Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ni Jesus—Ti Dalan, ti Kinapudno, ti Biag

 KAPITULO 14

Rinugian ni Jesus ti Agaramid Kadagiti Adalan

Rinugian ni Jesus ti Agaramid Kadagiti Adalan

JUAN 1:29-51

  • KIMMUYOG KEN JESUS DAGITI UMUNA NGA ADALANNA

Kalpasan ti 40 nga aldaw a kaaddana idiay let-ang ken sakbay nga agsubli idiay Galilea, napan ni Jesus ken Juan a nangbautisar idi kenkuana. Bayat nga umas-asideg ni Jesus, intudo ni Juan ken impukkawna kadagiti adda sadiay: “Kitaenyo, ti Kordero ti Dios a mangikkat iti basol ti lubong! Isu ti tuktukoyek idi imbagak: ‘Ti lalaki nga adda iti likudak ket addan iti sanguanak, ta immun-una a naadda ngem siak.’” (Juan 1:29, 30) Nupay in-inauna ni Juan ngem ni Jesus, ammona a nagbiag idin ni Jesus idiay langit kas espiritu a persona.

Sumagmamano a lawas sakbayna, idi immay ni Jesus tapno agpabautisar, saan idi a sigurado ni Juan no ni Jesus ti agbalin a Mesias. “Saanko pay idi nga am-ammo,” kinuna ni Juan, “ngem mangbabautisarak iti danum tapno isu ket maipakaammo iti Israel.”—Juan 1:31.

Intultuloy ni Juan nga ibaga kadagiti dumdumngeg kenkuana ti napasamak idi binautisaranna ni Jesus. Kinunana: “Nakitak ti espiritu manipud langit a bumabbaba a kasla kalapati, ket nagtalinaed kenkuana. Saanko pay idi nga am-ammo, ngem kinuna Daydiay nangibaon kaniak a mangbautisar iti danum: ‘Ti makitam a bumabaan ken pagtalinaedan ti espiritu isu ti mangbautisar iti nasantuan nga espiritu.’ Nakitak dayta ken saksiak nga isu ti Anak ti Dios.”—Juan 1:32-34.

Iti sumaruno nga aldaw, kadua ni Juan ti dua nga adalanna idi immay manen ni Jesus. Kinuna ni Juan: “Kitaenyo, ti Kordero ti Dios!” (Juan 1:36) Gapu iti dayta, kimmuyog ken Jesus ti dua nga adalan ni Juan a Mammautisar. Andres ti nagan ti maysa. Mabalin a ni Juan met ti maysa. Isu ti nangirekord iti daytoy a pasamak. Agparang a kasinsin ni Jesus daytoy a Juan ta isu ket anak ni Salome. Mabalin a kabsat ni Maria ni Salome nga asawa ni Zebedeo.

Idi timmaliaw ni Jesus, nakitana da Andres ken Juan a sumursurot kenkuana. Dinamagna: “Ania ti masapulyo?”

Insaludsodda: “Rabbi, sadino ti pagnanaedam?”

Insungbat ni Jesus: “Umaykayo tapno makitayo.”—Juan 1:37-39.

Agarup alas kuatro idin iti malem, ket nakikadua ken Jesus da Andres ken Juan iti dayta a malem. Maragragsakan ni Andres isu a binirokna ti kabsatna nga agnagan Simon, a naawagan met Pedro, ket kinunana: “Nakitamin ti Mesias.” (Juan 1:41) Ni Andres inkuyogna ni Pedro ken Jesus. Ipakita dagiti sumaruno a pasamak a binirok met ni Juan ti kabsatna a ni Santiago ket inkuyogna ken Jesus. Ngem saan nga inraman ni Juan dayta nga impormasion iti salaysayna.

Kabigatanna, nasarakan ni Jesus ni Felipe a taga-Betsaida. Asideg dayta iti makin-amianan  nga igid ti Baybay ti Galilea ken dayta ti siudad a dimmakkelan da Andres ken Pedro. Inawis ni Jesus ni Felipe: “Agbalinka a pasurotko.”—Juan 1:43.

Nakita met ni Felipe ni Natanael, a maawagan met Bartolome. Kinunana: “Nakitamin daydiay matuktukoy kadagiti insurat ni Moises, iti Linteg, ken kadagiti insurat dagiti Propeta, isu ni Jesus nga anak ni Jose a taga-Nazaret.” Nagduadua ni Natanael, ket kinunana: “Adda kadi asinoman a naimbag nga agtaud iti Nazaret?”

“Umayka tapno makitam,” imparegta ni Felipe kenkuana. Nakita ni Jesus a sumungsungad ni Natanael ket kinunana: “Kitaenyo, adtoy ti pudno nga Israelita nga awanan panangallilaw.”

Dinamag ni Natanael, ‘Apay nga am-ammonak?’

Simmungbat ni Jesus: “Sakbay nga inayabannaka ni Felipe, nakitaka iti sirok ti kayo a higos.”

Nasdaaw ni Natanael ket insungbatna: “Rabbi, sika ti Anak ti Dios, sika ti Ari ti Israel.”

“Mamatika kadi gapu ta imbagak a nakitaka iti sirok ti kayo a higos?” dinamag ni Jesus. “Makakitakanto pay kadagiti banag nga ad-adda a nakaskasdaaw ngem kadagitoy.” Kalpasanna, inkari ni Jesus: “Ipasiguradok kadakayo, makitayonto nga aglukat ti langit kasta met dagiti anghel ti Dios nga umuli ken umulog iti ayan ti Anak ti tao.”—Juan 1:45-51.

Kalpasan la unay dayta, pinanawan ni Jesus ken dagiti kabbaro nga adalanna ti Tanap ti Jordan sa napanda idiay Galilea.