Mapan iti linaonna

Mapan iti listaan dagiti linaonna

 KAPITULO 19

Agbiagto ti “Amin nga Agnanaed iti Pagayusan ti Danum”

Agbiagto ti “Amin nga Agnanaed iti Pagayusan ti Danum”

EZEKIEL 47:9

NAKAISENTRUANNA: Ti pannakatungpal idi, ita, ken iti masanguanan ti sirmata maipapan iti agay-ayus a karayan manipud iti templo

1, 2. Sigun iti Ezekiel 47:1-12, ania ti nakita ken naammuan ni Ezekiel? (Kitaen ti ladawan iti rugi ti kapitulo.)

ADDA pay nakaskasdaaw a nakita ni Ezekiel iti sirmata maipapan iti templo: Agay-ayus ti maysa a karayan manipud iti sagrado a pasdek! Iladawanyo iti panunotyo a sursurotenna ti pagayusan dayta a naglitnaw a danum. (Basaen ti Ezekiel 47:1-12.) Agtedtedted dayta manipud iti pagserkan ti santuario; sa agayus iti makinruar a paraangan ti templo nga asideg iti makindaya a ruangan. Indalan ti anghel a rummuar iti templo, bayat a rukrukodenna ti malabsanda a distansia. Namin-adu a pinalasat ti anghel iti danum. Nadlaw ni Ezekiel a nagbiit nga immadalem, ket idi agangay, nagbalinen a karayan a maballasiwna laeng no bumatok ken aglangoy!

2 Naammuan ni Ezekiel nga agayus ti karayan iti Natay a Baybay ken mangpaimbag iti naapgad ken awan biagna a danum apaman a dumanon iti dayta a baybay, isu nga umadu dagiti ikan. Kadagiti igid ti karayan, makitkitana met ti amin a nagadu a klase ti kayo. Binulan a mangpataudda kadagiti baro ken nasustansia a bunga, ken makaagas dagiti bulongda. Kimmalma la ketdi ti puso ni Ezekiel ken rimmaniag ti namnamana idi nakitana dagita. Ngem  ania ti kaipapanan kenkuana ken kadagiti padana a naipanaw daytoy a detalye ti sirmata maipapan iti templo? Ken ania ti kaipapanan dayta kadatayo ita?

Ania ti Kaipapananna Kadagiti Naipanaw ti Nasirmata a Karayan?

3. Apay a dagiti nagkauna a Judio saanda nga impapan a literal ti karayan iti sirmata ni Ezekiel?

3 Sigurado a saan nga impapan dagiti naipanaw a Judio a literal ti karayan iti sirmata. Imbes ketdi, mabalin nga impalagip kadakuada daytoy a mensahe iti Kasuratan ti sabali pay a padto ti Dios maipapan iti pannakaisubli, daydiay insurat ni propeta Joel nasurok a 200 a tawen a nasaksakbay. (Basaen ti Joel 3:18.) Idi nabasa dagiti naipanaw a Judio ti impaisurat ti Dios ken Joel, saanda nga impapan a literal nga “agtedtedto ti nasam-it nga arak” manipud kadagiti bantay wenno “agayusto ti gatas” manipud iti turod wenno adda rummuar nga ubbog “iti balay ni Jehova.” Saan met a ninamnama dagiti padana a Judio a ti mensahe ni propeta Ezekiel ket maipapan iti literal a karayan. * Ania ngarud a mensahe ti ipakpakaammo ni Jehova? Adda ipakita ti Kasuratan a natibker a pangibatayan iti kaipapanan ti dadduma a paset daytoy a ladawan. Ngem usigentayo ti tallo a nalawag ken naayat a pammasiguro a maammuan iti daytoy a padto.

4. (a) Ania dagiti bendision ni Jehova a ninamnama dagiti Judio gapu iti karayan iti sirmata ni Ezekiel? (b) Apay a ti panangusar ti Biblia iti sasao a “karayan” ken “danum” ket mangipasigurado kadatayo a bendisionan ni Jehova ti ilina? (Kitaen ti kahon a “Dagiti Karayan Dagiti Bendision Manipud ken Jehova.”)

