MATEO 8:18, 23-27 MARCOS 4:35-41 LUCAS 8:22-25

  • PINAGTALNA NI JESUS TI NAPIGSA A BAGYO ITI BAYBAY TI GALILEA

Makabannog ti agmalem ni Jesus. Idi rumabiin, imbagana kadagiti adalanna: “Bumallasiwtayo iti baybay,” iti ballasiw ti Capernaum.—Marcos 4:35.

Masarakan ti Gerasenes iti makindaya nga igid ti Baybay ti Galilea. Pagaammo met daytoy a lugar kas Decapolis. Dagiti siudad ti Decapolis ti pagnanaedan ti adu a Griego, nupay adu met a Judio ti agnanaed sadiay.

Naammuan dagiti tattao ti ipapanaw ni Jesus idiay Capernaum. Adda dadduma pay a bangka a nangrugi a bumallasiw iti baybay. (Marcos 4:36) Kinapudnona, asideg laeng ti ballasiw ti baybay. Ti Baybay ti Galilea ket maysa a nalawa a dan-aw nga agarup 21 a kilometro ti kaatiddogna ken agarup 12 a kilometro ti kaakabana. Nupay kasta, saan a narabaw.

Nupay perpekto ni Jesus, nabannog latta gapu iti okupado a ministeriona. Gapuna, kalpasan a nangrugida nga aglayag, nagidda iti likud ti bangka, nagpungan, sa naturog.

Adu kadagiti apostol ti nalaing a bangkero, ngem saan a basta-basta daytoy a biaheda. Adda bambantay iti aglawlaw, ken masansan a nabara ti rabaw ti danum ti Baybay ti Galilea. No dadduma, sumabat ti nalamiis nga angin manipud kadagiti bantay iti napudot nga angin manipud iti baybay, isu a bigla nga adda tumaud a napigsa a bagyo. Kasta ti mapasamak itan. Idi kuan, maisabsabuagen dagiti dalluyon iti bangka. “Mapmapnon iti danum ti bangkada, ken delikadon ti kasasaadda.” (Lucas 8:23) Ngem naimas latta ti turog ni Jesus!

Inkarigatan dagiti mangngalap nga iturong ti bangka, gapu ta adun ti kapadasanda iti bagyo. Ngem naidumduma daytoy. Gapu ta mabutengda a matay, riniingda ni Jesus ket impukkawda: “Apo, isalakannakami, mataytayon!” (Mateo 8:25) Mabutbutengen dagiti adalan amangan no malmesda!

Idi nakariing ni Jesus, kinunana kadagiti apostol: “Apay a kasta unay ti butengyo? Nagbassit ketdin ti pammatiyo.” (Mateo 8:26) Kalpasanna, binilin ni Jesus ti angin ken ti baybay: “Agsardengka! Agtalnaka!” (Marcos 4:39) Nagsardeng ti bumanesbes nga angin ket limminak ti baybay. (Imbaga da Marcos ken Lucas daytoy a nakaskasdaaw a pasamak, umuna nga impaganetgetda a pinagtalna ni Jesus ti bagyo babaen ti milagro, sa dinakamatda ti kurang a pammati dagiti adalan.)

Panunotem ti epekto daytoy kadagiti adalan! Kalkalpas a nakitada a limminak ti nakadawdawel a baybay gapu iti napigsa a bagyo. Kasta unay ti butengda. Kinunada iti maysa ken maysa: “Asino a talaga daytoy? Uray ti angin ken baybay ket agtulnog kenkuana?” Idi agangay, natalged a nakasangladda iti ballasiw ti baybay. (Marcos 4:41–5:1) Nalabit nakasubli metten ti dadduma a bangka a naglayag iti makinlaud nga igid ti baybay.

Makaparagsak a maammuan a kabaelan ti Anak ti Dios a kontrolen ti paniempo! Inton iturongnan ti atensionna ditoy daga bayat ti panagturayna iti Pagarian, natalgedton nga agtaeng ti amin a tattao, ta awanton ti nakabutbuteng a kalamidad!