Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Naimbag a Damag Manipud iti Dios

 Leksion 15

Apay a Nasken nga Agtultuloyka?

Apay a Nasken nga Agtultuloyka?

1. Kasanoka a magunggonaan no agtultuloyka nga agadal iti Biblia?

Awan duadua a napabileg ti panagayatmo ken Jehova iti panangusigmo iti daytoy a sumario dagiti kangrunaan a sursuro ti Biblia. Masapul a mataginayon a nasged dayta nga ayat. (1 Pedro 2:2) Agpannuray ti namnamam a biag nga agnanayon iti panangitultuloymo nga umadani iti Dios babaen ti panangadal iti Saona.—Basaem ti Juan 17:3; Judas 21.

Bayat nga umad-adu ti pannakaammom iti Dios, bumilbileg met ti pammatim. Ti pammati ti tumulong kenka tapno maay-ayom ti Dios. (Hebreo 11:1, 6) Dayta ti mangtignay kenka nga agbabawi ken mangaramid kadagiti makagunggona a panagbalbaliw iti biagmo.—Basaem ti Aramid 3:19.

2. Kasano a magunggonaan ti sabsabali iti pannakaammom maipapan iti Dios?

Mabalinmo ti maaddaan iti naisangsangayan a relasion ken Jehova

Gagangay laeng a kayatmo nga ipakaammo iti sabsabali dagiti naadalmo—magagarantayo amin a mangipakaammo iti naimbag a damag. Bayat nga itultuloymo nga adalen ti Biblia, masursurom nga usaren dayta a mangilawlawag iti pammatim ken Jehova ken iti naimbag a damag.—Basaem ti Roma 10:13-15.

Gagangay a dagiti gagayyem ken kakabagiantayo ti umuna a pangipakaammuantayo iti naimbag a damag. Nataktikaka koma. Imbes nga ibagam a palso ti relihionda, iranudmo ti maipapan kadagiti karkari ti Dios. Laglagipem met a masansan nga ad-adda a maallukoy dagiti tattao iti naimbag a kababalinmo imbes nga iti ibagbagam.—Basaem ti 2 Timoteo 2:24, 25.

3. Ania a relasion iti Dios ti matagiragsakmo?

Ti panagadal iti Sao ti Dios tulongannaka a rumang-ay iti naespirituan. Inton agangay, mabalin a maaddaanka iti naisangsangayan unay a relasion ken Jehova. Kinapudnona, agbalinka a kukuana kas paset ti pamiliana.—Basaem ti 2 Corinto 6:18.

 4. Kasano a maitultuloymo ti rumang-ay?

Rumang-ayka iti naespirituan no itultuloymo nga adalen ti Sao ti Dios. (Hebreo 5:13, 14) Kiddawem iti maysa kadagiti Saksi ni Jehova a tulongannaka a mangadal iti Biblia nga usarenyo ti libro nga Ania a Talaga ti Isursuro ti Biblia? Bayat nga umad-adu ti pannakaammom iti Sao ti Dios, ad-addanto met a naballigi ti biagmo.—Basaem ti Salmo 1:1-3; 73:27, 28.

Ti gubuayan ti naimbag a damag ket ni Jehova, ti naragsak a Dios. Mabalinmo ti suminged kenkuana babaen ti pannakisinningedmo kadagiti tattao nga agdaydayaw kenkuana. (Hebreo 10:24, 25) No itultuloymo a pagreggetan a paragsaken ni Jehova, magun-odmo ti pudpudno a biag—ti biag nga agnanayon. Talaga a ti iyaadani iti Dios ti kasayaatan pay laeng a mabalinmo nga aramiden.—Basaem ti 1 Timoteo 1:11; 6:19.

 

Ammuem ti Ad-adu Pay

Ania ti Maar-aramid iti Kingdom Hall?

Kitaem a mismo ti maar-aramid iti uneg ti Kingdom Hall.

Apay nga Adalem ti Biblia?

Mangipapaay ti Biblia kadagiti sungbat ti agkakapateg a saludsod ti minilion a tattao iti intero a lubong. Kayatmo kadi met ti matulongan?

Umadanika iti Dios Babaen ti Kararag

Denggen kadi ti Dios ti kararagmo? Tapno masungbatan dayta a saludsod, nasken a maawatam no ania ti isursuro ti Biblia maipapan iti kararag.