Mapan iti linaonna

Mapan iti listaan dagiti linaonna

 PASET 6

Apay a Pinarsuanatayo ni Jehova?

Apay a Pinarsuanatayo ni Jehova?

Sinukimat ni Ari Solomon ti saludsod maipapan iti kaipapanan ti biag

ANIA ti kaipapanan kadakayo ti panangam-ammo ken Jehova? Malaksid iti dadduma a banag, kaipapanan dayta ti panangsapul iti sungbat ti saludsod a mamagpanunot iti binilion a tattao: ‘Apay nga addaak ditoy?’ Mabalin a pinampanunotyo met dayta idi. Maysa a masirib nga ari, nga addaan iti kinabaknang a ‘dakdakkel ngem iti amin a sabsabali nga ar-ari’ idi kaaldawanna, ti nangsukimat iti dayta a saludsod mainaig iti kaipapanan ti biag. (2 Cronicas 9:22; Eclesiastes 2:1-13) Solomon ti nagan daytoy nga ari, nga addaan iti nabileg a pannakabalin, adu a kinabaknang, ken awan kaaspingna a kinasirib. Ania ti resulta ti panagsukisokna? “Ti panungpalan ti banag, ti isuamin a nangngeganen, ket: Agbutengka iti pudno a Dios ket salimetmetam dagiti bilinna. Ta daytoy isu ti intero a pagrebbengan ti tao.” (Eclesiastes 12:13) Yantangay ad-adu ti kapadasan ni Solomon ngem iti kaaduan a tattao, maiparbeng laeng a mausig ti natakuatanna.​—Eclesiastes 2:12.

2 Ti panagbuteng iti Dios a dinakamat ni Solomon ket saan a pannakaaliaw iti maysa a karkarna nga espiritu a puersa. Imbes ketdi, daytoy ket umiso a panagbuteng a mapagura ti maysa nga ay-ayaten. No ay-ayatenyo unay ti maysa a tao, sigurado a kayatyo nga ay-ayuen iti amin a kanito ket liklikanyo ti aniaman a banag a mamagladingit kenkuana. Bayat a masursuroyo nga ayaten ni Jehova, kastanto met ti mariknayo kenkuana.

3 Babaen ti panagbasa iti Biblia, maadalyo dagiti pagayatan ken kagura ti Namarsua agraman ti panggepna a nangparsua iti daga. Malaksid iti panangdeskribir ti Biblia ken Jehova kas “ti Nangporma iti daga ken ti Nangaramid iti dayta,” inawaganna met kas “Daydiay sititibker a nangipasdek iti dayta, a saanna a pinarsua a maipaay laeng iti awan kapapay-anna, a nangbukel iti dayta tapno mapagnaedan a mismo.” (Isaias 45:18) Insagana ni Jehova ti daga tapno pagnaedan dagiti tattao, ket isuda ti mangaywan iti daga ken iti amin a parsua nga agnanaed iti dayta. (Genesis 1:28) Ngem dayta laeng kadi  ti panggep ti Dios no apay a pinarsuana dagiti tattao​—tapno agbalinda a para aywan?

Tinagiragsak da Adan ken Eva ti nasinged a relasion iti Dios

4 Saan, adda natantan-ok a panggepna. Nakasingsinged idi ken Jehova ti immuna a tao, ni Adan. Direkta a makasaritana ti Namarsua. Mangngegna ti ibagbaga ti Dios kenkuana ken mayebkasna ti kapanunotanna ken Jehova. (Genesis 1:28-30; 3:8-13, 16-19; Aramid 17:26-28) Addaan ngarud ni Adan ken ti asawana, ni Eva, iti naindaklan a gundaway a mangam-ammo a naimbag ken Jehova ken mangpatanor iti nasingsinged a relasion kenkuana. Makapnek koma ti biagda no inam-ammo ken tinuladda ni Jehova, yantangay isu ket “naragsak a Dios.” (1 Timoteo 1:11) Bilang Dios “a sibabaknang a mangipaay kadatayo iti amin a bambanag a pagragsakantayo,” inkabil ni Jehova ti immuna a tao iti paraiso, a naawagan minuyongan ti Eden, buyogen ti namnama a biag nga agnanayon.​—1 Timoteo 6:17; Genesis 2:8, 9, 16, 17.

Ania ti ipamatmat dagiti baro a takuat maipapan iti selula ti tao?

5 Agnanayon? Mabalin nga ipapanyo a di nakappapati ti biag nga agnanayon. Ngem talaga kadi a di nakappapati dayta? Patien dagiti sientista nga ammoda itan ti gapu no apay a lumakay ti selula. Kada agbingay ti selula, umab-ababa dagiti sumuno a babassit a substansia ti gene a naawagan iti telomere, a nangbalkut kadagiti murdong ti chromosome. Kalpasan ti mamin-50 agingga iti mamin-100 a panagbingay ti selula, kumapuy dagiti telomere, ket kaaduan kadagiti selula ti agsardengen nga agbingay. Nupay kasta, dagiti baro a sientipiko a takuat ipamatmatda a mabalin nga agtultuloy nga agbingay dagiti selula ti tao iti agnanayon babaen ti tulong ti enzyme a maawagan iti telomerase. Nupay daytoy a takuat dina kaipapanan a posible nga ipaay ni Jehova ti biag nga agnanayon babaen iti daytoy nga enzyme, adda banag nga ipasimudaagna: Nakappapati ti biag nga agnanayon!

6 Wen, nakappapati ti salaysay ti Biblia a naparsua ti umuna a pagassawaan tapno agbiagda nga agnanayon. Iti kasta, agnanayon a mapasayaat dagiti tattao ti relasionda ken Jehova. Patanorenda ti nabileg a singgalut iti nailangitan nga Amada, ta naan-anay nga ammoda ti panggepna para kadagiti tattao ditoy daga ken itungpalna dayta. Saan a makauma ti biagda. Adda nagsayaat a gundaway da Adan ken Eva a mangpunno iti daga kadagiti naragsak ken perpekto nga annak. Adda koma makapnek ken makaay-ayo nga obrada iti agnanayon. Pudno a makapnek koma ti biagda!​—Genesis 1:28.