Mapan iti linaonna

Mapan iti listaan dagiti linaonna

Surat ti Bagi a Manarawidwid

Surat ti Bagi a Manarawidwid

Patgenmi a Mangay-ayat ken Jehova:

Idi 1971, dagiti timmabuno iti “Divine Name” District Assembly ket naragsakan nga immawat iti sumagmamano a baro a publikasion. Dagiti publikasion ket nadeskribir kas “nalablabes ngem iti ninamnama ti asinoman.” Kastoy ti kuna ti maysa a kabsat maipapan iti maysa kadagita: “Dayta pay laeng ti nangted iti makapagagar unay a panirpatan kadagiti mapasamak iti masanguanan!” Ania ti tuktukoyenna? Ti libro a napauluan iti “The Nations Shall Know That I Am Jehovah”​—How? Ngem apay a nagagaran dagiti immawat iti dayta a libro? Naglaon ngamin iti kabaruan a pannakailawlawag kadagiti padto iti libro ti Biblia nga Ezekiel​—dagiti padto a mangapektar iti masanguanan ti intero a sangatauan.

Manipud idi nairuar ti libro a ‘Know Jehovah,’ nagpartak nga immadu dagiti kameng ti ili ti Dios​—manipud 1.5 a milion agingga iti nasurok a 8 a milion. (Isa. 60:22) Nasurok a 900 a nagduduma a lengguahe ti pagsasao dagitoy a minilion nga agserserbi ken Jehova. (Zac. 8:23) Adu ti saan pay a pulos naaddaan iti gundaway a mangadal iti libro a detalyado a mangilawlawag kadagiti padto nga impaisurat ti Dios ken propeta Ezekiel.

Manipud 1971 agingga ita, dakkel met ti nagbalbaliwan ti pannakaawattayo iti adu a kinapudno iti Biblia bayat nga agtultuloy a lumawlawag ti lawag. (Prov. 4:18) Idi 1985, nalawag a naawatantayo no kasano a ti ‘sabsabali a karnero’ ket maideklara a nalinteg kas gagayyem ti Dios. (Juan 10:16; Roma 5:18; Sant. 2:23) Kalpasanna, idi 1995, naawatantayo iti umuna a gundaway a ti maudi a panangukom kadagiti “karnero” ken “kalding” ket mapasamak bayat ti um-umay a “dakkel a rigat.” (Mat. 24:21; 25:31, 32) Amin dagitoy a panagbalbaliw ket dakkel ti epektona iti pannakaawattayo iti libro nga Ezekiel.

“Anak ti tao, kumitaka ken dumngegka a naimbag, ket siputam ti amin nga ipakitak kenka, ta dayta ti makagapu a naipanka ditoy.”​—EZEKIEL 40:4

Kadagiti napalabas a tawen, nagtultuloy a limmawag ti lawag. Usigentayo dagiti leksion a masursurotayo kadagiti ilustrasion ni Jesus. Adu kadagita a leksion ti nakalawlawagen iti isip ken pusotayo. Sumagmamano kadagita nga ilustrasion ti tumukoy kadagiti mapasamak bayat ti umas-asidegen a dakkel a rigat. Iti kasta met la a pamay-an, nalawlawagan ti pannakaawattayo iti dadduma a padto iti libro ti Biblia nga Ezekiel. Dadduma kadagita ket dagiti padto maipapan ken Gog iti Magog (kapitulo 38 ken 39), ti trabaho ti lalaki nga addaan iti tintero ti sekretario (kapitulo 9), ken ti tanap dagiti namaga a tulang ken ti simboliko a panagtipon ti dua a baston (kapitulo 37). Gapu amin kadagita a pannakalawlawag, napabaro met dagiti nabayagen a naisurat iti libro a ‘Know Jehovah.’

Sigurado ngarud nga insaludsoden ti adu nga agserserbi ken Jehova, “Kaano ngata a makaawatkami iti libro a mangted iti napabaro a pannakailawlawag dagiti padto ni Ezekiel?” Ti sungbat ket ti libro a Nadalus a Panagdaydayaw ken Jehova​—Naisubli Met Laengen! Bayat a basaenyo ti 22 a kapitulona ken panunotenyo a naimbag dagiti nagpipintas a ladawanna, masdaawkayto iti amin a naaramid a naannad a panagsukimat iti pannakaisagana dayta. Adu a panagpanunot ken panagkararag ti naaramid tapno masigurado no apay nga impaisurat ni Jehova ti makapainteres a libro nga Ezekiel. Naannad ti pannakausig dagiti saludsod a kas iti: Ania dagiti leksion nga insuro ti libro nga Ezekiel kadagiti tattao a nagbiag idi panawen ni Ezekiel ken ania dagiti isurona kadatayo ita? Aniada a padto ti matungpalto pay laeng iti masanguanan? Ikkantayo kadi iti tipiko ken antitipiko a kaipapanan dagiti padto ni Ezekiel? Dagiti sungbat dagitoy a  saludsod ti mangted iti kalalawagan pay laeng a pannakaawattayo iti daytoy nabayagen nga ipatpategtayo a libro ti Biblia.

Bayat a basaenyo ti libro nga Ezekiel manipud rugi agingga iti ngudona, talaga a maapresiaryo ti nailangitan a paset ti organisasion ni Jehova. Sigurado a masdaawkayo met kadagiti nangato a pagalagadan nga inted ni Jehova kadagiti adda idiay langit ken adda ditoy daga a kayatda nga akseptarenna ti panagdaydayawda kenkuana. Ti libro a Nadalus a Panagdaydayaw ti mangpauneg iti panangipategyo kadagiti inaramiden ni Jehova para iti ilina ken kadagiti aramidennanto para kadakuada iti asidegen a masanguanan. Makitayonto a maulit-ulit nga ipaganetget daytoy a libro ti dua a tema. Umuna, tapno maparagsaktayo ni Jehova, masapul nga ammuen ken bigbigentayo isuna kas ti Kangatuan nga Agturay iti Uniberso. Maikadua, masapul nga agdaydayawtayo ken Jehova iti pamay-an nga anamonganna, ken agbiagtayo a maitunos kadagiti nangato a pagalagadanna.

Naimpusuan a tarigagayanmi a daytoy a libro ti mangpabileg iti determinasionyo nga agdaydayaw ken Jehova iti pamay-an a mangidaydayaw ti naindaklan ken nasantuan a naganna. Maparegtanakayo met koma nga agtultuloy a mangnamnama iti tiempo inton amin a nasion maammuanda nga isu ni Jehova.​—Ezek. 36:23; 38:23.

Sapay koma ta sibabaknang a bendisionan ti nadungngo nga Amatayo a ni Jehova dagiti panagreggetyo a mangtarus iti libro nga impaisuratna ken propeta Ezekiel.

Dagiti kakabsatyo,

Bagi a Manarawidwid Dagiti Saksi ni Jehova