Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ni Jesus—Ti Dalan, ti Kinapudno, ti Biag

 KAPITULO 33

Panangtungpal iti Padto ni Isaias

Panangtungpal iti Padto ni Isaias

MATEO 12:15-21 MARCOS 3:7-12

  • DAGITI TATTAO INARIBUNGBONGANDA NI JESUS

  • TINUNGPALNA TI PADTO NI ISAIAS

Naammuan ni Jesus ti implano dagiti Fariseo ken ti partido ni Herodes a panangpapatayda kenkuana. Gapuna, napan iti Baybay ti Galilea a kaduana dagiti adalanna. Simmurot dagiti tattao a naggapu iti nadumaduma a lugar—manipud Galilea, kadagiti siudad iti igid ti baybay ti Tiro ken Sidon, iti makindaya a paset ti Karayan Jordan, iti Jerusalem, ken iti Idumea iti abagatan. Adu ti pinaimbag ni Jesus isu nga inaribungbongan ti amin nga adda nakaro a sakitna. Gapu ta saanda a mauray nga isu ti mangsagid kadakuada, immasidegda kenkuana tapno sagidenda.—Marcos 3:9, 10.

Nakaad-adu ti tao isu nga imbaga ni Jesus kadagiti adalanna a mangisaganada iti bangka nga usarenna tapno makaadayo iti igid ti baybay, ket saanen nga aribungbongan dagiti tattao. Kasta met, mabalinna ida nga isuro bayat a nakalugan iti bangka wenno mapan iti sabali a paset ti igid ti baybay tapno ad-adu ti matulonganna.

Nadlaw ni adalan a Mateo a ti ar-aramiden ni Jesus ket kaitungpalan ti “naipadto babaen ken propeta Isaias.” (Mateo 12:17) Ania dayta a padto?

“Daytoy ti adipenko a pinilik, ti dungdungnguek ken pakaragsakak! Itedkonto kenkuana ti espirituk, ket ipakitananto ti pudpudno a hustisia kadagiti nasion. Saanto a makiriri wenno agpukkaw, saanto met a mangngeg ti timekna kadagiti kalsada. Saannanto a rumeken ti naparpar a runo, ket saannanto nga iddepen ti agkurkuridemdem a pabilo, agingga nga agballigi ti kinahustisia. Mangnamnamanto dagiti nasion iti naganna.”—Mateo 12:18-21; Isaias 42:1-4.

Ni Jesus ti maipatpateg nga adipen nga inanamongan ti Dios. Inlawlawag ni Jesus no ania ti pudno a hustisia a linibeg dagiti ulbod a kaugalian ti relihion. Saan la ngaruden nga umiso ti panangyaplikar dagiti Fariseo iti Linteg ti Dios, saanda pay a kayat a tulongan dagiti masaksakit iti aldaw ti Sabbath! Idi impakita ni Jesus no ania ti kinahustisia nga anamongan ti Dios ken adda kenkuana ti espiritu ti Dios, binang-aranna dagiti tattao a madagdagsenan kadagiti di umiso a tradision. Gapuna, kayat dagiti lider ti relihion a papatayen ni Jesus. Nagdakes dayta!

Ania ti kaipapanan dagiti sasao a “saanto a makiriri wenno agpukkaw, saanto met a mangngeg ti timekna kadagiti kalsada”? No mangpaimbag idi ni Jesus, ibilinna kadagiti tattao, wenno uray kadagiti demonio “a dida ipadpadamag ti maipapan kenkuana.” (Marcos 3:12) Saanna a kayat  nga isu ket maam-ammo dagiti tattao babaen iti naariwawa a panangipakaammo kadagiti kalsada wenno kadagiti nadamdamagda.

Kasta met, imbaga ni Jesus ti makaliwliwa a mensahena kadagiti arig naparpar a runo, natukkol ken naibaddebaddek. Kaslada agkurkuridemdem a pabilo ti pagsilawan, a dandanin maiddep ti apuyna. Saan a rumeken ni Jesus ti naparpar a runo wenno iddepen ti agkurkuridemdem nga apuy ti pabilo. Imbes ketdi, ibangonna ti nanumo buyogen iti asi ken ayat. Pudno a ni Jesus daydiay mapangnamnamaan dagiti nasion!