Mapan iti linaonna

Mapan iti listaan dagiti linaonna

 KAPITULO 3

“Nakakitaak Kadagiti Sirmata Manipud iti Dios”

“Nakakitaak Kadagiti Sirmata Manipud iti Dios”

EZEKIEL 1:1

NAKAISENTRUANNA: Pakabuklan ti sirmata ni Ezekiel maipapan iti nailangitan a karuahe

1-3. (a) Iladawanmo ti nakita ken nangngeg ni Ezekiel. (Kitaen ti ladawan iti rugi ti kapitulo.) (b) Ania a pannakabalin ti nangtignay ken Ezekiel a makakita iti dayta a pasamak, ket ania ti reaksionna?

KITKITAEN ni Ezekiel ti adayo a naglawa a kadaratan. Idi kuan, napamulagat. Kasla di mamati iti makitkitana. Manipud iti adayo, adda um-umay a napigsa a bagyo. Ngem saan a basta bagyo. Bayat nga adda napigsa nga angin manipud amianan a simmaplit iti buok ken badona, nakakita iti nagpuskol ken nagdakkel nga ulep. Limmawag dayta gapu iti gumilgilap nga apuy. Ti karaniagna ipalagipna kenkuana ti natunaw a napateg a metal. * Bayat nga umas-asideg ti ulep ken Ezekiel, adda pumigpigsa nga uni​—daranudor a kas iti dumarup a dakkel nga armada.​—Ezek. 1:4, 24.

2 Ag-30 ti tawenna idi dimteng daytoy umuna kadagiti agsasaruno a dina malipatan a pasamak iti biagna. Mariknana a ‘nagtignay kenkuana ti pannakabalin ni Jehova,’ ti saan a malapdan a pannakabalin ti nasantuan nga espiritu ni Jehova. Naisangsangayan ti ipakita ken ipangngeg dayta nga espiritu, nga adayo a nakaskasdaaw ngem iti aniaman a pelikula ita a nagusar iti adu nga special-effects. Maparukob ni Ezekiel gapu iti mabuyana a sirmata ta masdaaw iti kasta unay.​—Ezek. 1:3, 28.

 3 Ngem ti panggep ni Jehova ket saan la a basta pagsiddaawen daytoy a lalaki. Kas iti dadduma pay a sirmata a naisalaysay iti dayta a makapagagar a libro ti padto, ti umuna a sirmata ni Ezekiel ket aduan iti kaipapanan kenkuana ken kadagiti matalek nga adipen ni Jehova ita. Isu a kitaentayo a naimbag dagiti nakita ken nangngeg ni Ezekiel.

Ti Kasasaad

4, 5. Ania ti kasasaad idi nakita ni Ezekiel ti sirmata?

4 Basaen ti Ezekiel 1:1-3. Subliantayo nga umuna ti kasasaad. Ti tawen ket 613 B.C.E. Kas naammuantayon iti napalabas a kapitulo, adda ni Ezekiel idiay Babilonia a kadua dagiti padana a naipan sadiay. Agnanaedda iti komunidad iti asideg ti karayan Kebar​—maysa a pagbangkaan a kanal nga inaramid ti tao. Sumina dayta iti karayan Eufrates sa sumabat met laeng iti sabali a pasetna.

Nagnaed ni Ezekiel iti asideg ti karayan Kebar a kadua dagiti padana a naipanaw (Kitaen ti parapo 4)

5 Agarup 800 a kilometro ti kaadayo ti Jerusalem a pinanawan dagiti naipanaw a Judio. * Ti templo, a nagserbian ti ama ni Ezekiel kas padi, ti pakaar-aramidanen ti ulbod a panagdaydayaw ken idolatria. Nakababainen ti kasasaad ti trono iti Jerusalem, a nagtugawan da David ken Solomon bayat ti nadayag a panagturayda. Ti saan a matalek nga ari a ni Jehoiakin ket adda idiay Babilonia a kadua dagiti naipanaw. Ni Zedekias a simmukat kenkuana iti trono ket dakes a tao ken kontrolado ti ari ti Babilonia.​—2 Ar. 24:8-12, 17, 19.

