Mapan iti linaonna

Mapan iti listaan dagiti linaonna

 KAPITULO 4

Siasino Dagiti “Sibibiag a Parsua nga Uppat ti Rupada”?

Siasino Dagiti “Sibibiag a Parsua nga Uppat ti Rupada”?

EZEKIEL 1:15

NAKAISENTRUANNA: Dagiti sibibiag a parsua ken ti masursurotayo iti panangadaltayo kadakuada

1, 2. No dadduma, apay a nagusar met ni Jehova kadagiti ladawan no ipakaammona dagiti kinapudno kadagiti adipenna ditoy daga?

PANUNOTENYO ti pamilia nga ubbing pay ti annakda. Nakatugawda iti sango ti lamisaan iti kosina nga agad-adal iti Biblia. Tapno maawatan dagiti annakna ti maysa a kinapudno iti Biblia, mangipakpakita ti ama kadagiti simple a drowing. Agis-isem ken maay-ayatan a sumungsungbat dagiti ubbing ta maaw-awatanda ti isursurona. Babaen kadagiti drowing, tultulongan ida ti ama a mangtarus kadagiti pannursuro maipapan ken Jehova a dida pay la maawatan.

2 Nagusar met ni Jehova kadagiti ladawan tapno matulonganna ti annakna a tattao a mangtarus kadagiti di makita a realidad a dida maawatan no bukbukodda. Kas pagarigan, tapno mailawlawagna dagiti napateg a kinapudno maipapan kenkuana, nangipakita ni Jehova ken Ezekiel iti sirmata a nagpaiduma dagiti ladawanna. Iti napalabas a kapitulo daytoy a libro, inadaltayo ti maysa kadagita. Agpokustayo ita iti maysa nga espesipiko a paset dayta a naidumduma a sirmata ken kitaentayo no kasanotayo nga agbalin a nasingsinged ken Jehova no maawatantayo ti kaipapananna.

 “Adda Nakitak a . . . Kasla Uppat a Sibibiag a Parsua”

3. (a) Sigun iti Ezekiel 1:4, 5, ania ti nakita ni Ezekiel iti sirmata? (Kitaen ti ladawan iti rugi ti kapitulo.) (b) Ania ti madlawyo iti pamay-an ni Ezekiel a nangisurat kadagiti nakitana?

3 Basaen ti Ezekiel 1:4, 5. Inladawan ni Ezekiel ti “kasla uppat a sibibiag a parsua” a kalanglanga ti anghel, tao, ken animal. Siputanyo no kasano nga indetalye ni Ezekiel ti nakitana. Imbagana a nakakita kadagiti “kasla” sibibiag a parsua. Bayat a basaenyo ti intero a sirmata iti Ezekiel kapitulo 1, madlawyo a naulit-ulit nga inusar ti propeta ti sasao a kas iti “kasla,” “kas,” ken “kalanglanga.” (Ezek. 1:13, 24, 26) Nalawag a naawatan ni Ezekiel a dagiti nakitana ket kapadpada laeng, wenno ladawan dagiti di makita nga agpayso nga adda idiay langit.

4. (a) Ania ti reaksion ni Ezekiel iti nakitana a sirmata? (b) Ania ti sigurado nga ammo ni Ezekiel maipapan kadagiti kerubin?

4 Sigurado a nasdaaw ni Ezekiel kadagiti nakita ken nangngegna iti sirmata. Ti langa ti uppat a sibibiag a parsua ket kas iti “sumsumged a beggang ti apuy.” “Kasla kimat” ti kapartak ti panaggarawda. “Kasla uni ti agay-ayus a danum” ti uni dagiti payakda ken ‘kasla uni ti maysa nga armada’ ti panaggarawda. (Ezek. 1:13, 14, 24-28; kitaen ti kahon a “Kitkitaek Dagiti Sibibiag a Parsua.”) Iti naud-udi a sirmata a nabuyana, tinukoy ni Ezekiel dagitoy uppat a sibibiag a parsua kas “kerubin,” wenno mannakabalin nga anghel. (Ezek. 10:2) Gapu ta dimmakkel iti pamilia ti papadi, sigurado nga ammo ni Ezekiel a dagiti kerubin ket masansan nga adda iti asideg ti Dios ken agserserbida Kenkuana.​—1 Cron. 28:18; Sal. 18:10.

