Mapan iti linaonna

Mapan iti listaan dagiti linaonna

 KAPITULO 49

Nangasaba Idiay Galilea ken Sinanayna Dagiti Apostol

Nangasaba Idiay Galilea ken Sinanayna Dagiti Apostol

MATEO 9:35–10:15 MARCOS 6:6-11 LUCAS 9:1-5

  • NANGASABA MANEN NI JESUS IDIAY GALILEA

  • IMBAONNA DAGITI APOSTOL A MANGASABA

Nasaknapen ti nangasabaan ni Jesus iti agarup dua a tawen. Panawen kadin tapno bumannayat ken agrelaks? Saan. Palawaen pay ketdi ni Jesus ti ministeriona babaen ti ipapanna “iti amin a siudad ken purok [ti Galilea], ket nangisuro kadagiti sinagoga ken inkaskasabana ti naimbag a damag maipapan iti Pagarian ken pinaimbagna ti amin a kita ti sakit.” (Mateo 9:35) Ti nakitana ti nangkombinsir kenkuana a mangpalawa iti trabaho a panangasaba. Ngem kasano a maitungpalna daytoy?

Bayat ti panagdaliasat ni Jesus, nakitana a kasapulan dagiti tattao ti naespirituan a pannakapaimbag ken liwliwa. Kaslada karnero nga awan ti pastorna, nalalatan ken nabaybay-an. Naasian kadakuada ket kinunana kadagiti adalanna: “Adu ti anien ngem bassit ti agani. Ipakaasiyo ngarud iti Apo ti panagani a mangibaon kadagiti agani iti talonna.”—Mateo 9:37, 38.

Ammo ni Jesus no ania ti makatulong. Inayabanna ti 12 nga apostol ket pinagpaparisna iti sagdudua, isu nga innem a parisda a mangasaba. Kalpasanna, binilinna ida: “Dikay mapan iti kalsada dagiti nasion, ken saankayo a sumrek iti aniaman a siudad dagiti Samaritano; no di ket birokenyo laeng dagiti napukaw a karnero iti Israel. Inkayo ket ikasabayo: ‘Asidegen ti Pagarian ti langit.’”—Mateo 10:5-7.

Ti Pagarian nga ikasabada ket ti dinakamat ni Jesus iti modelo a kararag. “Asidegen ti Pagarian,” kayatna a sawen, addan ti dinutokan ti Dios nga Ari, ni Jesu-Kristo. Ngem ania ti mangpaneknek a dagiti adalanna ti pannakabagi ti Pagarian? Inikkan ida ni Jesus iti pannakabalin a mangpaimbag  kadagiti masakit ken mangpagungar pay kadagiti natay nga awan bayadna. Kasano ngaruden a maipaay ti kasapulan dagiti apostol, kas ti taraonda iti inaldaw?

Imbaga ni Jesus kadagiti adalanna a saanda nga agisagana iti material a kasapulanda iti panangasabada. Saanda nga agitugot iti balitok, pirak, wenno gambang. Saanda pay a mangitugot iti supot ti taraon wenno pagsukatanda wenno sandalias iti panagdaliasatda. Apay? Impanamnama ni Jesus kadakuada: “Maikari ti trabahador a maikkan iti taraon.” (Mateo 10:10) Dagiti umawat iti mensaheda ti mangipaay iti kasapulan dagiti adalan. Kinuna ni Jesus: “No mapankayo iti maysa a lugar ken adda umawat kadakayo, agyankayo iti balayna agingga a pumanawkayo sadiay.”—Marcos 6:10.

Nangted met ni Jesus iti bilin no kasano nga ikasabada kadagiti bumalay ti mensahe ti Pagarian. Kinunana: “No sumrekkayo iti balay, kablaawanyo dagiti bumalay. No awatendakayo, agtalinaed koma kadakuada ti talna nga inkablaawyo; ngem no saan, agtalinaed koma kadakayo ti talna. No saandakayo nga awaten wenno denggen, pampagenyo ti tapok kadagiti sakayo ket pumanawkayo iti dayta a balay wenno siudad.”—Mateo 10:12-14.

Mabalin pay ketdi a saan nga awaten ti intero a siudad wenno purok ti mensaheda. Ania ngarud ti mapasamak iti dayta a lugar? Imbaga ni Jesus a maukomdanto. Inlawlawagna: “Laglagipenyo a nalaglag-an ti dusa ti Sodoma ken Gomorra ngem ti dayta a siudad inton Aldaw ti Panangukom.”—Mateo 10:15.