6, 7. Apay a mabalin a narikna ni Ezekiel nga agbibiag isuna iti karirigatan a tiempo?

6 Para iti matalek a kas ken Ezekiel, kasla daytoyen ti karirigatan a tiempo iti biagna. Mabalin a naisaludsod ti dadduma kadagiti padana a naipanaw: ‘Agnanayon ngatan a pinanawannatayo ni  Jehova? Talaga ngata a pukawen daytoy dakes a pagarian ti Babilonia ken ti nagadu a didiosenna ti nadalus a panagdaydayaw ken Jehova ken ti turay ti Dios ditoy daga?’

7 Bayat a pampanunotem dagita, mabalinmo a rugian a personal nga adalen daytoy a topiko. Basaem ti nalawag a panangiladawan ni Ezekiel iti nakitana nga umuna a sirmata. (Ezek. 1:4-28) Padasem a panunoten a sika ni Ezekiel, a mangkitkita kadagiti nakitana ken dumdumngeg kadagiti nangngegna.

Ti Karayan Eufrates iti rehion nga asideg ti Carkemis (Kitaen ti parapo 5-7)

Awan Kapadana a Lugan

8. Ania ti nakita ni Ezekiel iti sirmata, ken ania ti irepresentar dayta?

8 Ania ti nakita ni Ezekiel? Kasla nagdakkel ken nakaskasdaaw a lugan a nailadawan kas karuahe. Addaan iti uppat a nagdadakkel a pilid ken kuykuyogen ti uppat a naidumduma nga espiritu a parsua, a natukoy idi agangay kas kerubin. (Ezek. 10:1) Iti ngatoda, adda naglawa a plataporma wenno tangatang a kasla yelo, a nagsaadan ti nadayag a trono ti Dios, a ni Jehova ti nakatugaw! Ngem ania ti kaipapanan dayta a karuahe? Maitutop a maysa laeng ti irepresentar ti sirmata ni Ezekiel: ti nailangitan a paset ti nadayag nga organisasion ni Jehova iti intero nga uniberso. Apay a makunatayo a kasta? Usigentayo ti tallo a pakaibatayan iti kasta a konklusion.

9. Kasano a kas iti lugan ti relasion ni Jehova kadagiti parsuana idiay langit?

 9 Ti relasion ni Jehova kadagiti parsuana idiay langit. Siputanyo ta iti daytoy a sirmata, ti trono ni Jehova ket adda iti ngato dagiti kerubin. Iti dadduma a paset ti Sao ti Dios, nailadawan wenno nairepresentar met laeng ni Jehova a nakatugaw iti trono iti ngato wenno nagbaetan dagiti kerubinna. (Basaen ti 2 Ar-ari 19:15; Ex. 25:22; Sal. 80:1) Siempre, saan a literal a nakatugaw iti ngato dagiti kerubinna​—a kas man la kasapulan a bagkaten dagita a mannakabalin nga espiritu a parsua—​wenno kasapulan nga aglugan iti literal a karuahe. Ngem supsuportaran dagiti kerubin ti kalinteganna a mangituray, ken maibaonna ida iti sadinoman a paset ti uniberso tapno maaramid ti pagayatanna. Kas iti amin a nasantuan nga anghel ti Dios, itungtungpalda dagiti desision ni Jehova, kas dagiti ministro wenno pannakabagina. (Sal. 104:4) Dayta ti kaipapanan ti sao a “naglugan” ni Jehova kadakuada amin, iturturongna ida kas kangatuan nga agturay, a kasla isuda ti mangbukel iti maymaysa a dakkel a lugan nga addaan iti panagkaykaysa.

