Mapan iti linaonna

Mapan iti listaan dagiti linaonna

 KAPITULO 77

Nangbalakad ni Jesus Maipapan iti Kinabaknang

Nangbalakad ni Jesus Maipapan iti Kinabaknang

LUCAS 12:​1-34

  • ILUSTRASION MAIPAPAN ITI BAKNANG

  • IMBAGA NI JESUS TI MAIPAPAN KADAGITI WAK KEN SABSABONG

  • “BASSIT NGA IPASTORAN” A SUMREK ITI PAGARIAN

Bayat a mangmangan ni Jesus iti balay ti Fariseo, rinibu ti agur-uray kenkuana iti ruar. Kasta met laeng ti napasamak idiay Galilea. (Marcos 1:33; 2:2; 3:9) Ditoy Judea, adu ti mayat a makakita ken dumngeg kenkuana, a mangipakpakita iti kababalin a naiduma kadagiti Fariseo a kaduana a mangmangan.

Adda nagpateg a kaipapanan kadagiti adalan ti umuna nga imbaga ni Jesus: “Agannadkayo iti lebadura dagiti Fariseo, kayatna a sawen, ti panaginsisingpetda.” Imbaga idin ni Jesus daytoy a pakdaar, ngem ti nakitana iti panganan ti mangipakita a nagpateg daytoy a balakad. (Lucas 12:1; Marcos 8:15) Mabalin nga ilemmeng dagiti Fariseo ti kinadakesda nga ipakitada a relihiosoda, ngem masapul a maammuan a napeggadda. Inlawlawag ni Jesus: “Awan ti nailemmeng a dinto matakuatan, ken awan ti sekreto a dinto maammuan.”​—Lucas 12:2.

Mabalin nga adu kadagiti tattao a nangaribungbong ken Jesus ti taga-Judea ken saan pay a nakangngeg kenkuana a nangisuro idiay Galilea. Gapuna, inulit ni Jesus dagiti nagpateg a sasao nga imbagana idin. Imparegtana iti amin a dumdumngeg: “Saanyo a kabuteng dagidiay mangpapatay iti bagi ta awanen ti maaramidanda kalpasanna.” (Lucas 12:4) Kas iti inaramidna idin, impaganetgetna a masapul nga agtalek dagiti pasurotna nga aywanan ida ti Dios. Masapul met nga awatenda ti Anak ti tao ken bigbigenda a kabaelan ida a tulongan ti Dios.​—Mateo 10:​19, 20, 26-33; 12:​31, 32.

Pagammuan ta adda lalaki a nangibaga iti pakaseknanna: “Mannursuro, ibagam iti kabsatko nga ibingayannak iti tawid.” (Lucas 12:13) Ibaga ti Linteg a doble ti tawid a maited iti inauna, isu nga awan koman ti problema. (Deuteronomio 21:17) Ngem agparang a kayat daytoy a lalaki ti ad-adu ngem iti maiparbeng a bingayna. Awan ti dinasigan ni Jesus kadakuada. Insaludsodna: “Asino ti nangted kaniak iti kalintegan a mangikeddeng wenno mangbingay iti tawidyo nga agkabsat?”​—Lucas 12:14.

Kalpasanna, imbalakad ni Jesus iti amin: “Agannadkayo ken liklikanyo ti amin a kita ti kinaagum, ta uray no kasano kabaknang ti maysa a tao, ti biagna ket saan nga agdepende kadagiti sanikuana.” (Lucas 12:15) Kasanoman kabaknang ti maysa a tao, saan kadi a matayto ket mabatina ti amin a kinabaknangna? Impaganetget ni Jesus dayta idi imbagana ti nakallalagip nga ilustrasion a mangipakita met a napateg ti maaddaan iti naimbag a nagan iti Dios:

“Adda idi maysa a baknang a nagadu ti naapitna. Isu a pampanunotenna, ‘Ania ngaruden ti aramidek ita ta awanen ti pagikabilak kadagiti apitko?’ Intuloyna, ‘Kastoy ti aramidek: Rakrakekto dagiti kamarinko ken mangbangonak iti daddadakkel. Urnongekto idiay ti amin a bukbukel ken amin nga apitko, ket ibagakto iti bagik: “Adun ti naurnongmo maipaay iti adu a tawen; agnam-ayka, manganka, uminumka, agragragsakka.” ’ Ngem kinuna ti Dios kenkuana, ‘Maag! Ita a rabii, adda dagiti mangpatay kenka. Asinonto ngarud ti mangtagikua kadagiti inurnongmo?’ Kasta ti mapasamak iti tao nga agurnong iti sanikua para iti bagina, ngem saan a nabaknang iti imatang ti Dios.”​—Lucas 12:​16-21.

Dagiti adalan ni Jesus ken ti dadduma a dumdumngeg mabalin a masiluanda babaen ti pananggun-odda wenno panagurnongda iti kinabaknang. Wenno mabalin a masingada nga agserbi ken Jehova gapu kadagiti pakaringgoran iti biag. Gapuna, inulit ni Jesus ti nagsayaat a balakad nga imbagana iti Sermon iti Bantay agarup maysa ket kagudua a tawen ti napalabasen:

“Saankayon a madanagan iti pagbiagyo no anianto ti kanenyo wenno pagbadoyo. . . . Kitaenyo dagiti wak: Saanda nga agmula iti bin-i wenno agani; awan met ti kamalig wenno kamarinda;  ngem pakpakanen ida ti Dios. Saan kadi a napatpategkayo nga amang ngem kadagiti billit? . . . Kitaenyo ti panagdakkel dagiti sabong: Saanda nga agtrabaho wenno agaramid iti sinulid; ngem laglagipenyo, nga uray nakadaydayag ni Solomon, saan a nakawesan iti kas kapintas ti maysa kadagitoy a sabong. . . . Gapuna, saanyon a pakasikoran no ania ti kanen ken inumenyo, ken saankayon nga agdanag unay . . . Ammo ni Amayo a kasapulanyo dagitoy a banag. . . . Itultuloyyo a sapulen ti Pagarianna, ket dagitoy a banag mainayonto kadakayo.”​—Lucas 12:​22-31; Mateo 6:​25-33.

Siasino dagiti mangsapsapul iti Pagarian ti Dios? Impakita ni Jesus a bassit laeng dagiti matalek a tattao a mangar-aramid iti kasta, maysa a “bassit nga ipastoran.” Naipakaammo idi agangay a ti bilangda ket 144,000 laeng. Ania ti agur-uray kadakuada? Impanamnama ni Jesus kadakuada: “Pagragsakan ni Amayo nga ited kadakayo ti Pagarian.” Saan nga ipamaysa dagitoy ti agurnong kadagiti kinabaknang ditoy daga, a mabalin a takawen dagiti mannanakaw. Imbes ketdi, naipamaysa ti pusoda iti “di mapukaw a kinabaknang idiay langit,” a sadiay makipagturaydanto ken Kristo.​—Lucas 12:​32-34.