Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Biblia—Ania ti Mensahena?

 SEKSION 21

Napagungar ni Jesus!

Napagungar ni Jesus!

Nagparang ni Jesus kadagiti pasurotna tapno isuro ken paregtaenna ida

ITI maikatlo nga aldaw kalpasan ti ipapatay ni Jesus, nakita ti dadduma nga adalanna a babbai a naikkaten ti bato a nangserra iti tanem ken awanen nagyan ti tanem!

Nagparang ti dua nga anghel. “Sapsapulenyo ni Jesus a Nazareno,” kinuna ti maysa kadakuada. “Isu naibangonen.” (Marcos 16:6) Dagus a napan impadamag dagiti babbai kadagiti apostol. Nasabetda ni Jesus iti dalan ket kinunana: “Dikay agbuteng! Inkayo, ipadamagyo iti kakabsatko, tapno mapanda idiay Galilea; ket sadiay makitadakto.”—Mateo 28:10.

Kalpasanna, dua nga adalan ti agbambaniaga iti dayta met la nga aldaw manipud Jerusalem nga agturong iti purok ti Emmaus. Kimmuyog kadakuada ti maysa a ganggannaet ket inimtuodna no ania ti pagsarsaritaanda. Kinapudnona, ti napagungaren a ni Jesus daydiay nagparang iti langa a dida nabigbig idi damo. Malmaldayda a simmungbat a ni Jesus ti pagsarsaritaanda. Ngem rinugian ti ganggannaet nga ilawlawag dagiti bambanag a nailanad iti Kasuratan mainaig iti Mesias. Wen, tinungpal ni Jesus ti amin a naipadto maipapan iti Mesias agingga iti kabassitan a detalye dayta. * Idi nabigbig dagiti adalan a daydiay ganggannaet isu ni Jesus, a napagungaren kas maysa nga espiritu, nagpukawen.

Nagsubli a dagus idiay Jerusalem ti dua nga adalan ket nasarakanda nga agtataripnong dagiti apostol sadiay iti nabalunetan a siled. Idi agipadpadamag dagiti dua, nagparang ni Jesus. Dandani saan a mamati dagiti nasdaaw a pasurotna! “Apay a rumsua dagiti panagduadua iti puspusoyo?” inimtuod ni Jesus. “Adda a naisurat a ti Kristo agsagaba ken bumangon manipud kadagiti natay iti maikatlo nga aldaw.”—Lucas 24:38, 46.

Iti 40 nga aldaw kalpasan ti panagungarna, nagparang ni Jesus kadagiti adalanna iti nagduduma a gundaway. Naminsan, nagparang iti nasurok a 500! Mabalin nga iti daytoy a gundaway, inikkanna ida iti nadagsen nga annongen: “Inkayo . . . ket mangaramidkayo iti ad-adalan kadagiti tattao iti amin a nasion, . . . nga isuroyo kadakuada a tungpalenda ti amin a bambanag nga imbilinko kadakayo. Ket, adtoy! addaak kadakayo iti amin nga al-aldaw agingga iti panungpalan ti sistema ti bambanag.”—Mateo 28:19, 20.

Iti naudi a pannakitaripnongna kadagiti 11 a matalek nga apostolna, inkari ni Jesus: “Umawatkayto iti pannakabalin inton dumteng kadakayo ti nasantuan nga espiritu, ket dakayto dagiti saksik . . . agingga iti kaadaywan a paset ti daga.” (Aramid 1:8) Kalpasanna, nagpangaton ni Jesus, ket nalingdan iti ulep bayat ti panagsublina sadi langit.

—Naibasar iti Mateo kapitulo 28; Marcos kapitulo 16; Lucas kapitulo 24; Juan kapitulo 20 ken 21; 1 Corinto 15:5, 6.

^ par. 6 Para iti pagarigan dagiti padto a natungpal ken Jesus kas Mesias, kitaem ti Seksion 14, Seksion 15, ken Seksion 16 daytoy a broshur, ken ti artikulo a “Ni Jesu-Kristo—Ti Naikari a Mesias” iti apendise ti libro nga Ania a Talaga ti Isursuro ti Biblia?

Ammuem ti Ad-adu Pay

Ti Panagungar ni Jesus Kaipapananna ti Biag!

Agasem biag nga agnanayon nga awan ut-ot, panagsagaba, wenno ladingit.