“Uppat ti Rupa . . . ti Tunggal Maysa”

5. (a) Kasano nga ipakita dagiti kerubin ken ti uppat a rupada ti kinatan-ok ti pannakabalin ken kinadayag ni Jehova? (b) Apay nga ipalagip kadatayo daytoy a paset ti sirmata ti kaipapanan ti nagan ti Dios? (Kitaen ti footnote.)

5 Basaen ti Ezekiel 1:6, 8. Nakita met ni Ezekiel nga uppat ti rupa ti tunggal kerubin​—rupa ti tao, leon, kalakian a baka, ken agila. Idi nakita ni Ezekiel ti uppat a rupa, nagtalinaed la ketdi iti isipna ti kasta unay a kinatan-ok ti pannakabalin ken kinadayag ni Jehova. Apay? Ngamin, tunggal rupa ket ladawan ti maysa a parsua a mangisimbolo iti kinadayag, kinabileg, ken kinamannakabalin. Ti leon ket nadayag nga atap nga animal, ti kalakian a baka ket dakkel a taraken, ti agila ket mannakabalin a tumatayab, ken ti tao ti katan-okan kadagiti parsua ti Dios ditoy daga, ti mangituray iti amin a dadduma pay a parsua iti daga. (Sal. 8:4-6) Ngem iti daytoy a sirmata, nakita ni Ezekiel a ti amin nga uppat a mannakabalin a pannakabagi dagiti parsua, kas iladawan ti uppat a rupa ti tunggal kerubin, ket adda iti baba ti trono ni Jehova, ti Katan-okan ken Kangatuan nga Agturay iti amin. Anian a maitutop a pangiladawan a mabalin nga usaren ni Jehova dagiti parsuana a mangitungpal iti panggepna! * Pudno ti imbaga ti salmista maipapan ken Jehova: “Ti dayagna ket nangatngato ngem iti daga ken langit.”​—Sal. 148:13.

Ania ti ipalgak ti uppat a sibibiag a parsua ken ti uppat a rupada maipapan iti pannakabalin, dayag, ken dagiti kualidad ni Jehova? (Kitaen ti parapo 5, 13)

6. Ania ti mabalin a nakatulong ken Ezekiel tapno maawatanna ti dadduma pay nga iladawan ti uppat a rupa?

6 Kalpasan ti sumagmamano a tiempo ken napagpanunotanen ni Ezekiel ti nakitana, mabalin a nalagipna a dagiti adipen ti Dios  a nagbiag sakbayna ket nagusar met kadagiti animal iti panangikompara. Kas pagarigan, inkompara ni Jacob ti anakna a ni Juda iti leon ken ni Benjamin iti lobo. (Gen. 49:9, 27) Apay? Gapu ta iladawan ti leon ken ti lobo dagiti kababalin wenno kualidad a makita iti personalidad dagitoy a lallaki. Isu a no silalagip ni Ezekiel kadagita a pagarigan kadagiti impaisurat ti Dios ken Moises, mabalin a naawatanna a ti rupa dagiti kerubin ket mangiladawan met kadagiti naisangsangayan a kualidad wenno kababalin. Ngem makinkualidad?

Dagiti Kualidad ni Jehova ken ti Nailangitan a Pamiliana

7, 8. Ania dagiti kualidad a masansan a maikonektar iti uppat a rupa dagiti kerubin?

7 Ania dagiti kualidad a nangikonektaran dagiti mannurat iti Biblia sakbay ti panawen ni Ezekiel iti leon, agila, ken kalakian a baka? Kitaenyo dagitoy a sasao iti Biblia: “Ti natured a lalaki a ti pusona ket kas iti puso ti leon.” (2 Sam. 17:10; Prov. 28:1) “Tumayab ti agila nga agpangato,” ken “makita dagiti matana ti adayo a distansia.” (Job 39:27, 29) “Mangyeg iti adu nga apit ti pigsa ti kalakian a baka.” (Prov. 14:4) Maibatay kadagiti kasta a teksto, ti rupa ti leon iladawanna ti natured a kinahustisia; ti rupa ti agila iladawanna ti sirib a makakita iti adayo; ti rupa ti kalakian a baka iladawanna ti di malapdan a pannakabalin, kas iti masansan nga ibagbaga idi dagiti publikasiontayo.

