2:1, 4; 5:42.

4. Kasano ti pannakaorganisar dagiti Saksi ni Jehova?

Idi umuna a siglo, dagiti kongregasion Kristiano iti adu a pagilian ket nagunggonaan iti panangiwanwan ti maysa a bagi a manarawidwid a buklen dagiti apostol ken lallakay. Bigbigbigenda ni Jesus kas Ulo ti kongregasion. (Aramid 16:4, 5) Umasping iti dayta, dagiti Saksi ni Jehova iti intero a lubong mabembenepisiaranda ita iti panangiwanwan ti maysa a Bagi a Manarawidwid a buklen dagiti panglakayen nga aduan iti kapadasan. Daytoy ti mangiwanwanwan kadagiti sanga nga opisina dagiti Saksi ni Jehova a mangipatpatarus, mangyim-imprenta, ken mangiwarwaras kadagiti publikasion iti nasuroken nga 600 a lenguahe. Maus-usar dagitoy a publikasion iti panangadal iti Biblia. Iti kasta a pamay-an, ipapaay ti Bagi a Manarawidwid dagiti naibatay-Biblia a pammaregta ken panangiwanwan iti nasuroken a 100,000 a kongregasion iti intero a lubong. Iti tunggal kongregasion, adda dagiti kualipikado a lallaki nga agserserbi kas panglakayen wenno manangaywan. Siaayat nga ay-aywanan dagitoy a lallaki ti arban ti Dios.—Basaem ti 1 Pedro 5:2, 3.

Naorganisar dagiti Saksi ni Jehova tapno ikasabada ti naimbag a damag ken agaramidda kadagiti adalan. Kas kadagiti apostol, mangaskasabakami iti binalaybalay. (Aramid 20:20) Ituktukonmi met ti panagadal iti Biblia kadagiti napasnek nga agsapsapul iti kinapudno. Ngem dagiti Saksi ni Jehova ket saan laeng a basta maysa nga organisasion. Kamengkami iti pamilia nga addaan iti naayat nga Ama. Maseknankami iti maysa ken maysa kas agkakabsat. (2 Tesalonica 1:3) Yantangay naorganisar ti ili ni Jehova a mangaramid iti pagayatan ti Dios ken tumulong iti sabsabali, isuda ti kararagsakan a pamilia ditoy daga.—Basaem ti Salmo 33:12; Aramid 20:35.

 

Ammuem ti Ad-adu Pay

Agtalinaedka iti Ayat ti Dios

Kasanotayo a maipakita ti ayat ken panagyaman iti amin nga inaramid ni Jehova para kadatayo?

Ania a Kita ti Tattao Dagiti Saksi ni Jehova?

Mano ti am-ammom a Saksi ni Jehova? Ania a talaga ti ammom maipapan kadakami?