Mapan iti linaonna

Mapan iti listaan dagiti linaonna

 KAHON 10C

Tulong Tapno Makatakdertayo Manen

Tulong Tapno Makatakdertayo Manen

MAPABILEGTAYO no panunotentayo ti masursurotayo iti daytoy naisangsangayan a sirmata a naisurat iti Ezekiel 37:1-14, a mayaplikartayo iti mismo a kasasaadtayo. Ania dayta?

No dadduma, mariribukantayo unay kadagiti problema ken pannubok a dumteng isu nga agkapuytayo ket marigatantayo a mangsango iti biag. Ngem kadagita a tiempo, mapabilegtayo no panunotentayo ti naglawag a nakita ni Ezekiel iti sirmata maipapan iti pannakaisubli. Apay? Masursurotayo iti daytoy a padto a ti Dios nga adda pannakabalinna a mangpabiag kadagiti natay a tulang ket sigurado a maipaayannatayo iti bileg a kasapulantayo tapno mapagballigiantayo dagiti lapped—uray dagiti panagkunatayo ket ditay kabaelan kas tattao.—Basaen ti Salmo 18:29; Fil. 4:13.

Mabalin a maipalagip kadatayo a ginasut a tawen sakbay ti panawen ni Ezekiel, imbaga ni propeta Moises a saan la a nabileg ni Jehova no di ket kayatna nga usaren ti bilegna para iti ilina. Insurat ni Moises: “Ti Dios ket pagkamangan manipud pay idi un-unana, sarapaennaka ti agnanayon a takiagna.” (Deut. 33:27) Wen, masiguradotayo a no agpatulongtayo ken Jehova kadagiti tiempo ti rigat, isarapa ni Jehova ti takiagna kadatayo, in-inayadennatayo a bangonen, ken tulongannatayo a makatakder manen.—Ezek. 37:10.