Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ni Jesus—Ti Dalan, ti Kinapudno, ti Biag

 KAPITULO 57

Pinaimbag ni Jesus ti Ubing a Babai ken ti Tuleng a Lalaki

Pinaimbag ni Jesus ti Ubing a Babai ken ti Tuleng a Lalaki

MATEO 15:21-31 MARCOS 7:24-37

  • PINAIMBAG NI JESUS TI ANAK TI BABAI A TAGA-FENICIA

  • PINAIMBAGNA TI LALAKI A TULENG KEN UMEL

Kalpasan a binabalawna dagiti Fariseo gapu iti tradisionda, pimmanaw ni Jesus ken dagiti adalanna. Napan idiay Tiro ken Sidon iti Fenicia, adu a kilometro iti amianan a laud.

Nakasarak ni Jesus iti pagdagusanna ngem saanna a kayat a maammuan dagiti tattao nga isu ket adda sadiay. Ngem naammuanda latta ti ayanna. Maysa a Griego a babai a nayanak iti daytoy a lugar ti napan ken Jesus. Impakaasina: “Maasianka kaniak, Apo, Anak ni David! Marigrigatan ti balasangko ta linuganan ti demonio.”Mateo 15:22; Marcos 7:26.

Idi kuan, imbaga dagiti adalan ni Jesus: “Apo, papanawem ta agpukpukkaw a sumursurot kadatayo.” Simmungbat ni Jesus ket inlawlawagna no apay a saanna nga inkankano. Kinunana: “Dagiti laeng umili ti Israel a kasla napukaw a karnero ti nakaibaonak.” Ngem saan a simmardeng ti babai. Immasideg ken nagparintumeng iti sango ni Jesus, ket impakaasina: “Apo, tulongannak!”Mateo 15:23-25.

Mabalin a tapno masubok ti pammati ti babai, imbaga ni Jesus ti negatibo a panangmatmat dagiti Judio kadagiti tattao a sabali ti pulina. Kinunana: “Saan a rumbeng nga alaen ti kanen dagiti ubbing sa ipuruak kadagiti uken.” (Mateo 15:26) Idi dinakamatna dagiti “uken,” ipakpakita ni Jesus ti asina kadagiti saan a Judio. Mabalin met a madlaw dayta iti rupana ken iti naalumamay a timekna.

Imbes a masaktan ti babai, natarusanna ti nadakamat a panangidumduma dagiti Judio ket sipapakumbaba nga imbagana: “Wen, Apo, ngem dagiti uken kanenda dagiti murkat a maregreg iti lamisaan dagiti amoda.” Nakita ni Jesus a nasayaat ti panagpuspuso ti babai ket kinunana: “Dakkel ti pammatim; mapasamak koma ti kiddawmo.” (Mateo 15:27, 28) Wen, immimbag ti ubing uray awan sadiay! Idi nagawid ti babai, nakitana ti anakna a nakaidda ken immimbagen ta “rimmuaren ti demonio”!Marcos 7:30.

Manipud Fenicia, napan ni Jesus ken dagiti adalanna iti sabali a pagilian iti surong ti Karayan Jordan. Mabalin a bimmallasiwda iti Jordan iti amianan ti Baybay ti Galilea ket napanda idiay Decapolis. Sadiay, simmang-atda iti bantay ngem nasarakan ida dagiti tattao. Impanda ken Jesus dagiti pilay, baldado, bulsek, ken umel, ket pinaimbagna ida. Nasdaaw dagiti tattao ket indaydayawda ti Dios ti Israel.

Inikkan ni Jesus iti naidumduma nga atension ti maysa a lalaki a tuleng ken marigatan nga agsao. Mabalin a maawatam ti marikriknana iti tengnga ti nagadu a tattao. Nalabit nadlaw ni Jesus a mabutbuteng ti lalaki isu nga inyadayona. Idi is-isuda laengen, imbaga ni Jesus no ania ti aramidenna kenkuana. Inkabilna dagiti ramayna iti lapayag ti lalaki ket kalpasan a timmupra, sinagidna ti dila ti lalaki. Kalpasanna, timmangad ni Jesus idiay langit ket imbagana, “Effatha,” a kaipapananna, “Makangngeg ken makasaoka koma.” Idi kuan, makangngegen ken normalen ti panagsao ti lalaki. Saan a kayat ni Jesus a maammuan dagiti tattao daytoy, ta kayatna a mamatida kenkuana maibatay iti personal a makita ken mangngegda.Marcos 7:32-36.

Dakkel ti epekto ti pannakabalin ni Jesus a mangpaimbag kadagiti agpalpaliiw, a “napalalo ti siddaawda.” Kinunada: “Nagsayaat ti amin nga ar-aramidenna. Papaimbagenna pay dagiti tuleng ken umel.”Marcos 7:37.

Ammuem ti Ad-adu Pay

Inayatna Dagiti Tattao

Iti pamay-an ni Jesus a nangaramid kadagiti milagro, ania ti ipakita dayta maipapan iti rikriknana?