10. Ania ti mangipamatmat a saan la nga uppat a kerubin ti karaman iti nailangitan a karuahe?

10 Saan la a dagiti kerubin ti irepresentar ti lugan. Uppat a kerubin ti nakita ni Ezekiel. Dayta a numero ket masansan a nausar iti Biblia a mangipamatmat iti agpapada a rukod wenno kinakompleto​—a mangiraman iti amin nga awan ti maipuera. Ti ngarud  kaadda ti uppat a kerubin ti mangipamatmat a ti amin a matalek nga espiritu nga annak ni Jehova ket nairepresentar. Siputanyo met ta dagiti pilid ken uray dagiti kerubin ket napno iti mata, a mangipamatmat a nasiput ken alerto ti adu pay nga espiritu a parsua malaksid iti uppat a naipakita. Nagdakkel ti lugan sigun iti panangiladawan ni Ezekiel, isu a kasla bassit dagiti dadakkel a kerubin. (Ezek. 1:18, 22; 10:12) Kasta met ti nakalawlawa a nailangitan a paset ti organisasion ni Jehova, a saan la a ti uppat a kerubin ti mangbukel iti dayta.

Nagsiddaaw unay ni Ezekiel iti nasirmatana maipapan iti nailangitan a karuahe ni Jehova (Kitaen ti parapo 8-10)

11. Ania nga umasping a sirmata ti nakita ni Daniel, ken ania ti umiso laeng a panunotentayo?

11 Ti umasping a sirmata ni Daniel maipapan iti langit. Iti napaut a kaadda ni Daniel iti siudad ti Babilonia, naipabuya met kenkuana ti sirmata maipapan iti langit. Makapainteres ta iti nabuyana, ti trono ni Jehova ket addaan met kadagiti pilid. Naisentro ti nakitana a sirmata iti kadakkel ti pamilia ni Jehova idiay langit a buklen dagiti espiritu. Nakakita ni Daniel iti “sangaribu a rinibu . . . ken sangapulo a ribu a maminsangapulo a ribu” nga espiritu nga annak ti Dios a nakatakder iti sanguanan ni Jehova. Nagtugawda a kas iti Korte idiay langit, a tunggal maysa ket adda iti naited a puestona. (Dan. 7:9, 10, 13-18) Saan kadi nga umiso laeng a panunoten a daytoy a nadayag a taripnong dagiti espiritu ket isu met laeng ti irepresentar ti nabuya ni Ezekiel?

12. Apay a proteksion kadatayo ti panangadal kadagiti salaysay a kas iti nasirmata ni Ezekiel maipapan iti nailangitan a karuahe?

12 Ammo ni Jehova a proteksiontayo a tattao no ipamaysatayo ti isiptayo kadagiti naespirituan a realidad​—dagiti “bambanag a di makita,” kas awag ni apostol Pablo kadagita. Apay? Kas tattao, sobra unay ti panangpanunottayo iti “bambanag a makita,” dagiti pisikal a pakaseknantayo a temporario laeng. (Basaen ti 2 Corinto 4:18.) Masansan nga usaren ni Satanas dayta a tendensia ket sugsogannatayo a mangpanunot iti bambanag a nainlasagan. Tapno matulongannatayo ni Jehova a manglaban iti dayta, siaayat a mangipapaay kadagiti impormasion a kas iti daytoy a nadakamat iti padto ni Ezekiel. Dayta ti mangipalagip kadatayo iti nakaskasdaaw a kinadayag ti nailangitan a pamilia ni Jehova!

“Pilid, Umabantekayo!”

13, 14. (a) Sigun ken Ezekiel, ania ti itsura dagiti pilid a nakitana? (b) Apay a maitutop laeng nga adda pilid ti karuahe ni Jehova?

13 Idi damo, nagpokus ni Ezekiel iti uppat a kerubin, ket iti Kapitulo 4 daytoy a libro, makitatayonto kadagita a parsua ken iti naisangsangayan a langada dagiti masursurotayo maipapan ken Jehova. Nupay kasta, nakakita ni Ezekiel iti uppat a pilid iti abay dagita a kerubin, a nalawag nga adda iti uppat a direksion, a kasla dakkel a kuadrado. (Basaen ti Ezekiel 1:16-18.) Kasla krisolito dagita, maysa a napateg a bato a mabalin a kasla nalitnaw a kristal a duyaw wenno dumuyaw a berde ti kolorna. Naraniag daytoy a napintas a bato.