8 Ngem ti ngay “rupa ti tao”? (Ezek. 10:14) Tumukoy la ketdi iti kualidad a saan a maipakita ti aniaman nga animal no di ket ti tattao a naparsua a kaladladawan ti Dios. (Gen. 1:27) Dayta a kualidad​—ditoy daga, a tattao laeng ti makaipakita—​ket naitampok kadagiti bilin ti Dios: “Masapul nga ayatenyo ni Jehova a Diosyo iti amin a pusoyo” ken ti “padayo a tao . . . ket masapul nga ayatenyo a kas iti bagiyo.” (Deut. 6:5; Lev. 19:18) No agtulnogtayo kadagitoy a bilin babaen ti panangipakita iti di agimbubukodan nga ayat, tultuladentayo ti ayat ni Jehova. Kas iti insurat ni apostol Juan, “agayattayo ta isu ti immuna a nagayat kadatayo.” (1 Juan 4:8, 19) No kasta, ayat ti irepresentar ti “rupa ti tao.”

9. Siasino ti addaan kadagiti kualidad a masansan a maikonektar iti uppat a rupa dagiti kerubin?

9 Siasino ti addaan kadagitoy a kualidad? Gapu ta dagiti kerubin ti makinrupa kadagita, kualidad ngarud dagita ti amin nga irepresentar dagiti kerubin iti sirmata​—ti nailangitan a pamilia ni Jehova a buklen dagiti matalek nga espiritu a parsuana. (Apoc. 5:11) Maysa pay, gapu ta ni Jehova ti Ubbog ti biag dagiti kerubin, isu met laeng ti Ubbog dagiti kualidadda. (Sal. 36:9) Dagiti ngarud rupa dagiti kerubin iladawanda dagiti kualidad ni Jehova. (Job 37:23; Sal. 99:4; Prov. 2:6; Mik. 7:18) Ania ti sumagmamano a pamay-an nga ipakpakita ni Jehova dagitoy a nagsasayaat a kualidad?

10, 11. Ania ti dadduma a pamay-an a magunggonaantayo kadagiti panangipakita ni Jehova iti uppat a kangrunaan a kualidadna?

10 Kinahustisia. Kas ti Dios a ‘managayat iti kinahustisia,’ “saan a mangidumduma” ni Jehova. (Sal. 37:28; Deut. 10:17) Isu a ti  oportunidad nga agbalin ken agtalinaed nga adipenna ken umawat kadagiti agnanayon a bendision ket nakalukat kadatayo amin, aniaman ti kasasaad wenno nagtaudantayo. Sirib. Kas ti Dios a “masirib,” nangipaay ni Jehova iti libro a napno iti “praktikal a sirib.” (Job 9:4; Prov. 2:7) No iyaplikartayo ti nainsiriban a balakad ti Biblia, mapagballigiantayo dagiti inaldaw a pakarigatan ken makapnek ti biagtayo. Pannakabalin. Kas ti Dios a “dakkel ti pannakabalinna,” us-usaren ni Jehova ti nasantuan nga espirituna a mangted kadatayo iti “bileg a nalablabes ngem iti gagangay.” Daytoy ti mangpabileg kadatayo nga agibtur iti aniaman a nakaro ken nasaem a pannubok a mabalin a mapasarantayo.​—Nah. 1:3; 2 Cor. 4:7; Sal. 46:1.