4 Karayan dagiti bendision. Iti Biblia, masansan a mausar ti karayan ken danum a mangiladawan iti panagayus dagiti mangted iti biag a bendision ni Jehova. Nakita ni Ezekiel ti kasta a karayan nga aggapu iti templo isu a manamnama ti ili ti Dios a masagrapda dagiti mangted iti biag a naespirituan a bendision ni Jehova no la ket ta agtalinaedda iti nadalus a panagdaydayaw. Aniada a bendision? Makaawatdanto manen kadagiti naespirituan nga instruksion manipud kadagiti papadi. Ken babaen kadagiti maidaton iti templo, manamnamada manen a mapakawan dagiti basolda. (Ezek. 44:15, 23; 45:17) Gapuna, agbalinda manen a nadalus, a kasla nabugguanda iti nadalus a danum nga aggapu iti templo.

5. Apay a ti karayan iti sirmata ikkatenna ti aniaman a panagdanag no kanayonto met la nga umdas dagiti bendision para iti amin?

5 Kanayon kadi nga addanto umdas a bendision para iti amin? Ti sirmata ikkatenna ti kasta a panagdanag ta impakitana ti milagro a panagsaknap ti danum​—ti agtedtedted a danum ket nagbalinen a karayan iti distansia a nasurok a maysa a kilometro! (Ezek. 47:3-5) Mabalin a dumakkel ti populasion dagiti Judio a makasubli iti dagada; ngem agsaknap ti bendision ni Jehova a mangipaay iti kasapulanda. Ti karayan ti mangiladawan iti kinawadwad ken kinaadu!

6. (a) Ania a kari ti ipasigurado ti nailadawan a padto? (b) Ania met ti pakdaar ti sirmata? (Kitaen ti footnote.)

6 Danum a mangted iti biag. Iti sirmata a nakita ni Ezekiel, nagayus ti karayan agingga iti Natay a Baybay, a nangbiag iti adu a paset dayta. Paliiwenyo ta nangbiag ti danum iti adu a nadumaduma a kita ti ikan, a maipada kadagiti adda iti Dakkel a Baybay wenno  Baybay Mediteraneo. Adda payen narang-ay nga industria ti panagkalap iti igid ti Natay a Baybay iti nagbaetan ti dua nga aginnaddayo nga ili. Kinuna ti anghel: Agbiagto ti “amin nga agnanaed iti pagayusan ti danum.” Ngem kayatna kadi a sawen a ti danum nga aggapu iti balay ni Jehova ket dumanon iti amin a paset ti Natay a Baybay? Saan. Inlawlawag ti anghel a ti dadduma nga alog ket saan a madanon ti danum a mangted iti biag. “Agtalinaeddanto a naapgad.” * (Ezek. 47:8-11) Isu a ti nailadawan a padto ipakaammona ti kari a mangipasigurado a ti nadalus a panagdaydayaw ket mangpaimbag kadagiti tattao tapno agtultuloyda nga agbiag. Ngem adda met pakdaar: Saan nga amin ket umawat kadagiti bendision ni Jehova; wenno saan nga amin ket mapaimbag.

7. Gapu ta adda kaykayo iti igid ti karayan iti sirmata, ania ti impasigurado dayta kadagiti naadipen a Judio?

7 Kaykayo a pagtaraon ken makaagas. Dagidiay ngay kaykayo iti igid ti karayan? Nayonanda ti pintas ti nailadawan a lugar, di ngamin? Nayonanda pay ti kaipapananna. Sigurado a naragsakan ni Ezekiel ken dagiti kailianna a nangpanunot kadagiti naimas a bunga dagita iti kada bulan! Ipasigurado met kadakuada dayta a makaay-ayo a ladawan a taraonan ida ni Jehova iti naespirituan. Ken ania pay? Siputanyo ta dagiti bulong dagidiay a kayo ket ‘agserbinto nga agas.’ (Ezek. 47:12) Ammo ni Jehova a ti naespirituan a pannakapaimbag ti kangrunaan a kasapulan dagiti agawid ket inkarina nga ipaayna dayta. No kasano nga inaramidna dayta ket nailawlawag iti dadduma pay a padto maipapan iti pannakaisubli kas naammuantayo iti Kapitulo 9 daytoy a libro.

