Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ti Biblia—Ania ti Mensahena?

 SEKSION 8

Dagiti Israelita Simrekda iti Canaan

Dagiti Israelita Simrekda iti Canaan

Ni Josue indauluanna ti Israel a nangparmek iti Canaan. Ni Jehova inikkanna dagiti ukom iti autoridad tapno maispal ti mairurrurumen nga ilina

SINIGSIGLO sakbay a simrek ti Israel iti Canaan, inkari ni Jehova nga ipaayna dayta a daga kadagiti kaputotan ni Abraham. Idi ni Josue ti mangidadaulo, dandanin tagikuaen dagiti Israelita ti Naikari a Daga.

Inkeddeng idin ti Dios a madadael dagiti Canaanita gapu ta pinunnoda ti daga iti nakababain a seksual nga ar-aramid ken naulpit a panangpapatay. Gapuna, dagiti Israelita masapul a naan-anay a dadaelenda dagiti siudad iti Canaan.

Ngem sakbay a simrek ni Josue iti daga, nangibaon iti dua nga espia nga agsimisim iti siudad ti Jerico ket nagdagusda iti balay ti babai nga agnagan Rahab. Pinadagus ken sinalakniban ni Rahab dagiti espia, nupay ammona nga Israelitada. Adda pammati ni Rahab iti Dios ti Israel, gapu ta nadamagna dagiti panangispal ni Jehova iti ilina. Pinagsapatana dagiti espia nga ispalenda ti sangakabbalayanna.

Kalpasanna, idi simreken dagiti Israelita iti Canaan tapno rautenda ti Jerico, simimilagro a rinebba ni Jehova dagiti pader ti Jerico. Dimmarup ti buyot ni Josue ket dinadaelda ti siudad, ngem inispalda ni Rahab ken ti pamiliana. Kalpasanna, babaen ti nagsasaruno nga iraraut iti innem a tawen, sinakup ni Josue dagiti nalawa a paset ti Naikari a Daga. Nagangayanna, nabingaybingay ti daga kadagiti tribu ti Israel.

Idi dandanin agpatingga ti napaut a panagserbi ni Josue iti Dios, inummongna dagiti tattao. Impalagipna kadakuada ti pannakilangen ni Jehova kadagiti ammada ket pinaregtana ida nga agserbi Kenkuana. Kalpasan ti ipupusay ni Josue ken dagiti nasinged kenkuana, dagiti Israelita nagserbida kadagiti palso a didios imbes a ken Jehova. Iti agarup 300 a tawen, namin-adu a sinalungasing ti nasion dagiti linteg ni Jehova. Bayat dayta a tiempo, impalubos ni Jehova a ti Israel ket irurumen dagiti kabusor a kas kadagiti Filisteo. Ngem idi nagpatulong dagiti Israelita ken Jehova, nangdutok ti Dios kadagiti ukom a mangispal kadakuada. Nagdagup amin dagita iti 12.

Ti panawen dagiti Ukom a naisalaysay iti libro nga Uk-ukom ket nangrugi ken Otniel ken nagpatingga ken Samson, ti kapigsaan pay laeng a tao a nagbiag. Ti kangrunaan a kinapudno a naulit-ulit a naiparangarang iti makapikapik a salaysay iti Uk-ukom a libro ti Biblia ket isu daytoy: Ti panagtulnog ken Jehova mangyeg kadagiti bendision idinto ta didigra ti resulta ti kinasukir.

—Naibasar iti Josue; Uk-ukom; Levitico 18:24, 25.