Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ni Jesus—Ti Dalan, ti Kinapudno, ti Biag

 KAPITULO 18

Immadu ti Naaramidan ni Jesus, Bimmassit ken Juan

Immadu ti Naaramidan ni Jesus, Bimmassit ken Juan

MATEO 4:12 MARCOS 6:17-20 LUCAS 3:19, 20 JUAN 3:22–4:3

  • NANGBAUTISAR DAGITI ADALAN NI JESUS

  • NAIBALUD NI JUAN A MAMMAUTISAR

Pimmanaw idiay Jerusalem ni Jesus ken dagiti adalanna kalpasan a sinelebraranda ti Paskua iti primavera ti 30 C.E. Ngem saanda a dagus a nagawid idiay Galilea. Napanda idiay Judea ket adu ti binautisaranda sadiay. Iti agarup makatawen, kasta met ti inaramid ni Juan a Mammautisar nalabit iti kapatagan iti asideg ti Karayan Jordan. Kaduana pay laeng idi ti dadduma kadagiti adalanna.

Saan a nangbautisar ni Jesus. Dagiti adalanna ti nangaramid iti dayta babaen ti panangiwanwanna. Iti daytoy a paset ti ministerio ni Jesus, agpada nga isursuro da Jesus ken Juan dagiti Judio nga agbabbabawi gapu kadagiti basolda iti Linteg ti tulag ti Dios.—Aramid 19:4.

Ngem nagimon dagiti adalan ni Juan ket nagreklamoda kenkuana maipapan ken Jesus. Kinunada: “Ti lalaki [ni Jesus] a kaduam idi . . . babautisaranna dagiti tattao ket mapmapan kenkuana ti amin.” (Juan 3:26) Ngem saan a nagimon ni Juan. Maragsakan iti panagballigi ni Jesus ket kayatna a maragsakan met dagiti adalanna. Impalagip ni Juan kadakuada: “Nangngegyo nga imbagak, ‘Saan a siak ti Kristo, ngem naibaonak nga umun-una kenkuana.’” Inyilustrarna dayta iti pamay-an a maawatan ti amin: “Ti makinkukua iti nobia ket ti nobio. Ngem nakaragragsaken ti gayyem ti nobio no agtakder iti abay ti nobio ken no mangngegna nga agsao. Gapuna, naan-anayen ti ragsakko.”—Juan 3:28, 29.

Kas gayyem ti nobio, adu a bulanen a maragragsakan ni Juan idi inyam-ammona dagiti adalanna ken Jesus. Adu kadakuada ti simmurot ken Jesus, ket inton agangay, mapulotanda iti nasantuan nga espiritu. Kayat met ni Juan a suroten dagiti agdama nga adalanna ni Jesus. Kinapudnona, ti panggep ni Juan ket isaganana ti dalan para iti ministerio ti Kristo. Inlawlawag ni Juan: “Agtultuloy nga umadu ti maaramidan ti Kristo, ngem agtultuloy a bumassit ti maaramidak.”—Juan 3:30.

Ti sabali pay a Juan, a maysa kadagiti umuna a pasurot ni Jesus, insuratna idi agangay ti naggapuan ni Jesus ken ti akemna iti pannakaisalakan ti tao: “Daydiay naggapu iti ngato ket natantan-ok ngem iti isuamin. . . . Ti Ama ay-ayatenna ti Anak ket inyawatna kenkuana ti amin a banag. Ti mangipakita iti pammati iti Anak maaddaan iti biag nga agnanayon; ti sumukir iti Anak saan a maaddaan iti biag nga agnanayon, no di ket lak-amennanto ti pungtot ti Dios.” (Juan 3:31, 35, 36) Nagpateg dayta a kinapudno a maammuan dagiti tattao!

Di nagbayag kalpasan nga inlawlawag ni Juan a Mammautisar ti akemna ken ti ibabassit ti trabahona, isu ket impaaresto ni Ari Herodes. Innala ni Herodes ni Herodias, ti asawa ti kabsatna iti ama a ni Felipe, ket nagbalin nga asawana. Idi imbutaktak ni Juan ti immoral nga aramid ni Herodes, impaibaludna. Idi nangngeg ni Jesus a naaresto ni Juan, pinanawanna ti Judea a kaduana dagiti adalanna sa “napan idiay Galilea.”—Mateo 4:12; Marcos 1:14.