8. Ania ti mangipakita nga adda dakdakkel a kaitungpalan ti padto ni Ezekiel?

8 Ngem kas iti naammuantayo iti Kapitulo 9, saan nga amin a kaitungpalan dagita a padto ket napadasan dagiti agawid. Dagiti tattao ti makagapu a saanda a napadasan ti dadduma a kaitungpalan dagita. Kasano koma a bendisionan ida a naan-anay ni Jehova no masansan a sublianda dagiti dakes nga aramidda, sumukirda, ken baybay-anda ti nadalus a panagdaydayaw? Nasaktan ken naupay dagiti matalek a Judio iti kababalin dagiti kailianda. Ngem ammo dagiti matalek a saan nga agpalia dagiti kari ni Jehova; kanayon a matungpal dagita. (Basaen ti Josue 23:14.) Adda ngarud aldaw a mapasamak ti dakdakkel a kaitungpalan ti padto ni Ezekiel. Ngem kaano?

Agay-ayus Itan ti Karayan!

9. Kaano a matungpal ti dakdakkel a kaitungpalan ti padto ni Ezekiel maipapan iti templo?

9 Kas nakitatayo iti Kapitulo 14 daytoy a libro, ti sirmata a nakita ni Ezekiel ket matungpal bayat ti “maudi a paset dagiti aldaw,” ti tiempo a maitan-ok ti nadalus a panagdaydayaw nga iti dayta pay la a tiempo a mapasamak. (Isa. 2:2) Kasano a matungtungpal itan daytoy a paset ti sirmata a nakita ni Ezekiel?

10, 11. (a) Ania dagiti bendision a kasla karayan nga agay-ayus ita kadatayo? (b) Kasano a limmawa ti panagayus dagiti bendision ni Jehova tapno mapennek dagiti dumakdakkel a kasapulan iti maudi nga al-aldaw?

10 Karayan dagiti bendision. Ania dagiti bendision ita nga ipalagip kadatayo ti agay-ayus a danum manipud balay ni Jehova? Talaga  a maipalagip kadatayo ti amin a makatulong iti naespirituan a salun-at ken pagimbagantayo. Ti kapatgan ket ti bileg ti mangdalus a daton a subbot ni Kristo, isu a mabalinen a mapakawan dagiti basoltayo. Dagiti nadalus a kinapudno ti Sao ti Dios ket nayarig met iti mangted iti biag ken mangdalus a danum. (Efe. 5:25-27) Kasano nga agayus dagiti kasta a bendision ita?

11 Idi 1919, mano a ribu laeng dagiti agserserbi ken Jehova, ket naragsakanda nga immawat kadagiti kasapulanda a naespirituan a taraon. Kadagiti simmaruno a dekada, nagtultuloy ti iyaaduda. Ita, nasuroken a walo a milion dagiti kameng ti ili ti Dios. Nagtultuloy kadi ti panagayus ti danum ti kinapudno? Wen! Aglaplapusanan ti abastotayo a naespirituan a kinapudno. Binilion a kopia ti Biblia, libro, magasin, broshur, ken tract ti nagayus iti ili ti Dios iti napalabas a 100 a tawen. Kas iti karayan iti sirmata a nakita ni Ezekiel, nagbiit a limmawa ti panagayus dagiti nadalus a kinapudno a mangpempennek iti dumakdakkel a kasapulan dagiti tattao a mawaw iti naespirituan iti intero a lubong. Adun a tawen a magun-odan dagiti nayimprenta a naibasar iti Biblia a publikasion. Ket ita, addan elektroniko a kopia dagita a publikasion iti website a jw.org iti nasurok a 900 a lengguahe! Ania ti epekto dagita a danum ti kinapudno kadagiti interesado a tattao?

12. (a) Ania dagiti nakitatayon a pammaneknek a ti kinapudno iti Biblia ket nangted iti biag ken naespirituan a salun-at kadagiti tattao? (b) Ania ti naintiempuan nga ipakdaar kadatayo ita ti sirmata? (Kitaen met ti footnote.)