 14 Iti sirmata ni Ezekiel, naipaganetget dagiti pilid ti karuahe. Karkarna a kombinasion, di ngamin? Trono nga adda pilidna! Mabalin a mapanunottayo a ti trono ket nakapuesto iti maymaysa a lugar ken natural laeng a kasta ta limitado laeng ti impluensia dagiti agturay ditoy daga. Ngem naiduma unay ti turay ni Jehova iti aniaman a turay ti tao. Kas maammuanen ni Ezekiel, awan ti limitasion ti nagdakkel a pannakabalin ni Jehova. (Neh. 9:6) Kinaagpaysuanna, dumanon iti sadinoman ti autoridad daytoy a Kangatuan nga Agturay!

15. Ania ti napaliiw ni Ezekiel a pakabuklan ken kadakkel dagiti pilid?

15 Nasdaaw ni Ezekiel iti kadakkel dagiti pilid. Insuratna: “Nakataytayag dagiti basikawda isu a makapasiddaaw.” Mabalin a mapanunottayo ni Ezekiel a nakatangad a mangkitkita kadagiti nagdadakkel a nakaranraniag a basikaw, wenno rim, iti nalawa a tangatang. Innayonna daytoy a makapainteres a detalye: “Napno iti mata ti intero nga aglikmut dagiti basikawda nga uppat [a pilid].” Ngem nalabit ti kangrunaan a makapainteres ket ti naidumduma a porma dagiti pilid. Inlawlawagna: “Ti langa ken pakabuklanda ket kasla iti pilid nga adda iti uneg ti sabali a pilid.” Ania ti kayatna a sawen?

16, 17. (a) Ania ti kaipapananna a ti karuahe ket addaan kadagiti pilid iti uneg dagiti pilid? (b) Ania ti ipakita dagiti pilid maipapan iti kinalaka a maiturong ti lugan ni Jehova?

16 Nalawag a ti tunggal pilid a nakita ni Ezekiel ket kasla dua a pilid a nagtipon ken nagkinnuros ngem maymaysa ti pagpulpuligosanda. Dayta ti mangilawlawag iti maaramidan dagita a pilid kas iti insurat ni Ezekiel: “No umakarda, makapanda iti aniaman kadagiti uppat a direksion a saanda nga agsikko.” Ania ti ipamatmat dagitoy a pilid maipapan iti nailangitan a lugan a nakita ni Ezekiel?

17 Naglawa ti madalanan dagiti dadakkel a pilid a kas kadagita uray maminsan la a rikus. Kinapudnona, sigun iti sirmata, aggaraw ti lugan a kas iti kapartak ti kimat! (Ezek. 1:14) Naidumduma met ti pilid ta aggaraw iti uppat a direksion a mangipakita a nalaka a maiturong, nga arapaap laeng nga aramiden dagiti tattao nga inheniero. Makapagbaliw ti direksion daytoy a lugan uray saan nga agmenor wenno agsikko! Ngem saan a basta agbaliw iti direksion. Ti adu a mata kadagiti basikaw ket nalawag a mangted iti ideya a talaga a makitkita ti lugan ti amin nga aglawlawna, iti amin a direksion.

Nakaskasdaaw ti kadakkel dagiti pilid ken nagpartak ti panaggunayda (Kitaen ti parapo 17)

18. Ania ti masursurotayo iti nakaskasdaaw a kadakkel dagiti pilid ken ti nagadu a mata?

18 Ania ngarud ti insuro ni Jehova ken Ezekiel, ken iti amin a matalek a tattao, maipapan iti nailangitan a paset ti organisasionna? Usigentayo dagiti nakitatayon. Nadayag ken nakaskasdaaw dayta, kas ipakita ti naraniag a material dagiti pilid ken ti kadakkelda. Makitkitana ti amin, kas ipakita ti nagadu a mata kadagiti pilid. Makitkita ni Jehova ti amin a banag. (Prov. 15:3; Jer. 23:24) Minilion met ti agserserbi nga anghelna a mabalin nga ibaonna iti sadinoman a paset ti uniberso, ket kabaelanda nga ammuen a  naimbag ti bambanag sada ireport iti Kangatuan nga Agturay kadakuada.​—Basaen ti Hebreo 1:13, 14.

