Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Naimbag a Damag Manipud iti Dios

 Leksion 9

Kasano nga Agbalin a Naragsak ti Pamiliam?

Kasano nga Agbalin a Naragsak ti Pamiliam?

1. Apay a napateg ti kasar iti kinaragsak ti pamilia?

Ni Jehova ti naggapuan ti naimbag a damag. Isu ket naragsak a Dios a kayatna nga agbalin a naragsak dagiti pamilia. (1 Timoteo 1:11) Isu ti namunganay iti panagasawa. Ti legal a panagasawa ket napateg iti kinaragsak ti pamilia ta mangipaay dayta iti natalged a kasasaad a pangpadakkelan kadagiti ubbing. Masapul a raemen dagiti Kristiano dagiti lokal a paglintegan mainaig iti panangirehistro iti kasar.—Basaem ti Lucas 2:1, 4, 5.

Ania ti panangmatmat ti Dios iti panagasawa? Kayatna a dayta ket permanente a panagtipon ti lalaki ken babai. Kayat ni Jehova a dagiti agassawa ket nasungdoda iti maysa ken maysa. (Hebreo 13:4) Kagurana ti diborsio. (Malakias 2:16) Ngem ipalubosna a makidiborsio ken makiasawa manen ti maysa a Kristiano no ti asawana ket nakikamalala.—Basaem ti Mateo 19:3-6, 9.

2. Kasano ti rumbeng a panangtrato iti asawa?

Pinarsua ni Jehova ti lalaki ken babai tapno agtinnulongda kadagiti akemda kas agassawa. (Genesis 2:18) Kas ulo ti pamilia, ti asawa a lalaki ti rumbeng a mangidaulo iti panangipaay iti material a kasapulan ti pamiliana ken iti panangisuro kadakuada maipapan iti Dios. Masapul a managsakripisio ti ayatna ken baketna. Rumbeng nga aginnayat ken agrinnaem dagiti agassawa. Yantangay imperpekto ti amin a pagassawaan, nakapatpateg a sursuruen ti agassawa ti agpinnakawan tapno naragsakda.—Basaem ti Efeso 4:31, 32; 5:22-25, 33; 1 Pedro 3:7.

3. Rumbeng kadi a makisinaka iti asawam no saankayo a naragsak?

No adda saanyo a pagkinnaawatan nga agassawa, ikagumaanyo a tratuen ti maysa ken maysa buyogen ti ayat.  (1 Corinto 13:4, 5) Saan nga irekomenda ti Sao ti Dios ti panagsina kas solusion kadagiti gagangay a parikut ti agassawa.—Basaem ti 1 Corinto 7:10-13.

4. Dakayo nga annak, ania ti kayat ti Dios para kadakayo?

Kayat ni Jehova nga agbalinkayo a naragsak. Ipapaayna kadakayo dagiti kasayaatan a balakad tapno matagiragsakyo ti kinaagtutuboyo. Kayatna a magunggonaankayo iti sirib ken kapadasan dagiti nagannakyo. (Colosas 3:20) Kayat met ni Jehova a mariknayo ti rag-o iti panangaramid kadagiti banag nga agpaay iti Namarsua kadakayo ken agpaay iti Anakna.—Basaem ti Eclesiastes 11:9–12:1; Mateo 19:13-15; 21:15, 16.

5. Dakayo a nagannak, kasanoyo a maparagsak dagiti annakyo?

Masapul nga ikagumaanyo ti agtrabaho tapno maipaayanyo dagiti annakyo iti taraon, pagtaengan, ken kawes. (1 Timoteo 5:8) Ngem tapno agbalin a naragsak dagiti annakyo, masapul met nga isuroyo ida nga ayatenda ti Dios ken agsursuroda kenkuana. (Efeso 6:4) Ti mapagulidanan a panagayatyo iti Dios ket adda dakkel nga epektona iti puso ti anakyo. No naibatay iti Sao ti Dios ti isursuroyo iti anakyo, mabalin a dayta ti mangsukog iti panagpampanunotna maipaay iti pagimbaganna.—Basaem ti Deuteronomio 6:4-7; Proverbio 22:6.

Napateg a paregtaen ken komendaranyo dagiti annakyo. Kasapulan met nga aturen ken disiplinaenyo ida. Dagita a panangsanay ti mangsalaknib kadakuada kadagiti kababalin a mangpukaw iti kinaragsakda. (Proverbio 22:15) Ngem pulos a saan koma a naranggas wenno naulpit ti panangdisiplinayo.—Basaem ti Colosas 3:21.

Mangipabpablaak dagiti Saksi ni Jehova kadagiti libro a nairanta a tumulong kadagiti nagannak ken annak. Dagitoy a libro ket naibasar iti Biblia.—Basaem ti Salmo 19:7, 11.

 

Ammuem ti Ad-adu Pay

POSIBLE NGA AGBALIN A NARAGSAK TI PAMILIAM

Agpatulong iti Dios Tapno Naragsak ti Panagasawayo

Sumayaat ti relasionyo nga agassawa no isaludsodyo dagitoy.

POSIBLE NGA AGBALIN A NARAGSAK TI PAMILIAM

No Kasano a Solbaren Dagiti Problema

Makatulong ti umiso a panangsolbar tapno agbalin a nabileg ken naragsak ti relasionyo nga agassawa wenno agbalin a naliday ken miserable.

ANIA A TALAGA TI ISURSURO TI BIBLIA?

No Kasano nga Agbalin a Naragsak ti Biag ti Pamiliayo

Ti ayat nga impakita ni Jesus ket nasayaat a tuladen dagiti assawa a lallaki, assawa a babbai, nagannak, ken annak. Ania ti masursurotayo kenkuana?