12 Danum a mangted iti biag. Naibaga ken Ezekiel: Agbiagto ti “amin nga agnanaed iti pagayusan ti danum.” Panunotenyo ti epekto ti mensahe ti kinapudno a nagayus iti amin a nakikadua kadatayo iti naisubli a naespirituan a daga. Dagiti kinapudno iti Biblia ket nangted iti biag ken naespirituan a salun-at kadagiti minilion nga interesado iti kinapudno. Ngem adda met naintiempuan a pakdaar ti sirmata: Saan nga amin ket nagtalinaed nga interesado iti kasta a kinapudno. Kas iti alog ken nalutlot a disso iti Natay a Baybay iti sirmata ni Ezekiel, adda dagiti saan nga interesado, dida kayat nga awaten ken iyaplikar ti kinapudno. * Ditay koma pulos agbalin a kasta!​—Basaen ti Deuteronomio 10:16-18.

13. Ania dagiti masursurotayo ita kadagiti kaykayo iti igid ti karayan a nakita iti sirmata?

13 Kaykayo a pagtaraon ken makaagas. Adda kadi makaparegta a masursurotayo ita iti kaykayo iti igid ti karayan a nakita iti sirmata? Wen! Laglagipenyo a binulan a mangpataudda iti baro ken naimas a bunga ken makaagas dagiti bulongda. (Ezek. 47:12) Ipalagipda ngarud nga agserserbitayo iti Dios a sipaparabur a mangtartaraon ken mangag-agas kadatayo iti kapatgan a pamay-an​—iti naespirituan. Agsaksakit ti lubong ita ken mabisbisin iti naespirituan a pamay-an. Ngem panunotenyo dagiti ipapaay ni Jehova. Nariknam kadin a naparaburanka gapu kadagiti kasta a naespirituan a taraon kalpasan a binasam ti artikulo iti maysa kadagiti magasintayo, kinantam ti maudi a kanta iti asamblea wenno kombension, wenno  binuyam ti maysa a video wenno programa iti broadcasting? Talaga a mabmabsogtayo! (Isa. 65:13, 14) Sumalsalun-attayo kadi iti naespirituan gapu kadagita a naespirituan a taraon? Dagiti nagsayaat a balakad a maaw-awattayo, a naibasar iti Sao ti Dios ket makatulong tapno maliklikantayo dagiti kalaban a kas iti immoralidad, kinaagum, ken kinaawan pammati. Nangyurnos ni Jehova iti tumulong kadagiti Kristiano a manglaban kadagiti naespirituan a sakit gapu iti nadagsen a basol. (Basaen ti Santiago 5:14.) Pudno a mabembendisionantayo kas ipakita dagiti kayo iti sirmata ni Ezekiel.

14, 15. (a) Iti sirmata ni Ezekiel, ania dagiti masursurotayo kadagiti alog a saan a napasayaat ti kasasaadda? (b) Kasano a mabembendisionantayo ita iti karayan iti sirmata ni Ezekiel?

14 Adda met masursurotayo kadagidiay alog a saan a napasayaat ti kasasaadda. Ditay pulos kayat a lapdan ti panagayus dagiti bendision ni Jehova iti biagtayo. Dakes ti resulta ti saan a maagasan, kas iti adu iti daytoy masakit a lubong. (Mat. 13:15) Maragsakantayo ketdi ta mabembendisionantayo manipud iti karayan dagiti bendision. No magagarantayo nga uminum iti nadalus a danum ti kinapudno manipud iti Sao ti Dios, no iranudtayo dagita a kinapudno babaen ti trabaho a panangasaba, no umawattayo iti naayat a panangiwanwan, liwliwa, ken tulong manipud kadagiti panglakayen a sinanay ti matalek nga adipen, mabalin a mapanunottayo ti karayan iti sirmata ni Ezekiel. Dayta a karayan ti mangbibiag ken mangpapaimbag sadinoman ti pagayusanna!

15 Ngem ti ngay masanguanan a kaitungpalan ti karayan iti sirmata? Kas makitatayto, agayusto ti karayan iti kasayaatan a pamay-an iti asidegen a Paraiso.

