Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ni Jesus—Ti Dalan, ti Kinapudno, ti Biag

 KAPITULO 74

Dagiti Leksion Maipapan iti Kinamanagpadagus ken Kararag

Dagiti Leksion Maipapan iti Kinamanagpadagus ken Kararag

LUCAS 10:38–11:13

  • BINISITA NI JESUS DA MARTA KEN MARIA

  • NAPATEG TI NAPASNEK A PANAGKARARAG

Masarakan ti Betania iti makindaya a sikigan ti Bantay Dagiti Olibo, agarup tallo a kilometro manipud Jerusalem. (Juan 11:18) Napan ni Jesus sadiay iti balay dagiti agkabsat a da Marta ken Maria. Gagayyem ida ni Jesus, kasta met ni Lazaro a kabsatda. Siraragsak a pinasangbayda ni Jesus.

Maysa a dayaw ti mangsangaili iti Mesias. Magagaran ni Marta a mangisagana iti naimas a makan para ken Jesus, isu nga adu ti insaganana. Bayat nga agisagsagana ni Marta, nagtugaw ni Maria iti sakaanan ni Jesus ket dimngeg kenkuana. Idi agangay, imbaga ni Marta ken Jesus: “Apo, dimo kadi madlaw a binaybay-annak ni adingko a sisiak ti mangasikaso kadagiti bambanag? Ibagam man kenkuana a tulongannak.”Lucas 10:40.

Imbes a babalawenna ni Maria, binalakadan ni Jesus ni Marta ta maseknan unay iti isaganana. Kinunana: “Marta, Marta, adu ngamin ti as-asikasuem ken pakaringgoram. Sumagmamano la a banag ti kasapulantayo wenno maysa laeng. Nasayaat ti pinili ni Maria, ket saanto a maala dayta kenkuana.” (Lucas 10:41, 42) Wen, impakita ni Jesus a saan a nasken ti mangbusbos iti adu a tiempo a mangisagana iti adu a putahe. Umdasen ti simple a taraon.

Nasayaat ti panggep ni Marta. Kayatna nga ipakita a managpadagus. Ngem gapu ta maringgoran nga agisagana iti naimas a taraon, maikapkapis iti nakapatpateg a pannursuro ti Anak ti Dios! Impaganetget ni Jesus a naim-imbag ti pinili ni Maria, ta makaipaay iti agnanayon a gunggona para kenkuana ken nagsayaat met a leksion a laglagipentayo.

Iti sabali a gundaway, nangipaay ni Jesus iti sabali pay a nakapatpateg a leksion. Dinamag ti maysa nga adalan: “Apo, isuronakami nga agkararag, kas iti panangisuro ni Juan kadagiti adalanna.” (Lucas 11:1) Inaramid idin ni Jesus dayta agarup maysa ket kagudua a tawen ti napalabasen iti Sermonna iti Bantay. (Mateo 6:9-13) Nupay kasta, mabalin nga awan idi daytoy nga adalan, isu nga inulit dayta ni Jesus. Kalpasanna, nangted iti ilustrasion tapno ipaganetgetna a masapul ti napasnek a panagkararag.

“Kas pagarigan, adda gayyemyo ket mapankayo kenkuana iti tengnga ti rabii, ket kunayo, ‘Gayyem, ikkannak man pay laeng iti tallo a tinapay, ta simmangpet ti maysa kadagiti gagayyemko manipud iti biahena ket awan ti maipasangok kenkuana.’ Ngem simmungbat ti gayyemyo, ‘Dinak istorbuen. Nakaserran ti ridaw, ken matmaturogkamin kadagiti annakko. Saankon a mabalin ti bumangon ken mangted kenka iti aniaman.’ Ibagak kadakayo, uray no aggayyemkayo, saan a bumangon ken mangted iti aniaman. Ngem gapu ta saankayo nga agsardeng nga agpakpakaasi, bumangonto met laeng ket itedna ti aniaman a kasapulanyo.”Lucas 11:5-8.

Saan nga imbaga ni Jesus a saan nga ipaay ni Jehova ti aniaman a kiddawentayo, a kas met iti gayyem iti ilustrasion. Imbes ketdi, impakitana a no pinatgan ti saan a situtulok a gayyem ti kiddaw ti gayyemna gapu iti kinapasnekna, sigurado a sungbatan ti naayat nga Amatayo ti napasnek a kiddaw dagiti matalek nga adipenna! Intuloy ni Jesus: “Kunak kadakayo, itultuloyyo ti agdawat, ket maikkankayto; itultuloyyo ti agsapul, ket makasarakkayto; itultuloyyo ti agtuktok, ket mailukatankayto. Ta asinoman nga agdawat maikkanto, ken asinoman nga agsapul makasarakto, ken asinoman nga agtuktok mailukatanto.”Lucas 11:9, 10.

Kalpasanna, impaganetget ni Jesus ti puntona iti panangdakamatna kadagiti amma a tattao. Kinunana: “Adda kadi ama a no dumawat ti anakna iti ikan, ikkanna iti uleg imbes nga ikan? Wenno no dumawat iti itlog, ikkanna kadi iti manggagama? No dakayo a managbasol ammoyo ti mangted iti naimbag a sagut kadagiti annakyo, anian nga ad-adda pay ti Ama idiay langit a mangted iti nasantuan nga espiritu kadagidiay agdawdawat kenkuana!” (Lucas 11:11-13) Pammatalged dayta a situtulok a dumngeg kadatayo ti Amatayo ken itedna dagiti kasapulantayo!

Ammuem ti Ad-adu Pay

Ania Dagiti Mabalinko nga Ikararag?

Ammuem no apay a saan a tagtagibassiten ti Dios dagiti personal a pakaseknam.