Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ni Jesus—Ti Dalan, ti Kinapudno, ti Biag

 KAPITULO 6

Ti Ubing a Naikari

Ti Ubing a Naikari

LUCAS 2:21-39

  • NAKUGIT NI JESUS KEN NAIPAN IDIAY TEMPLO IDI AGANGAY

Nagtalinaed da Jose ken Maria idiay Betlehem imbes nga agsublida idiay Nazaret. Idi maikawalo nga aldaw ni Jesus, kinugitda kas ibilin ti Linteg ti Dios iti Israel. (Levitico 12:2, 3) Kaugalian met a mapanaganan ti ubing a lalaki iti dayta met la nga aldaw. Pinanaganan da Jose ken Maria ti anakda iti Jesus, kas iti imbaga ni anghel Gabriel.

Limmabas ti nasurok a makabulan, 40 nga aldaw idin ni Jesus. Pangipanan ngay kenkuana dagiti nagannakna? Iti templo idiay Jerusalem, a sumagmamano a kilometro laeng ti kaadayona iti paggigiananda. Ibaga ti Linteg nga 40 nga aldaw kalpasan nga agpasngay ti ina iti ubing a lalaki, masapul nga agdaton idiay templo para iti pannakadalusna.—Levitico 12:4-7.

Inaramid ni Maria dayta. Nangitugot iti dua a babassit a billit nga idatonna. Maammuantayo iti dayta ti kasasaad ti panagbiag da Jose ken Maria. Sigun iti Linteg, maysa a sibong ken maysa nga urbon a kalakian a karnero ti maidaton. Ngem no saan a kabaelan ti ina ti agidaton iti urbon a karnero, umdasen ti dua a kalapati wenno dua a pagaw. Kasta ti kasasaad ni Maria isu a billit laeng ti maidatonna.

Idiay templo, adda lakay nga immasideg kada Jose ken Maria. Simeon ti naganna. Impakaammo ti Dios kenkuana a sakbay a matay, makitana ti Kristo, wenno Mesias, nga inkari ni Jehova. Iti dayta nga aldaw, ni Simeon ket inturong ti nasantuan nga espiritu idiay templo, a nakasarakanna kada Jose ken Maria ken ti kayyanak nga anakda. Inubba ni Simeon ti maladaga.

Bayat nga ub-ubbaenna ni Jesus, nagyaman ni Simeon iti Dios ket kinunana: “Kangatuan nga Apo, pimmudnon ti imbagam. Naragsakakon a matay, ta nakitakon ti usarem a mangisalakan. Isu ket intedmo tapno makita ti amin a tattao, ken agserbi kas lawag a mangikkat iti sipnget a nangabbong iti ilim nga Israel.”—Lucas 2:29-32.

Nasdaaw da Jose ken Maria idi nangngegda dayta. Binendisionan ida ni Simeon ket imbagana ken Maria a gapu iti anakna, “adu ti matuang ken adu ti bumangon manen iti Israel,” ken mariknananto a kasla maduyok iti atiddog nga espada gapu iti kasta unay a ladingit.—Lucas 2:34.

Adda pay sabali nga adda iti dayta nga aldaw. Isu ni Ana, ti propetisa nga agtawen iti 84. Kinapudnona, inaldaw nga adda iti templo. Iti dayta met la nga oras, immasideg iti ayan da Jose, Maria, ken ti maladaga a ni Jesus. Nagyaman ni Ana iti Dios ken imbagana ti maipapan ken Jesus kadagiti amin a dumngeg.

Mapanunotmo kadi ti ragsak da Jose ken Maria gapu kadagitoy a pasamak idiay templo? Wen, amin dagitoy ti nangpatalged kadakuada a ti anakda isu Daydiay Inkari ti Dios.