Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Biblia—Ania ti Mensahena?

 SEKSION 20

Napapatay ni Jesu-Kristo

Napapatay ni Jesu-Kristo

Inyusuat ni Jesus ti maysa a baro a rambak; naliputan ken nailansa

KALPASAN ti tallo ket kagudua a tawen a panangasaba ken panangisurona, ammo ni Jesus a dandanin agpatingga ti biagna ditoy daga. Nagkukumplot dagiti panguluen ti relihion a mangpapatay kenkuana, ngem maamakda a tumaud ti riribuk kadagiti tattao a mamati nga isu ket maysa a mammadto. Kabayatanna, tinignay ni Satanas ti maysa kadagiti 12 nga apostol ni Jesus—ni Judas Iscariote—tapno liputanna ni Jesus. Dagiti panguluen ti relihion intukonda ken Judas ti 30 a kapisi ti pirak tapno liputanna ni Jesus.

Iti maudi a rabiina ditoy daga, inummong ni Jesus dagiti apostolna tapno rambakanda ti Paskua. Kalpasan ti panangpapanawna ken Judas, inyussuatna ti panangrambak iti Pangrabii ti Apo. Nangala iti maysa a tinapay, nagkararag, sana impasa ti tinapay kadagiti nabati a 11 nga apostolna. Kinunana: “Daytoy kaipapananna ti bagik a maited maigapu kadakayo. Itultuloyyo nga aramiden daytoy kas panglaglagip kaniak.” Kasta met ti inaramidna iti kopa ti arak, a kinunana: “Daytoy a kopa kaipapananna ti baro a tulag babaen ti bileg ti darak.”—Lucas 22:19, 20.

Adu ti nasken nga ibaga ni Jesus kadagiti adalanna iti dayta a rabii. Nangted kadakuada iti baro a bilin—nga ipakitada ti di agimbubukodan nga ayat iti maysa ken maysa. Kinunana: “Babaen iti daytoy maammuanto ti isuamin a dakayo dagiti adalak, no addaankayo iti ayat iti maysa ken maysa.” (Juan 13:34, 35) Indagadagna a saanda a mariribukan kadagiti nakaam-amak a kasasaad nga asidegen mapasamak. Sipapasnek a nagkararag ni Jesus agpaay kadakuada. Nagkankantada ken napanda iti minuyongan ti Getsemani bayat ti rabii.

Iti minuyongan, nagparintumeng ni Jesus ket sipapasnek a nagkararag. Di nagbayag, simmangpeten ti bunggoy dagiti armado a soldado, papadi, ken dadduma pay a mangaresto kenkuana. Ni Judas impabigbigna ni Jesus babaen ti panangagekna kenkuana. Nagtalaw dagiti apostol bayat a dagiti soldado pinarautanda ni Jesus.

Iti saklang ti kangatuan a pangukoman dagiti Judio, impabigbig ni Jesus ti bagina kas ti Anak ti Dios. Imbilang ti korte a nakabasol ni Jesus iti panagtabbaaw isu a maikari iti ipapatay. Naipan ngarud iti Romano a Gobernador a ni Poncio Pilato. Nupay awan ti nakita ni Pilato a nagbasolan ni Jesus, isu ket inyawatna iti bunggoy a mangipukpukkaw iti pannakapapatayna.

Dagiti soldado a Romano impanda ni Jesus idiay Golgotha, ket sadiay nga inlansada iti istaka. Simimilagro a simmipnget nupay katengngaan ti aldaw. Idi mumalemen, natay ni Jesus, ket nagginggined iti napigsa. Naitanem ti bangkayna iti uneg ti nakungkongan a bato. Kabigatanna, dagiti papadi sinerraanda ti tanem ken nangdutokda iti mangguardia iti dayta. Agtalinaed ngata ni Jesus iti dayta a tanem? Saan. Dandanin mapasamak ti awan pay kaaspingna a milagro.

—Naibasar iti Mateo kapitulo 26 ken 27; Marcos kapitulo 14 ken 15; Lucas kapitulo 22 ken 23; Juan kapitulo 12 agingga iti 19.

^ par. 15 Para iti pannakailawlawag ti kinapateg ti ipapatay ni Jesus kas maysa a sakripisio, kitaem ti kapitulo 5 iti libro nga Ania a Talaga ti Isursuro ti Biblia?

Ammuem ti Ad-adu Pay

Ti Subbot—Kapatgan a Sagut ti Dios

Ania ti subbot? Kasanoka a mabenepisiaran iti daytoy?

Nangipaay ni Jehova iti “Subbot a Kasukat Dagiti Adu”

Matulongannaka ti simple ngem napateg a pannursuro nga agbalin a nasinged iti Dios.