Ipakita ti disenio dagiti pilid a naglaka a maiturong (Kitaen ti parapo 17, 19)

19. Ania ti isuro kadatayo ti kapartak ken kinalaka a maiturong ti karuahe ni Jehova maipapan kenkuana ken iti nailangitan a paset ti organisasionna?

19 Naammuantayo met a nakaparpartak ken nalaka a maiturong ti karuahe. Talaga a naiduma ti nailangitan a paset ti organisasion ni Jehova no ikompara kadagiti gobierno, institusion, ken organisasion ti tao! Dida ammo no kasano a solbaren dagiti problema ti lubong ken dida kabaelan ti makibagay kadagiti agbalbaliw a kasasaad isu a mapaay ken madadaeldanto. Ngem ti karuahe ni Jehova ket naan-anay a mangiladawan a rasonable ken mannakibagay ti Dios a mangkonkontrol iti dayta. Kas ipalagip ti naganna, makapagbalin iti aniaman a kasapulan a pagbalinanna tapno matungpal ti panggepna. (Ex. 3:13, 14) Kas pagarigan, dagus a makapagbalin a nabileg a Mannakigubat a lumaban para iti ilina ngem dagus met a makapagbalin a naasi a Manangpakawan kadagiti basol a mangagas ken mangpaimbag uray kadagidiay kalaladingitan kadagiti agbabbabawi a managbasol.​—Sal. 30:5; Isa. 66:13.

20. Apay a rumbeng a pagsiddaawantayo ti karuahe ni Jehova?

20 Iti daytoy pay la a paset ti sirmata ni Ezekiel, mabalin a maisaludsodtayon iti bagitayo, ‘Talaga kadi a masdaawak iti karuahe ni Jehova?’ Masapul a laglagipentayo a ti karuahe iladawanna ti agpaypayso a mapaspasamak ita. Ditay koma pulos panunoten a saan a makitkita ni Jehova, ti Anakna, ken ti amin nga anghelna dagiti problema a pakaup-upayantayo. Ditay koma met agdanag a maladaw ti Dios a mangted kadagiti kasapulantayo wenno saan a kabaelan ti organisasionna ti makibagay kadagiti tumaud a situasion iti agbaliwbaliw a lubong. Nasayaat a laglagipentayo nga aktibo ken umab-abante ti organisasion ni Jehova. Kinapudnona, nangngeg ni Ezekiel ti napigsa a timek idiay langit: “Pilid, umabantekayo!”​—nalawag a bilin tapno aggaraw dagiti pilid. (Ezek. 10:13) Saan aya a nakaskasdaaw a panunoten ti panangiturong ni Jehova iti organisasionna? Ngem ni Jehova a mismo ti kangrunaan a pagsiddaawantayo.

Daydiay Mangkonkontrol

21, 22. Ilawlawagyo no ania ti mangtengtengngel kadagiti paset ti karuahe.

21 Naiturong ti atension ni Ezekiel iti ngato dagiti pilid a nakakitaanna iti “kasla kristal a suelo a sumilapsilap a kas iti yelo.” (Ezek. 1:22) Iti ngato dagiti kerubin, nakalawlawa ti tangatang a sumilsilap gapu iti naraniag a dayagna. Ngem no maipapan iti daytoy a lugan, mabalin nga adu ti maisaludsod ti agbasbasa a makaammo iti panagandar dagiti makina. Kas pagarigan: ‘Ania ti mangtengtengngel iti plataporma iti ngato dagiti pilid? Kasano koma nga aggunay dagiti pilid nga awan ti ehe wenno axle a mamagkonektar kadagita?’ Laglagipenyo a saan nga apektado kadagiti linteg iti nakaparsuaan ti panaggaraw daytoy a lugan, ta simboliko  dayta a mangiladawan iti agpayso a kasasaad idiay langit. Panunotenyo met dagitoy a napateg a sasao: “Ti espiritu a mangtigtignay kadagiti sibibiag a parsua ket adda met kadagiti pilid.” (Ezek. 1:20, 21) Ania nga espiritu ti agtigtignay kadagiti kerubin ken pilid?

