Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ni Jesus—Ti Dalan, ti Kinapudno, ti Biag

 KAPITULO 36

Impakita ti Senturion ti Nabileg a Pammati

Impakita ti Senturion ti Nabileg a Pammati

MATEO 8:5-13 LUCAS 7:1-10

  • IMMIMBAG TI ADIPEN TI MAYSA NGA OPISIAL TI ARMADA

  • NABENDISIONAN DAGITI ADDAAN ITI PAMMATI

Idi naipalawagen ni Jesus ti Sermon iti Bantay, napan iti siudad ti Capernaum. Ditoy, immasideg kenkuana ti dadduma a panglakayen a Judio. Imbaon ida ti maysa a lalaki a naiduma ti kasasaadna—maysa nga opisial ti armada ti Roma, maysa a senturion.

Ti adipen nga ipatpateg ti opisial ket nakaro ti sakitna ken matmatayen. Nupay ti senturion ket Gentil, kayatna ti agpatulong ken Jesus. Imbaga dagiti Judio ken Jesus a ti adipen ti opisial ket ‘nakaidda idiay balay ti senturion ta nakaro ti sakitna ken saan a makabangon.’ (Mateo 8:6) Impasigurado dagiti panglakayen a Judio ken Jesus a daytoy a senturion ket maikari a tulongan. Inlawlawagda: “Ay-ayatenna ti nasiontayo ken imbangonannatayo iti sinagoga.”—Lucas 7:4, 5.

Di nagbayag, napanen ni Jesus ken dagiti panglakayen iti balay ti opisial. Bayat nga umas-asidegda, nangibaon ti opisial kadagiti gagayyemna tapno ibagada: “Apo, saankan nga umay, ta saanak a maikari a mangpastrek kenka iti balayko. Panagriknak, saanak a maikari nga umay kenka.” (Lucas 7:6, 7) Nagsayaat dayta a kinapakumbaba nga impakita ti maysa a mangmangted iti bilin! Naiduma daytoy a lalaki kadagiti Romano a saan a nasayaat ti panangtratoda kadagiti adipenda.—Mateo 8:9.

Ammo ti senturion a saan a makilanglangen dagiti Judio kadagiti saan a Judio. (Aramid 10:28) Gapu ta mabalin a pampanunoten dayta ti opisial, imbaonna ti gagayyemna a mangibaga ken Jesus: “Ibagam laeng nga umimbag ti adipenko ket umimbagto.”—Lucas 7:7.

Nasdaaw ni Jesus idi nangngegna daytoy ket imbagana: “Kinaagpaysuanna, ita pay laeng a nakasarakak iti Israel iti kastoy kadakkel a pammati.” (Lucas 7:9) Idi nagsublin dagiti gagayyem ti senturion iti balayna, nakitada a naimbaganen ti adipen.

Idi pinaimbag ni Jesus ti adipen, impasiguradona a mabendisionan dagiti saan a Judio nga addaan iti pammati. Kinunana: “Adunto ti umay manipud iti daya ken laud a makisango iti lamisaan a kadua da Abraham, Isaac, ken Jacob iti Pagarian ti langit.” Dagiti ngay Judio nga awan pammatina? Kinuna ni Jesus a “maipuruakdanto iti kasipngetan ket agsangit ken agngaretngetda gapu iti rigat.”—Mateo 8:11, 12.

Ngarud, mailaksid dagiti Judio a saan a nangawat iti gundaway nga immuna a naited kadakuada nga agbalin a paset ti Pagarian a kadua ni Kristo. Ngem maawatto dagiti Gentil tapno makisango iti lamisaanna, “iti Pagarian ti langit.”