Ti Kaipapanan Dayta a Sirmata iti Paraiso

16, 17. (a) Kasano a ti danum ti biag ket nasaksaknap iti Paraiso? (b) Iti Paraiso, kasano a magunggonaantayto iti karayan dagiti bendision?

16 Makitkitam kadi ti bagim iti Paraiso a kaduam dagiti gagayyem ken kapamiliam a maragragsakan unay iti biag? Nalawlawag dayta a ladawan iti panunotmo no adalem ti maipapan iti karayan iti sirmata ni Ezekiel. Kasano? Usigentayo manen ti tallo a nalawag ken naayat a paset ti sirmata.

17 Karayan dagiti bendision. Nasaksaknap ti panagayus ti simboliko a karayan iti Paraiso, ta saan la a naespirituan no di pay ket pisikal dagiti iyegna a bendision. Bayat ti Sangaribu a Tawen a Panagturay ni Jesus, ti Pagarian ti Dios ti tumulong kadagiti matalek a tattao a mangsagrap iti adayo a nasaysayaat a bendision a resulta ti subbot. In-inut nga agbalinda a perpekto! Awanton dagiti sakit, doktor, nars, ospital, health insurance! Dayta a danum ti biag ket agayus iti minilion a makalasat iti Armagedon, ti “dakkel a bunggoy” nga aggapu iti “dakkel a rigat.” (Apoc. 7:9, 14) Ngem dayta a panangrugi ti ayus ti karayan dagiti bendision, nupay nakasaysayaatton, ket sangatedted laeng no ikompara iti mapasamak kalpasanna. Kas ipakita ti sirmata ni Ezekiel, agsaknapto ti karayan tapno mapennek ti ad-adu a panagkasapulan.

Inton Paraiso, ti karayan dagiti bendision ket mangpaubing ken mangpasalun-at iti amin (Kitaen ti parapo 17)

18. Kasano a dumakkelto ti “karayan ti danum ti biag” bayat ti Sangaribu a Tawen?

 18 Danum a mangted iti biag. Bayat ti Sangaribu a Tawen, dumakkelto ti “karayan ti danum ti biag.” (Apoc. 22:1) Minilion, wenno binilion pay ketdi ti mapagungar ken maikkan iti gundaway nga agbiag nga agnanayon iti Paraiso! Dagiti bendision ni Jehova babaen ti Pagarian ramanenna ti panagungar ti adu a natay, a nabayagen a dimmaga. (Isa. 26:19) Ngem agbiagto ngata nga agnanayon ti amin a mapagungar?

19. (a) Ania ti mangipakita nga addanto iti Paraiso dagiti baro a danum ti kinapudno manipud iti Dios? (b) Kasano nga ‘agtalinaedto a naapgad’ ti dadduma?

19 Masapul nga agpili ti tunggal maysa. Malukatanto dagiti baro a lukot iti dayta a tiempo. Isu a karamanto iti makapabang-ar a danum manipud ken Jehova dagiti baro a maipakaammo a kinapudno, dagiti baro a naespirituan nga instruksion. Saan kadi a makaparagsak a panunoten dayta a namnama? Nupay kasta, addanto dagiti saan a mayat iti dayta a bendision, ket pilienda ti sumukir ken Jehova. Dadduma ti mabalin nga agrebelde bayat ti Sangaribu a Tawen, ngem saanda a mapalubosan a mangriribuk iti Paraiso. (Isa. 65:20) Maipalagip kadatayo ti nasirmata ni Ezekiel ken mapanunottayo dagiti alog a saanto a mapasayaat, “agtalinaeddanto a naapgad.” Talaga a maag dagidiay natangken ti ulona a saan nga uminum iti napateg a danum ti biag! Kalpasan ti Sangaribu a Tawen,  addanto grupo dagiti rebelde a kumappon ken Satanas. Amin a saan a sumurot iti nalinteg a turay ni Jehova agpapadanto ti pagtungpalanda: agnanayon nga ipapatay.​—Apoc. 20:7-12.

