MATEO 4:1-11 MARCOS 1:12, 13 LUCAS 4:1-13

  • SINULISOG NI SATANAS NI JESUS

Kalpasan ti panangbautisar ni Juan ken Jesus, ti espiritu ti Dios inturongna ni Jesus idiay let-ang ti Judea. Adu ti masapul a panunotenna. Idi nagbautisar ni Jesus, “naglukat ti langit.” (Mateo 3:16) Isu a malagipnan dagiti bambanag a nasursuro ken inaramidna idiay langit. Wen, talaga nga adu ti masapul nga utobenna!

Nagtalinaed ni Jesus idiay let-ang iti 40 nga aldaw ken 40 a rabii. Saan a nangan iti dayta a tiempo. Kalpasanna, idi mabisin unayen ni Jesus, immasideg ni Satanas a Diablo tapno sulisogenna. Kinunana: “No sika ket anak ti Dios, ibagam kadagitoy a bato nga agbalinda a tinapay.” (Mateo 4:3) Ammo ni Jesus a saan nga umiso nga usarenna ti pannakabalinna nga agaramid iti milagro tapno penkenna ti tarigagayna isu a saan a timmulok iti sulisog.

Saan a nagsardeng ti Diablo. Pinadasna ti sabali a pamay-an. Imbagana ken Jesus a tumpuak manipud iti kangatuan a paset ti templo. Ngem saan a nasulisog ni Jesus a mangaramid iti kasta a panagpasindayag. Nagkotar manipud iti Kasuratan tapno ipakitana a di umiso a suboken ti Dios iti kasta a pamay-an.

Kalpasanna, iti maikatlo a pannulisog ti Diablo, impakitana ken Jesus “ti amin a pagarian ti lubong ken ti kinadayagda” ket kinunana: “Itedko amin kenka dagitoy no agruknoy ken agdayawka kaniak uray maminsan laeng.” Sititibker a nagkedked manen ni Jesus. Kinunana: “Pumanawka, Satanas!” (Mateo 4:8-10) Saan a nasulisog ni Jesus nga agaramid iti di umiso ta ammona a ni Jehova laeng ti rumbeng a pangipaayan iti sagrado a panagserbi. Wen, pinilina ti agtalinaed a matalek iti Dios.

Makasursurotayo kadagitoy a sulisog ken iti inaramid ni Jesus idi naipasango kadagita. Pudpudno dagiti sulisog a mangipakita a ti Diablo ket saan laeng a basta kinadakes kas kunaen ti dadduma. Ti Diablo ket pudno a persona a di makita. Ipakita pay daytoy a salaysay a dagiti gobierno ti lubong ket talaga a kukua ti Diablo ken konkontrolenna dagita. Kasano koma a maikuna a pudno a sulisog ti panangitukonna kadagita ken Kristo no saan met nga agpaypayso?

Maysa pay, imbaga ti Diablo a sisasagana a mangipaay uray pay ti amin a pagarian ti lubong no mangipakita kenkuana ni Jesus iti maysa a tignay ti panagdayaw. Mabalin a sulisogennatayo met ti Diablo iti umasping a pamay-an. Mabalin nga ikkannatayo kadagiti makaawis nga oportunidad tapno maaddaantayo iti kinabaknang, pannakabalin, wenno posision iti lubong. Maipakitatayo a masiribtayo no tuladentayo ti ulidan ni Jesus babaen ti panagtalinaedtayo a matalek iti Dios aniaman ti pakasulisogantayo! Ngem laglagipentayo a pinanawan ti Diablo ni Jesus “agingga iti sabali manen a maitutop a gundaway.” (Lucas 4:13) Mabalin met a mapasamak dayta kadatayo isu a masapul a kanayon koma a nasiputtayo.