Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Biblia—Ania ti Mensahena?

 SEKSION 19

Impadto ni Jesus Dagiti Pasamak a Mangapektar iti Intero a Lubong

Impadto ni Jesus Dagiti Pasamak a Mangapektar iti Intero a Lubong

Imbinsabinsa ni Jesus dagiti pasamak a mangtanda iti panagarina ken iti panungpalan daytoy a sistema ti bambanag

ITI Bantay dagiti Olibo, a sadiay matannawagan ti nangayed a buya ti Jerusalem ken ti templona, uppat kadagiti apostol ni Jesus ti nagsaludsod kenkuana maipapan iti sumagmamano a banag a naibagana kadakuada. Kaibagbaga ni Jesus a madadaelto ti templo ti Jerusalem. Ken nadakamatna idin kadakuada ti maipapan iti “panungpalan ti sistema ti bambanag.” (Mateo 13:40, 49) Ita, insaludsod dagiti apostol: “Anianto ti pagilasinan ti kaaddam ken ti panungpalan ti sistema ti bambanag?”—Mateo 24:3.

Iti sungbatna, imbaga ni Jesus no anianto ti mapasamak sakbay a madadael ti Jerusalem. Ngem saan laeng a dayta ti kaipapanan ti sasaona. Ti padtona ket addanto dakdakkel a kaitungpalanna iti intero a lubong. Impadto ni Jesus ti maipapan iti ragup dagiti pasamak ken kasasaad iti lubong a mangbukel iti maysa a pagilasinan. Dayta a pagilasinan ipakitana kadagiti tattao ditoy daga a nangrugin ti kaadda ni Jesus kas Ari idiay langit. Iti sabali a pannao, ipakita ti pagilasinan a ni Jehova a Dios insaadnan ni Jesus kas Ari iti nabayagen a naikari a Mesianiko a Pagarian. Ti pagilasinan kaipapananna a ti Pagarian asidegen nga ikkatenna ti kinadakes ken iyegna ti pudpudno a talna iti sangatauan. No kasta, dagiti banag nga impadto ni Jesus ti mangtanda kadagiti maudi nga aldaw daytoy agdama a daan a sistema—a pakaibilangan ti relihion, politika, ken kagimongan—ken ti pangrugian ti baro a sistema.

Iti panangilawlawagna iti mapasamak ditoy daga bayat ti kaaddana kas Ari idiay langit, kinuna ni Jesus nga addanto sangalubongan a gubgubat, kinakirang ti taraon, napipigsa a ginggined, ken nasaknap a sakit. Kumaronto ti kinakillo. Dagiti pudno nga adalan ni Jesus ikasabadanto ti naimbag a damag ti Pagarian ti Dios iti intero a daga. Agpatingganto amin dagitoy iti “dakkel a rigat” a di pay pulos napasamak.—Mateo 24:21.

Kasanonto a maammuan dagiti pasurot ni Jesus nga asidegen dayta a rigat? “Agsursurokayo manipud iti kayo a higos,” kinuna ni Jesus. (Mateo 24:32) No agsaringiten dagiti sanga ti higos, nabatad dayta a tanda nga asidegen ti kalgaw. Umasping iti dayta, no mapasamak iti maymaysa a tiempo ti amin a banag nga impadto ni Jesus, nalawag dayta a tanda nga asidegen ti panungpalan. Ti laeng Ama ti makaammo iti eksakto nga aldaw ken oras a panangrugi ti dakkel a rigat. Gapuna, indagadag ni Jesus kadagiti adalanna: “Agtultuloykayo a siririing, ta saanyo nga ammo no kaano ti naituding a tiempo.”—Marcos 13:33.

—Naibasar iti Mateo kapitulo 24 ken 25; Marcos kapitulo 13; Lucas kapitulo 21.

^ par. 14 Para iti kanayonan a pannakailawlawag ti padto ni Jesus, kitaem ti kapitulo 9 iti libro nga Ania a Talaga ti Isursuro ti Biblia? nga impablaak dagiti Saksi ni Jehova.

Ammuem ti Ad-adu Pay

Agbibiagtayo Kadin Kadagiti “Maudi nga Aldaw”?

Ammuem no kasano a dagiti aramid ken kababalin dagiti tattao paneknekanna nga agbibiagtayo kadagiti “maudi nga aldaw” a naipadto iti Biblia.

Dagiti Maudi nga Aldaw—Umiso a Padto ti Biblia

Adda kadi naisangsangayan a kaipapanan ti agdama a kasasaad ti lubong? Ammuem ti 7 a padto a mangipakita a naidumduma ti tiempo a pagbibiagantayo.