22 Sigurado a ti nasantuan nga espiritu ni Jehova, ti kabilgan a puersa iti uniberso. Dayta nga aktibo a puersa ti mangtengtengngel iti intero a lugan, mangpapaandar, ken mangiturturong iti naannayas ken sangsangkamaysa a panaggarawna. Panunotentayo dagita bayat a kitaen ni Ezekiel Daydiay mangkonkontrol iti karuahe.

Narigatan ni Ezekiel a nangbirok iti sasao a makailadawan iti nakaskasdaaw a nakitana

23. Ania a kita ti sasao ti inkagumaan ni Ezekiel nga usaren tapno mailadawanna ni Jehova, ken apay?

23 Basaen ti Ezekiel 1:26-28. Iti panangiladawan ni Ezekiel iti daytoy a sirmata, masansan a nagusar iti sasao a kas iti “kalanglanga,” “kasla,” ken “kas iti.” Ngem kadagitoy a bersikulo, namin-adu nga inusarna dagita. Kasla narigatan a nangbirok iti sasao a makailadawan iti nakaskasdaaw a nakitana. Nakakita iti “kasla safiro a bato, a kalanglanga ti maysa a trono.” Mailadawanmo kadi iti panunotmo ti trono a natikap manipud iti maysa a dakkel ken nakaas-asul a safiro? Ket adda Persona a nakatugaw iti dayta. Ti langana ket “kasla tao a nakatugaw iti trono.”

24, 25. (a) Ania ti ipalagip kadatayo ti bullalayaw iti aglikmut ti trono ni Jehova? (b) No dadduma, ania ti epekto kadagiti matalek a tattao dagiti kasta a sirmata?

 24 Ti nadayag a langa ti persona ket aganninaw laeng, ta isilsilnag ni Jehova ti naraniag a dayagna manipud iti siketna nga agpababa ken manipud iti siketna nga agpangato. Mabalin a mapanunotyo a nasisirap ti propeta isu a masapul a lingdanna dagiti matana bayat a kumitkita iti nadayag a langa. Kamaudiananna, nakita ni Ezekiel ti naisangsangayan a paset ti sirmata: “Nakaranraniag ti intero nga aglikmutna a kas iti bullalayaw iti ulep iti aldaw nga agtudtudo.” Saan kadi a maragsakanka no makakitaka iti bullalayaw? Ipalagip dayta ti kinadayag ti Namarsua kadatayo! Dayta nga adu ti kolorna ken natalinaay nga arko iti tangatang ipalagipna met laeng ti tulag ni Jehova maipapan iti talna kalpasan ti Layus. (Gen. 9:11-16) Nupay nabileg ti Mannakabalin-amin, isu ket Dios ti talna. (Heb. 13:20) Agar-ari ti talna iti pusona ket isaknapna dayta iti amin a matalek nga agdaydayaw kenkuana.

Ti naraniag a bullalayaw iti aglikmut ti trono ni Jehova ipalagipna nga agserserbitayo iti Dios ti talna (Kitaen ti parapo 24)

25 Ania ti epekto ken Ezekiel ti pannakakitana iti nailadawan a kinadayag ni Jehova a Dios? Insuratna ti napasamak: “Idi nakitak dayta, nagrukobak.” Nagpakleb ni Ezekiel gapu iti napalalo a siddaaw ken panagbutengna iti Dios. Kasta met laeng ti reaksion ti dadduma a propeta idi makaawatda kadagiti sirmata manipud ken Jehova; sigurado a nasdaawda unay ken natignayda nga agpakumbaba. (Isa. 6:1-5; Dan. 10:8, 9; Apoc. 1:12-17) Ngem kalpasanna, ad-adda a bimmilegda iti impakaammo kadakuada ni Jehova. Sigurado a kasta met ni Ezekiel. Ania koma ngarud ti epektona kadatayo no basaentayo dagiti kasta a salaysay iti Biblia?

