Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ni Jesus—Ti Dalan, ti Kinapudno, ti Biag

 KAPITULO 71

Nagsaludsod Dagiti Fariseo iti Dati a Bulsek

Nagsaludsod Dagiti Fariseo iti Dati a Bulsek

JUAN 9:19-41

  • NAGSALUDSOD DAGITI FARISEO ITI DATI A BULSEK

  • “BULSEK” DAGITI LIDER TI RELIHION

Saan nga akseptaren dagiti Fariseo a pinaimbag ni Jesus ti lalaki a nayanak a bulsek, isu a pinaayabanda dagiti nagannakna. Ammo dagiti nagannakna a mabalin a ‘mailaksidda iti sinagoga.’ (Juan 9:22) Mabalin a rumigat ti panagbiagda ken maapektaran ti pannakilangenda kadagiti dadduma a Judio no mailaksidda.

Dua ti insaludsod dagiti Fariseo: “Daytoy kadi ti anakyo nga ibagbagayo a nayanak a bulsek? Apay ngarud a makakitan?” Insungbat dagiti nagannakna: “Wen, daytoy ti anakmi ken nayanak a bulsek. Ngem saanmi nga ammo no kasano a makakitan, wenno no asino ti nangpaimbag kenkuana.” Uray no imbaga ti anakda ti napasamak, naannad a simmungbat dagiti nagannakna. Kinunada: “Isu ti pagsaludsodanyo ta nataengan metten. Ammona dayta.”Juan 9:19-21.

Gapuna, inayaban dagiti Fariseo ti lalaki ket binutbutengda ta imbagada nga adda ebidensiada a maibusor ken Jesus. “Idaydayawmo ti Dios,” kinunada. “Ammomi a managbasol dayta a tao.” Tapno saan a maiturong kenkuana ti pammabasolda, kinuna ti bulsek a lalaki: “No managbasol, saanko nga ammo.” Ngem kinunana: “Ti ammok ket bulsekak idi ngem makakitaakon.”Juan 9:24, 25.

Gapu ta saan latta a mapnek dagiti Fariseo iti insungbat ti lalaki, kinunada: “Ania ti inaramidna kenka? Kasano a pinaimbagna dagita matam?” Natured a simmungbat ti lalaki: “Imbagak la ngaruden, ngem saandak met a dengdenggen. Apay a kayatyo nga ulitek manen? Kayatyo kadi met ti agbalin nga adalanna?” Nakapungtot dagiti Fariseo ket pinagsasawanda. Kinunada: “Adalannaka dayta a tao, ngem adalannakami ni Moises. Ammomi a nagsao ti Dios ken ni Moises, ngem saanmi nga ammo ti naggapuan daytoy a tao.”Juan 9:26-29.

Nasdaaw ti lalaki nga agpalpalimos, ket kinunana: “Nakaskasdaaw man ta saanyo nga ammo ti naggapuanna, idinto ta pinaimbagnak.” Kalpasanna, nangdakamat ti lalaki iti lohikal nga argumento no siasino ti denggen ken anamongan ti Dios. Kinunana: “Ammotayo a saan nga ipangag ti Dios dagiti managbasol, ngem ipangagna ti asinoman nga agbuteng kenkuana ken mangaramid iti pagayatanna. Awan pay a pulos ti nadamdamagtayo a nangpaimbag iti maysa a nayanak a bulsek.” Ngarud, “no saan nga imbaon ti Dios daytoy a tao, awan koma a pulos ti maaramidanna.”Juan 9:30-33.

Gapu ta saan a masungbatan dagiti Fariseo ti panagrasrason ti lalaki, imbabainda, ket kinunada: “Nayanakka nga adu ti basolna, sa ita, isuronakami ketdin?” Kalpasanna, pinaruarda.Juan 9:34.

Idi nangngeg ni Jesus ti napasamak, binirokna ti lalaki ket kinunana: “Mamatika kadi iti Anak ti tao?” Simmungbat ti lalaki: “Apo, ibagam no asino tapno mamatiak kenkuana?” Awan ti panagduadua a kinuna ni Jesus: “Nakitamon. Kinapudnona, isu ti makisasao kenka.”Juan 9:35-37.

Kinuna ti lalaki: “Mamatiak, Apo.” Kas panangipakita iti panagraem ken pammati, nagruknoy ti lalaki iti sanguanan ni Jesus, a nangibaga kadagiti nakapatpateg a sasao: “Immayak ditoy lubong tapno maukom dagiti tattao. Iti kasta, makakita dagiti saan a makakita ket dagiti makakita, agbalinda a bulsek.”Juan 9:38, 39.

Ammo dagiti Fariseo, nga adda sadiay, a saanda a bulsek. Ngem komusta ngay no maipapan iti panangiwanwanda iti naespirituan? Insaludsodda: “Ibagbagam kadi a bulsekkami met?” Insungbat ni Jesus: “No bulsekkayo, awan koma ti basolyo. Ngem gapu ta kunayo, ‘Makakitakami,’ saan a mapakawan ti basolyo.” (Juan 9:40, 41) No saanda koma a mannursuro iti Israel, mabalin a nalaka laeng a maakseptar a saanda a bigbigen a ni Jesus ti Mesias. Ngem gapu ta ammoda ti Linteg, ti panangilaksidda kenkuana ket maysa a nadagsen a basol.