Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ni Jesus—Ti Dalan, ti Kinapudno, ti Biag

 KAPITULO 7

Binisita Dagiti Astrologo ni Jesus

Binisita Dagiti Astrologo ni Jesus

MATEO 2:1-12

  • SUROTEN DAGITI ASTROLOGO TI ‘BITUEN’ NGA AGTURONG IDIAY JERUSALEM SA KALPASANNA KEN JESUS

Adda lallaki a naggapu iti Daya. Astrologo dagitoy—tattao a mangad-adal iti posision dagiti bituen, nga agkunkuna a babaen ti panangaramidda iti dayta, maibagada ti kaipapanan dagiti pasamak iti biag dagiti tattao. (Isaias 47:13) Bayat nga addada pay iti lugarda iti Daya, adda nakitada a ‘bituen’ ket sinurotda dayta iti ginasut a kilometro a kaadayo, saan nga agturong idiay Betlehem, no di ket idiay Jerusalem.

Idi nakadanondan, insaludsod dagiti astrologo: “Sadino ti ayan ti ubing nga agbalinto nga ari dagiti Judio? Nakitami ti bituenna idi addakami iti Daya, ket umaykami agruknoy kenkuana.”—Mateo 2:1, 2.

Nangngeg ni Ari Herodes ti maipapan iti dayta ket nariribukan unay. Gapuna, pinaayabanna dagiti panguluen a papadi ken ti dadduma a Judio a lider ti relihion ket dinamagna kadakuada no sadino ti pakayanakan ti Kristo. Sigun iti Kasuratan, insungbatda: “Idiay Betlehem.” (Mateo 2:5; Mikias 5:2) Gapuna, sililimed a pinaayaban ni Herodes dagiti astrologo ket kinunana kadakuada: “Sapulenyo a naimbag ti ubing. Inton mabirokanyo, ipakaammoyo kaniak tapno mapanak met agruknoy kenkuana.” (Mateo 2:8) Ngem kinaagpaysuanna, kayat a biroken ni Herodes ti ubing tapno papatayenna!

Idi nakapanawen dagiti astrologo, adda nakaskasdaaw a napasamak. Ti ‘bituen’ a sursurotenda a nakitada idi iti Daya immun-una ngem kadakuada. Nalawag a saan nga ordinario a bituen dayta, no di ket naipaay a mangidalan kadakuada. Sinursurot dagiti astrologo ti bituen agingga a nagsardeng iti batog ti balay da Jose ken Maria a kaduada ti ubing pay nga anakda.

Idi simrek dagiti astrologo iti balayda, nakitada ni Maria ken ti ubing a ni Jesus. Gapuna, nagruknoy dagiti astrologo iti ubing. Inikkanda kadagiti sagut a balitok, olibano, ken mirra. Kalpasanna, idi agsublida koman ken Herodes, pinakdaaran ida ti Dios babaen ti tagtagainep a saanda nga aramiden dayta. Gapuna, nagawidda iti pagilianda ket nagnada iti sabali a dalan.

Panagkunam, asino ti naggapuan ti ‘bituen’ a nangiturong kadagiti astrologo? Laglagipem a saan a direkta nga idiay Betlehem nga ayan ni Jesus ti nangiturongan kadakuada ti bituen. Imbes ketdi, idiay Jerusalem nga ayan ni Ari Herodes a mayat a mangpapatay ken Jesus. Naaramidna koma dayta no saan a nakibiang ti Dios ken no saan a pinakdaaran ti Dios dagiti astrologo a saanda nga ibagbaga ken Herodes ti ayan ni Jesus. Nalawag ngarud a naggapu ti ‘bituen’ iti kabusor ti Dios, ni Satanas, a pagayatanna a matay ni Jesus, ket inusarna dayta tapno maitungpal ti panggepna.

Ammuem ti Ad-adu Pay

TI PAGWANAWANAN

Jesu-Kristo—Ania ti Laglagipentayo Maipapan Kenkuana?

Laglagipentayo kadi ni Jesus kas maladaga? Siasino dagiti “masirib a lallaki” a simmarungkar kenkuana? Ania ti ar-aramiden itan ni Jesus?