26. Kasano a napabileg ni Ezekiel iti nasirmatana?

26 No maburiboran idi ni Ezekiel gapu ta agduadua wenno madanagan iti kasasaad ti ili ti Dios idiay Babilonia, napabileg la ketdi iti dayta a sirmata. Nalawag a saan a napateg no sadino ti ayan ti matalek nga ili ti Dios, idiay man Jerusalem wenno Babilonia wenno iti sadinoman. Sigurado a madanon latta ida ti nadayag a karuahe ni Jehova! Adda kadi aniaman a puersa ni Satanas a makabael a bumusor iti Dios a mangkonkontrol iti kasta a nadayag a nailangitan nga organisasion? (Basaen ti Salmo 118:6.) Nakita met ni Ezekiel a ti nailangitan a lugan ket saan nga adayo iti sangatauan. Dagiti pilidna ket simmagid pay ketdi iti daga! (Ezek. 1:19) Isu nga interesado unay ni Jehova kadagiti matalek a tattaona a naipanaw iti dagada. Kanayon a madanon ida ti naayat a panangaywan ti Amada!

Ti Karuahe ken Sika

27. Ania ti kaipapanan kadatayo ita ti nasirmata ni Ezekiel?

27 Adda kadi kaipapanan kadatayo ita ti sirmata ni Ezekiel? Adda! Laglagipentayo a pakpakaruen ni Satanas dagiti irarautna iti nadalus a panagdaydayaw ken Jehova. Kayatnatayo a kombinsiren nga agmaymaysatayo, adayotayo, ken dinatayo madanon ti  nailangitan nga Amatayo ken ti organisasionna. Diyo pulos ipalubos nga apektaran dagita a kinaulbod ti isip ken pusoyo! (Sal. 139:7-12) Kas ken Ezekiel, adu ti rasontayo nga agsiddaaw. Mabalin a saantayo a maparukob a kas iti inaramidna. Ngem ditay kadi masdaaw ken agamanga iti bileg, kapartak, kinalaka a maiturong, kinamannakibagay, ken kasta unay a kinadayag ti nailangitan a paset ti organisasion ni Jehova iti intero nga uniberso?

28, 29. Ania ti mangipakita nga umab-abante ti karuahe ni Jehova bayat ti napalabas a 100 a tawen?

28 Laglagipentayo met nga adda naindagaan a paset ti organisasion ni Jehova. Agpayso a ti naindagaan a paset ket buklen ti imperpekto a tattao. Ngem panunotenyo dagiti naaramidanen ni Jehova ditoy daga! Iti intero a lubong, tinulongan ni Jehova dagiti nanumo a tattao a mangaramid kadagiti saanda a pulos kabaelan a bukbukodda. (Juan 14:12) Ti laengen panangbasa iti libro nga Agturturayen ti Pagarian ti Dios! ket mangipalagipen kadatayo iti nakaskasdaaw a kinasaknap ti trabaho a panangasaba iti napalabas a 100 a tawen. Malagiptayo met ti dakkel a rimmang-ayan ti organisasion ni Jehova iti panangisurona kadagiti pudno a Kristiano, iti panangabak kadagiti kaso iti korte, ken uray iti panangusar iti kabaruan a teknolohia tapno maitungpal ti pagayatan ti Dios!

29 No panunotentayo ti amin a naaramiden tapno maisubli ti nadalus a panagdaydayaw bayat ti maudi nga al-aldaw daytoy dakes a sistema ti bambanag, nalawlawag a maawatantayo nga umab-abante ti karuahe ni Jehova. Anian a nakaskasdaaw a pribilehio ti agbalin a paset daytoy nga organisasion ken agserbi iti Kangatuan nga Agturay!​—Sal. 84:10.

Kanayon nga umab-abante ti naindagaan a paset ti organisasion ni Jehova (Kitaen ti parapo 28, 29)

30. Ania ti usigentayo iti sumaruno a kapitulo?

30 Ngem adu pay ti isuro kadatayo ti sirmata ni Ezekiel. Iti sumaruno a kapitulo, kitaentayo a naimbag ti uppat a naisangsangayan a “sibibiag a parsua,” wenno kerubin. Ania ti maisuroda kadatayo maipapan ken Jehova a Diostayo, ti nadayag a Kangatuan nga Agturay?

^ par. 1 Nakakita ni Ezekiel iti elektrum​—napaglaok a balitok ken pirak.

^ par. 5 Dayta ti eksakto a kaadayo, ngem dandani doble ti kaadayo ti mabalin a pinagna dagiti naipanaw a Judio.