11 Ayat. Kas ti Dios a “dakkel ti napudno nga ayatna,” saan a pulos baybay-an ni Jehova dagiti matalek nga agdaydayaw kenkuana. (Sal. 103:8; 2 Sam. 22:26) Isu nga uray no maladingitantayo ta saanen a kas iti dati ti kaadu ti maar-aramidantayo a panagserbi ken Jehova gapu iti sakit wenno kinanataengan, maliwliwatayo ta ammotayo a malaglagip latta ni Jehova dagiti inaramidtayo gapu iti ayattayo kenkuana. (Heb. 6:10) Sigurado nga adun ti nagunggonatayo iti impakita ni Jehova a kinahustisia, sirib, pannakabalin, ken ayatna, ken agtultuloy a magunggonaantayo kadagitoy uppat a kangrunaan a kualidadna iti masanguanan.

12. Ania ti masapul a laglagipentayo maipapan iti abilidadtayo a mangtarus kadagiti kualidad ni Jehova?

12 Siempre, masapul a laglagipentayo a kas tattao, dagiti matarusantayo maipapan kadagiti kualidad ni Jehova ket ‘bassit laeng a paset dagiti inaramidna.’ (Job 26:14) “Saantayo a maawatan ti amin maipapan iti Mannakabalin-amin,” ta “saan a matukod ti kinanaindaklanna.” (Job 37:23; Sal. 145:3) Gapuna, maamiristayo a saan a mabilang dagiti kualidad ni Jehova ken saan a mabingay sigun kadagiti kategoria. (Basaen ti Roma 11:33, 34.) Kinapudnona, ipakaammo ti sirmata ni Ezekiel a saan a limitado ti bilang wenno saklawen dagiti kualidad ti Dios. (Sal. 139:17, 18) Ania a paset ti sirmata ti mangitampok iti dayta a napateg a kinapudno?

‘Uppat ti Rupa, Uppat ti Payak, Uppat ti Sikiganda’

13, 14. Ania ti irepresentar ti uppat a rupa dagiti kerubin, ken apay a kasta ti konklusiontayo?

13 Nakita ni Ezekiel iti sirmata nga uppat ti rupa ti tunggal kerubin, saan a saggaysa. Ania ti kaipapanan dayta? Laglagipentayo nga iti Sao ti Dios, ti numero nga uppat ket masansan a nausar a mangirepresentar iti banag a mangsaklaw iti amin wenno kinakompleto. (Isa. 11:12; Mat. 24:31; Apoc. 7:1) Makapainteres ta iti daytoy a sirmata, namin-10 a dinakamat ni Ezekiel ti numero nga uppat! (Ezek. 1:5-18) Ania ngarud ti konklusiontayo? No kasano nga irepresentar ti uppat a kerubin ti amin a dadduma pay a matalek nga espiritu a parsua, ti ngarud uppat a rupa dagiti  kerubin no kitaen a sangsangkamaysa irepresentar wenno saklawenda ti amin a kualidad ni Jehova. *

14 Tapno mailawlawag no apay a ti kaipapanan ti uppat a rupa dagiti kerubin ket saan laeng a ti uppat a kualidad, ikomparatayo ti mapaspasamak iti uppat a pilid iti daytoy a sirmata. Nagdakkel ti tunggal pilid, ngem no kitaem a sangsangkamaysa ti uppat a pilid, saanda la a basta buklen ti uppat a nagdadakkel a pilid​—dagita ti pundasion a nakaisaadan ti karuahe. No sangsangkamaysa met a kitaem ti uppat a rupa, saanda la a basta uppat a nagsayaat a kualidad​—dagita ti pundasion ti nakaskasdaaw a personalidad ni Jehova.

