Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Biblia—Ania ti Mensahena?

 SEKSION 22

Situtured a Nangasaba Dagiti Apostol

Situtured a Nangasaba Dagiti Apostol

Napartak a rimmang-ay ti kongregasion Kristiano iti laksid ti pannakaidadanes

SANGAPULO nga aldaw kalpasan ti panagsubli ni Jesus idiay langit, agarup 120 nga adalan ti nagtataripnong iti maysa a balay idiay Jerusalem bayat ti panangrambak dagiti Judio iti Piesta ti Pentecostes, 33 K.P. Pagammuan ta napno ti balay iti ungor a kasla uni ti bumanesbes a pul-oy. Simimilagro a nakapagsao dagiti adalan kadagiti lenguahe a dida idi ammo. Kasano a napasamak dayta a karkarna a pagteng? Inikkan ida ti Dios iti nasantuan nga espiritu.

Iti ruar, adu ti tattao gapu ta immay nakipiesta dagiti bisita a naggapu iti nagduduma a pagilian. Nasdaawda ta dagiti adalan ni Jesus ket nalaing nga agsao kadagiti lenguaheda. Iti panangilawlawag ni Pedro iti napasamak, tinukoyna ti padto ni propeta Joel a ti Dios ‘iparukpoknanto’ ti espirituna, a mangipaay kadagiti namilagruan a sagut kadagidiay umawat iti dayta. (Joel 2:28, 29) Daytoy a natibker a pammaneknek ti nasantuan nga espiritu imbatadna ti maysa a napateg a panagbalbaliw: Ti anamong ti Dios iti Israel nayallatiwen iti kabbuangay a kongregasion Kristiano. Sipud idin, dagiti mayat nga agserbi iti Dios buyogen ti anamongna masapulen nga agbalinda a pasurot ni Kristo.

Kabayatanna, kimmaro ti panangidadanes, ket dagiti kabusor imbaludda dagiti adalan. Ngem iti rabii, maysa nga anghel ni Jehova ti nanglukat kadagiti ridaw ti pagbaludan ken imbagana kadagiti adalan nga itultuloyda ti mangasaba. Kabigatanna, nangasabada manen. Simrekda iti templo ket rinugianda nga isuro ti naimbag a damag maipapan ken Jesus. Nakapungtot dagiti panguluen ti relihion ket imbilinda nga isardeng dagiti adalan ti mangasaba. Situtured a simmungbat dagiti apostol: “Masapul nga agtulnogkami iti Dios kas agturay imbes a kadagiti tattao.”—Aramid 5:28, 29.

Kimmaro ti panangidadanes. Dadduma a Judio kinunada nga agtabtabbaaw ni adalan nga Esteban ket inuborda agingga a natay. Siaanamong a nagbuya ti maysa nga agtutubo—ni Saulo a taga-Tarso. Kalpasanna, napan idiay Damasco tapno arestuenna ti asinoman a pasurot ni Kristo. Idi agdaldaliasat ni Saulo, adda lawag manipud langit a nagsilnag iti likmutna ket kinuna ti maysa a timek: “Saulo, Saulo, apay nga idaddadanesnak?” Nabulsek ni Saulo gapu iti lawag, ket insaludsodna: “Siasinoka, Apo?” Simmungbat ti timek: “Siak ni Jesus.”—Aramid 9:3-5.

Tallo nga aldaw kalpasanna, imbaon ni Jesus ti adalanna a ni Ananias tapno isublina ti panagkita ni Saulo. Nabautisaran ni Saulo ket situtured a rinugianna ti mangasaba maipapan ken Jesus. Idi agangay, naawaganen ni Saulo iti apostol Pablo ken nagbalin a naregta a kameng ti kongregasion Kristiano.

Idi damo, dagiti laeng Judio ken Samaritano ti kinasabaan dagiti adalan ni Jesus maipapan iti naimbag a damag ti Pagarian ti Dios. Idi agangay, adda anghel a nagparang ken Cornelio, maysa a managbuteng-Dios nga opisial iti buyot ti Roma, ket imbaga ti anghel a paayaban ni Cornelio ni apostol Pedro. Napan ni Pedro agraman dagiti kakaduana, ket kinasabaanda ni Cornelio ken ti sangakabbalayanna. Bayat nga agsasao ni Pedro, immapay ti nasantuan nga espiritu kadagiti manamati a Gentil, ket ti apostol pinaregtana ida nga agpabautisar iti nagan ni Jesus. Dagiti tattao iti amin a nasion naaddaanda metten iti namnama nga agbiag nga agnanayon. Nakasaganan ti kongregasion a mangisaknap iti naimbag a damag.

—Naibasar iti Aramid 1:1–11:21.