20. Ania nga urnos a pakagunggonaantayo bayat ti Sangaribu a Tawen ti ipalagip kadatayo dagiti kayo a nakita ni Ezekiel?

20 Kaykayo a pagtaraon ken makaagas. Saan a kayat ni Jehova a maikapis ti asinoman kadatayo iti biag nga agnanayon. Tapno matulongannatayo a mangaprobetsar iti nagsayaat a gundaway nga ituktukonna, siguraduenna manen nga addanto urnos a kas kadagiti kayo a nakita ni Ezekiel. Ngem iti Paraiso, pisikal ken naespirituan dagiti bendision nga ipaay ni Jehova. Idiay langit, ni Jesu-Kristo ken ti 144,000 a kakaduana ket agturayto kas ar-ari iti Sangaribu a Tawen. Kas papadi, ipakatto ti 144,000 dagiti pagimbagan ti daton a subbot ni Kristo, ket tulonganda dagiti matalek a tattao nga agbalin a perpekto. (Apoc. 20:6) Daytoy nga urnos ti pisikal ken naespirituan a panangagas ipalagipna kadatayo dagiti kayo a nakita ni Ezekiel iti igid ti karayan, dagiti kayo a mangpataud iti nasustansia a bunga ken makaagas dagiti bulongda. Ti sirmata ni Ezekiel ket maitunos iti maysa pay a napintas a padto nga insurat ni apostol Juan. (Basaen ti Apocalipsis 22:1, 2.) Dagiti bulong ti kaykayo a nakita ni Juan ket “pangagas kadagiti nasion.” Minilion a matalek a tattao ti magunggonaanto iti panagserbi ti 144,000 a papadi.

21. Ania ti epekto kenka ti panangpanunotmo iti karayan iti sirmata ni Ezekiel, ken ania ti sumaruno nga adalentayo? (Kitaen ti kahon nga “Agbalin a Karayan ti Agtedtedted a Danum!”)

21 Bayat a pampanunotem ti karayan iti sirmata a nakita ni Ezekiel, saan aya a natalna ti riknam ken naraniag ti namnamam? Nagsayaat ti masakbayantayo! Ken panunotem​—rinibu a tawenen ti napalabas, inikkannatayo ni Jehova iti adu a padto a tumulong kadatayo a mangiladawan iti panunottayo iti kasasaad inton Paraiso. Siaanus nga aw-awisennatayo nga addatayto sadiay tapno makitatayo ti dakkel a kaitungpalan dagiti padto nga inkarina a matungpal. Addakanto kadi sadiay? Mabalin a pampanunotem no addanto ngata met la lugarmo iti Paraiso. Sumaruno nga usigentayo no kasano a mangted iti pammatalged ti maudi a paset ti padto ni Ezekiel.

^ par. 3 Kanayonanna, posible nga ammo dagiti naipanaw a Judio, a makalagip iti kasasaad ti nakayanakanda a daga, nga imposible nga agayus ti karayan manipud iti Jerusalem agingga iti Natay a Baybay, ta adda dagiti turod ket saan a makapangato ti ayus.

^ par. 6 Sigun iti dadduma a komentarista, positibo a sasao daytoy, ta ti panagaramid iti asin a mausar kas preserbatibo ket nabayagen a napigsa a panguartaan iti rehion ti Natay a Baybay. Ngem paliiwenyo ta sigun iti salaysay, dagiti alog a disso ket “saanto a mapaimbag.” Agtalinaed dagita nga awan biagna, saan a mapaimbag, ta saan a madanon ti mangted iti biag a danum manipud iti balay ni Jehova. Isu nga iti daytoy a teksto, kasla negatibo ti kaipapanan ti kinaapgad dagita nga alog a disso.​—Sal. 107:33, 34; Jer. 17:6.

^ par. 12 Umasping iti dayta, usigenyo ti ilustrasion ni Jesus maipapan iti iket. Adu ti makalapan ti iket ngem saan nga amin ket napaneknekan a “nasayaat.” Naibelleng dagiti saan a nasayaat. No kasta, impakdaar ni Jesus nga adu kadagiti sumrek iti organisasion ni Jehova ti mapaneknekan a saan a matalek inton agangay.​—Mat. 13:47-50; 2 Tim. 2:20, 21.