Asideg ni Jehova iti Amin a Matalek nga Adipenna

15. Ania a makaparagsak a kinapudno ti nasursuro ni Ezekiel iti umuna a sirmata a nakitana?

15 Iti umuna a sirmata, nakasursuro ni Ezekiel iti nagpateg ken makaparagsak a kinapudno maipapan iti relasionna ken Jehova. Ania dayta? Naipakita dayta a kinapudno iti rugrugi ti librona. Kalpasan ti panangibagana nga adda isuna “iti daga dagiti Caldeo,” intuloy ni Ezekiel ti maipapan iti napadasanna: “Nagtignay kenkuana sadiay ti pannakabalin ni Jehova.” (Ezek. 1:3) Siputanyo  ta kuna ni Ezekiel a naawatna ti sirmata sadiay Babilonia, saan nga idiay Jerusalem. * Ania ngarud ti ipakaammo dayta ken Ezekiel? Daytoy: Nupay maysa a nanumo a naipanaw ken nayadayo idiay Jerusalem ken iti templo, saan a naisina ken Jehova ken iti panagdaydayaw kenkuana. Ti panagparang ni Jehova ken Ezekiel idiay Babilonia ti mangipakita a ti nadalus a panagdaydayaw iti Dios ket saan nga agdepende iti lokasion wenno kasasaad. Agdepende dayta iti kasasaad ti puso ni Ezekiel ken iti tarigagayna nga agserbi ken Jehova.

16. (a) Ania ti makaliwliwa nga ipasigurado kadatayo ti sirmata a nakita ni Ezekiel? (b) Apay a kayatmo ti agserbi ken Jehova iti amin a pusom?

16 Apay a makaliwliwa unay kadatayo ita ti kinapudno a nasursuro ni Ezekiel? Ipasigurado dayta kadatayo a no naimpusuan nga agserbitayo ken Jehova, agtalinaed a nasinged kadatayo sadinoman ti ayantayo, maburburiborantayo man, wenno aniaman ti kasasaad ti biagtayo. (Sal. 25:14; Ara. 17:27) Gapu iti dakkel a napudno nga ayat ni Jehova iti tunggal adipenna, saannatayo a basta baybay-an. (Ex. 34:6) No kasta, kanayon a madanonnatayo ti napudno nga ayat ni Jehova. (Sal. 100:5; Roma 8:35-39) Daytoy a nagsayaat a sirmata maipapan iti kinasanto ni Jehova ken iti nagdakkel a pannakabalinna ipalagipna met kadatayo a maikari ni Jehova nga umawat iti panagdaydayawtayo. (Apoc. 4:9-11) Wen, agyamantayo unay ta inusar ni Jehova dagiti kasta a sirmata tapno tulongannatayo a mangtarus iti dadduma a napateg a kinapudno maipapan kenkuana ken kadagiti kualidadna! No ad-adda a matarusantayo dagiti nagsayaat a kualidad ni Jehova, agbalintayo a nasingsinged kenkuana ken matignaytayo nga agdaydayaw ken agserbi kenkuana iti amin a puso ken amin a pigsatayo.​—Luc. 10:27.

Kanayon a madanonnatayo ti napudno nga ayat ni Jehova (Kitaen ti parapo 16)

17. Ania dagiti saludsod a mausig kadagiti sumaruno a kapitulo?

17 Ngem makapaladingit ta narugitan ti nadalus a panagdaydayaw idi panawen ni Ezekiel. Apay a nagbalin a kasta? Ania ti reaksion ni Jehova? Ken ania ti pateg kadatayo ita dagitoy a pasamak idi un-unana? Mausig dagitoy a saludsod iti sumaruno a kapitulo.

^ par. 5 Ti panangiladawan ni Ezekiel kadagitoy a parsua ipalagipna kadatayo ti nagan ti Dios a Jehova, a “Pagbalinenna” ti matarusantayo a kaipapananna. Kas ipalgak ti maysa a paset dayta a nagan, kabaelan ni Jehova a pagbalinen dagiti parsuana iti aniaman a kasapulan tapno maibanag ti panggepna.—Kitaen ti Apendise A4 iti Baro a Lubong a Patarus.

^ par. 13 Iti panaglabas dagiti tawen, nailawlawagen kadagiti publikasiontayo ti adu a nagduduma a kualidad ni Jehova.—Kitaen ti Giya iti Panagsukimat Para Kadagiti Saksi ni Jehova iti suheto a “Jehova a Dios,” iti subtitulo a “Kualidad ni Jehova.”

^ par. 15 Ti sao a “sadiay,” sigun iti maysa a komentarista ti Biblia ket “direkta ken simple a panangiladawan iti panagsiddaaw. . . . Adda ti Dios sadiay Babilonia! Anian a makaliwliwa!”