Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ni Jesus—Ti Dalan, ti Kinapudno, ti Biag

 KAPITULO 58

Pinaaduna Dagiti Tinapay ken Namakdaar Maipapan iti Lebadura

Pinaaduna Dagiti Tinapay ken Namakdaar Maipapan iti Lebadura

MATEO 15:32–16:12 MARCOS 8:1-21

  • PINAKAN NI JESUS TI 4,000 A LALLAKI

  • NAMAKDAAR NGA AGANNADDA ITI LEBADURA DAGITI FARISEO

Adu a tattao ti nangaribungbong ken Jesus idiay Decapolis, iti makindaya nga igid ti Baybay ti Galilea. Immayda tapno dumngegda kenkuana ken mapaimbagda. Nagawitda kadagiti dadakkel a basket a napno kadagiti taraon.

Ngem idi agangay, imbaga ni Jesus kadagiti adalanna: “Maasianak kadagitoy a tattao. Tallo nga aldawdan ditoy ket awanen ti kanenda. No pagawidek ida a mabisbisin, baka matalimudawda iti dalan. Nagadayo pay met ti pagawidan ti dadduma.” Dinamag dagiti adalan: “Iti daytoy awan matataona a lugar, pangalaantayo ngarud iti tinapay nga umanay a kanen dagitoy a tattao?”Marcos 8:2-4.

Insungbat ni Jesus: “Mano a tinapay ti adda kadakayo?” Kinuna dagiti adalan: “Pito, ken sumagmamano a babassit nga ikan.” (Mateo 15:34) Kalpasanna, pinagdalupisak ni Jesus dagiti tattao iti karuotan. Innalana dagiti tinapay ken ikan, nagkararag iti Dios, sa intedna kadagiti adalan ket inwarasda. Nanganda amin ken nabsogda! Adda pito a dadakkel a basket a natedda uray agarup 4,000 a lallaki ti nangan, kasta met dagiti babbai ken ubbing!

Kalpasan a pinagawidna dagiti tattao, naglugan ni Jesus ken dagiti adalan iti bangka a napan iti Magadan, iti makinlaud nga igid ti Baybay ti Galilea. Ditoy a sinubok dagiti Fariseo ken sumagmamano a Saduceo ni Jesus. Kiniddawda a mangaramid iti pagilasinan a naggapu iti Dios.

Gapu ta ammo ni Jesus ti motiboda, insungbatna: “No dumteng ti rabii, kunayo, ‘Nasayaatto ti paniempo, ta nalabaga ti tangatang,’ ket iti bigat, ‘Nalamiis ken agtudo ita, ta nalabaga ken nasipnget ti tangatang.’ Maibagayo ti paniempo babaen ti panangkitayo iti tangatang, ngem diyo mailawlawag ti kaipapanan dagiti mapaspasamak ita.” (Mateo 16:2, 3) Kalpasanna, imbaga ni Jesus kadagiti Fariseo ken Saduceo nga awan ti makitada a milagro malaksid iti milagro a napasamak ken Jonas.

Naglugan ni Jesus ken dagiti adalanna iti bangka ket nagturongda idiay Betsaida iti makin-amianan a daya nga igid ti baybay. Bayat nga agbibiaheda, nadlaw dagiti adalan a nalipatanda ti nagbalon iti umdas a tinapay. Maymaysa laeng ti naitugotda. Malagip ni Jesus ti nabiit pay a pannakisaritana kadagiti Fariseo ken kadagiti Saduceo a kakadua ni Herodes. Impakdaarna: “Agsiputkayo; agannadkayo iti lebadura dagiti Fariseo ken iti lebadura ni Herodes.” Impagarup dagiti adalan nga idi dinakamatna ti lebadura, ipalpalagipna a nalipatanda ti nagbalon iti tinapay. Idi nadlawna a kamali ti pampanunotenda, kinuna ni Jesus: “Apay nga agpipinnabasolkayo iti kaawan ti tinapayyo?”Marcos 8:15-17.

Kalkalpas laeng a pinakan ni Jesus ti rinibu. Gapuna, ammo koma dagiti adalan a saan a ti panagkurang iti literal a tinapay ti tuktukoyenna. Dinamagna: “Diyo kadi malagip? Idi pinispisik ti lima a tinapay para iti 5,000 a lallaki, mano a basket a napno kadagiti tedda ti naurnongyo?” Kinunada: “Sangapulo ket dua.” Kinuna pay ni Jesus: “Idi pinispisik ti pito a tinapay para iti 4,000  a lallaki, mano a dadakkel a basket a napno kadagiti tedda ti naurnongyo?” Insungbatda: “Pito.”—Mark 8:18-20.

Insaludsod ni Jesus: “Diyo kadi matarusan a saan a literal a tinapay ti ibagbagak kadakayo?” Kinunana pay: “Agannadkayo iti lebadura dagiti Fariseo ken Saduceo.”Mateo 16:11.

Naawatan met laengen dagiti adalan ti kayatna a sawen. Mausar ti lebadura a mangpaalsa iti tinapay. Ibagbaga ni Jesus a ti lebadura isimbolona ti pannakadadael. Pakpakdaaranna dagiti adalan nga agannadda iti “sursuro dagiti Fariseo ken Saduceo,” a makadadael ti epektona.Mateo 16:12.

Ammuem ti Ad-adu Pay

Panangpakan iti Adu Babaen Kadagiti Ima ti Sumagmamano

Kasano a nangipaay ni Jesus iti naespirituan a taraon kadagiti kongregasion idi umuna a siglo? Nangipasdek kadi iti padron para iti kaaldawantayo?