Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ni Jesus—Ti Dalan, ti Kinapudno, ti Biag

 KAPITULO 21

Iti Sinagoga Idiay Nazaret

Iti Sinagoga Idiay Nazaret

LUCAS 4:16-31

  • BINASA NI JESUS TI LUKOT NI ISAIAS

  • GINANDAT DAGITI UMILI TI NAZARET A PAPATAYEN NI JESUS

Magagaran dagiti taga-Nazaret. Sakbay a pimmanaw ni Jesus tapno agpabautisar ken Juan, nasurok a makatawen ti napalabasen, pagaammo idi kas maysa a karpintero idiay Nazaret. Ngem ita, pagaammon kas agar-aramid iti milagro. Magagaran dagiti umili a makakita kenkuana nga agaramid iti milagro.

Ad-adda a magagaranda tunggal mapan ni Jesus iti sinagoga a kas iti kanayon nga ar-aramidenna. Ti panagdayaw a maar-aramid iti sinagoga ramanenna ti panagkararag ken panangbasa kadagiti insurat ni Moises, kas iti maar-aramid “kadagiti sinagoga iti tunggal sabbath.” (Aramid 15:21) Maibasa met ti dadduma a paset dagiti libro a naglaon kadagiti padto. Idi nagtakder ni Jesus tapno agbasa, mabalin nga adu ti mairupaanna gapu ta adu a tawenen a mapmapan iti daytoy a sinagoga. Nayawat kenkuana ti lukot ni propeta Isaias. Nasarakanna ti paset a nangdakamat maipapan iti Daydiay pinulotan ti espiritu ni Jehova a mabasa itan iti Isaias 61:1, 2.

Binasa ni Jesus no kasano nga ipakaammo Daydiay ti pannakawayawaya dagiti balud, pannakakita manen dagiti bulsek, ken ti iyaay ti naparaburan a tawen ni Jehova. Inyawat ni Jesus ti lukot iti katulongan sa nagtugaw. Kumitkita kenkuana ti amin. Kalpasanna, nagsao ni Jesus iti medio pangatiddogen a dinakamatna daytoy nagpateg a sasao: “Daytoy a paset ti kasuratan a kangkangngegyo ket natungpalen.”—Lucas 4:21.

Nasdaaw dagiti tattao “kadagiti agkakapintas nga ibagbagana,” ket kinunada iti maysa ken maysa: “Saan kadi nga anak daytoy ni Jose?” Ngem gapu ta ammona a kayatda a makita nga agaramid iti milagro kas kadagiti nadamdamagda, intuloy ni Jesus: “Sigurado nga ibagayonto kaniak daytoy a pagsasao, ‘Doktor, agasam ta bagim. Aramidem met ditoy mismo nga ilim dagiti nadamagmi nga inaramidmo idiay Capernaum.’” (Lucas 4:22, 23) Namnamaen dagiti dati a kaarruba ni Jesus a masapul nga irugina ti panangagasna iti lugarda tapno umuna a magunggonaan dagiti kailianna. Isu nga impagarupda a binaybay-an ida ni Jesus.

Gapu ta ammona ti pampanunotenda, dinakamat ni Jesus ti dadduma a pasamak iti pakasaritaan ti Israel. Imbagana nga idi panawen ni Elias, adu ti balo iti Israel ngem saan a naibaon ni Elias iti uray siasino kadakuada. Imbes ketdi, napan iti balo a saan nga Israelita nga agnanaed idiay Sarefat, maysa nga ili nga asideg iti Sidon. Nangaramid sadiay ni Elias iti milagro. (1 Ar-ari 17:8-16) Ken idi kaaldawan ni Elias, adu dagiti agkukutel idiay Israel, ngem ti laeng Siriano a ni Naaman ti inagasanna.—2 Ar-ari 5:1, 8-14.

Ipagarup dagiti kailian ni Jesus a saan nga umiso ti panangidiligna ta maiparangarang nga agimbubukodanda ken awan pammatida. Ania ti reaksionda? Nakapungtot dagiti adda iti sinagoga, timmakderda, ken pinapanawda ni Jesus iti siudad. Impanda iti tapaw ti bantay idiay Nazaret, ket ginandatda nga itapuak iti derraas. Ngem nakalibas ni Jesus. Agturong itan idiay Capernaum, iti amianan a laud ti Baybay ti Galilea.