Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Biblia—Ania ti Mensahena?

 SEKSION 11

Dagiti Naipaltiing a Makaliwliwa ken Makaisuro a Kanta

Dagiti Naipaltiing a Makaliwliwa ken Makaisuro a Kanta

Ni David ken ti dadduma nangputarda kadagiti kanta ti panagdayaw. Dagiti liriko ti 150 kadagita a kanta ket nairekord iti libro a Salmo

TI KADAKKELAN a libro iti Biblia ket buklen dagiti sagrado a kanta. Naisurat ti intero a libro iti las-ud ti agarup 1,000 a tawen. Mabasa iti libro a Salmo ti dadduma kadagiti naisurat a kasayaatan ken makagutugot unay nga ebkas ti pammati nga awan pay kaaspingda. Nayebkas ditoy ti nadumaduma a rikna ti tao manipud iti panagrag-o, panagdayaw, ken panagyaman agingga iti panagleddaang, panagladingit, ken panagbabawi. Nabatad a dagiti salmista agtalekda iti Dios ken addaanda iti nasinged a relasion Kenkuana. Usigentayo ti dadduma a topiko dagitoy a kanta.

Ni Jehova ti maikari a Soberano, a rumbeng a pagdayawan. Iti Salmo 83:18, mabasatayo: “Sika, nga agnagan Jehova, sika laeng ti Kangatuan iti intero a daga.” Iti dadduma a salmo, naidayaw ni Jehova gapu kadagiti pinarsuana a kas iti namituen a langlangit, dagiti pagsidsiddaawan a biag ditoy daga, ken ti nakaskasdaaw a bagi ti tao. (Salmo 8, 19, 139, 148) Adda met dagiti salmo a mangipadayag ken Jehova kas Dios nga agtignay tapno ispalen ken salaknibanna dagiti nasungdo kenkuana. (Salmo 18, 97, 138) Dadduma met ti mangitan-ok kenkuana kas Dios ti kinahustisia, a mangyeg iti bang-ar kadagidiay mairurrurumen ken pannusa kadagiti nadangkes.—Salmo 11, 68, 146.

Tulongan ken liwliwaen ni Jehova dagiti agayat kenkuana. Nalabit ti maika-23 a salmo ti kalatakan. Ditoy, ni David inladawanna ni Jehova kas naayat a Pastor, a mangidalan, mangsalaknib, ken mangaywan iti karnerona. Ti Salmo 65:2 ipalagipna kadagiti agdaydayaw iti Dios a ni Jehova ti “Managdengngeg iti kararag.” Adu a nakaaramid iti nadagsen a basol ti naliwliwa unay iti Salmo 39 ken 51. Kadagita a sipapasnek nga inyebkas ni David ti panagbabawina kadagiti nadagsen a biddutna ken ti pammatina iti panangpakawan ni Jehova. Ti Salmo 55:22 ibalakadna ti panagtalek ken Jehova ken ti panangyallatiw Kenkuana iti amin a pakadagsenan.

Balbaliwan ni Jehova ti lubong babaen iti Pagarian ti Mesias. Adu a sasao iti Salmo ti nalawag nga agaplikar iti Mesias, ti naipadto nga Ari. Impadto ti Salmo 2 a daytoy nga Agturay dadaelennanto dagiti nadangkes a nasion a bumusbusor kenkuana. Ipalgak ti Salmo 72 a daytoy nga Ari pagpatinggaennanto ti bisin, kinaawan hustisia, ken panangirurumen. Sigun iti Salmo 46:9, babaen iti Pagarian ti Mesias, ti Dios pukawennanto ti gubat ken amin nga igam. Iti Salmo 37, mabasatayo nga awanton dagiti nadangkes, idinto ta dagiti nalinteg agbiagdanto nga agnanayon ditoy daga ket tagiragsakenda ti sangalubongan a talna ken panagtutunos.

—Naibasar iti libro a Salmo.