Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ni Jesus—Ti Dalan, ti Kinapudno, ti Biag

 KAPITULO 26

“Napakawanen Dagiti Basolmo”

“Napakawanen Dagiti Basolmo”

MATEO 9:1-8 MARCOS 2:1-12 LUCAS 5:17-26

  • PINAKAWAN NI JESUS DAGITI BASOL TI PARALITIKO KEN PINAIMBAGNA

Nadamdamagen dagiti tattao iti amin a lugar ti maipapan ken Jesus. Adu pay ketdi ti nagdaliasat uray kadagiti saan a mapagpagnaan a lugar tapno mangngeganda ti panangisurona ken makitada dagiti milagrona. Ngem kalpasan ti sumagmamano nga aldaw, nagsubli idiay Capernaum, ti sentro ti ministeriona. Dagus a nagdinamag ti panagsublina iti siudad nga adda iti igid ti Baybay ti Galilea. Gapuna, adu ti napan iti balay nga ayanna. Dadduma ket Fariseo ken mannursuro iti Linteg a naggapu iti intero a Galilea, Judea, ken Jerusalem.

“Nakaad-adu ti immay nga uray la awanen ti paglugaran ken awanen ti makastrek iti ridaw, ket rinugianna ida a kasabaan.” (Marcos 2:2) Ita, adda nakaskasdaaw a mapasamak. Makatulong daytoy kadatayo a mangtarus a kabaelan ni Jesus nga ikkaten ti makagapu iti panagsagaba ti tao ken kabaelanna a paimbagen ti amin a kayatna nga umimbag.

Bayat a mangisursuro ni Jesus iti balay a napunno iti tao, inyeg ti uppat a lallaki ti maysa a paralitiko a naipaidda iti bassit a pagiddaan. Kayatda a paimbagen ni Jesus ti gayyemda. Ngem gapu iti kaadu ti tao, “saanda a mayasideg ken Jesus.” (Marcos 2:4) Talaga a makapaupay dayta. Gapuna, immulida iti pangatepan ket inikkatda ti dadduma nga atep ti balay a batog ti ayan ni Jesus sada imbaba ti lalaki a nakaidda iti bassit a pagiddaan.

Nakaunget kadi ni Jesus iti panangistorboda? Saan! Nagsiddaaw unay iti pammatida ket kinunana iti paralitiko: “Napakawanen dagiti basolmo.” (Mateo 9:2) Ngem talaga kadi a mapakawan ni Jesus dagiti basol? Kinuestionaran dayta dagiti eskriba ken Fariseo. Kinunada: “Apay a kastoy ti ibagbaga daytoy a tao? In-insultuenna ti Dios. Adda kadi sabali a makapakawan iti basol no di laeng ti Dios?”—Marcos 2:7.

Gapu ta ammo ni Jesus ti pampanunotenda, kinunana kadakuada: “Apay a kasta ti pampanunotenyo? Ania ti nalaklaka nga ibaga iti paralitiko, ‘Napakawanen dagiti basolmo,’ wenno, ‘Bumangonka ken bagkatem ta pagiddaam ket magnaka’?” (Marcos 2:8, 9) Wen, maibatay iti daton nga ipaayto ni Jesus, kabaelanna a pakawanen dagiti basol ti lalaki.

Kalpasanna, impakitana kadagiti tattao, agraman kadagiti kumonkontra kenkuana, nga adda autoridadna a mangpakawan kadagiti basol ditoy daga. Imbagana iti paralitiko: “Bumangonka, bagkatem ta pagiddaam, ket agawidkan.” Dagus nga inaramid dayta ti lalaki, ket binagkatna ti iddana sa nagna a kumitkita dagiti adda sadiay. Nasdaaw dagiti tattao! Indaydayawda ti Dios ket impukkawda: “Ita pay laeng a nakakitatayo iti kastoy”!—Marcos 2:11, 12.

Makapainteres ta dinakamat ni Jesus a ti basol ket mainaig iti sakit ken ti pannakapakawan dagiti basol ket mainaig iti salun-at. Isursuro ti Biblia a nagbasol ti umuna a nagannaktayo, ni Adan, ket natawidtayo amin dagiti resulta ti basol, kas iti sakit ken ipapatay. Ngem iti sidong ti turay ti Pagarian ti Dios, pakawanento ni Jesus ti basol ti amin a mangay-ayat ken agserserbi iti Dios, ket naan-anayton a mapukaw ti sakit.—Roma 5:12, 18, 19.

Ammuem ti Ad-adu Pay

Mapakawan Kadi Dagiti Basoltayo?

Pakawanen kadi ti Dios uray dagiti nadagsen a basol? Ania ti aramidentayo no kayattayo a magun-od ti anamong ti Dios?