Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ni Jesus—Ti Dalan, ti Kinapudno, ti Biag

 KAPITULO 50

Nakasagana a Mangasaba Uray Maidadanes

Nakasagana a Mangasaba Uray Maidadanes

MATEO 10:16–11:1 MARCOS 6:12, 13 LUCAS 9:6

  • SINANAY KEN IMBAON NI JESUS DAGITI APOSTOL

Nangted ni Jesus iti bilin kadagiti apostolna no kasano nga itungpalda ti panangasabada. Ngem saan laeng a dayta ti imbagana. Pinakdaaranna met ida maipapan kadagiti bumusor: “Ibaonkayo a kas karnero iti tengnga dagiti lobo . . . Agannadkayo kadagiti tattao, ta idarumdakayto kadagiti korte ken saplitendakayto kadagiti sinagoga. Maipankayto kadagiti gobernador ken ari gapu kaniak.”—Mateo 10:16-18.

Wen, mabalin a maipasango dagiti pasurot ni Jesus iti nakaro a pannakaidadanes, ngem impasiguradona kadakuada: “No idarumdakayo, dikay madanagan no kasano ti isusungbatyo wenno ania ti ibagayo, ta addanto tumulong kadakayo; ta saan laeng a dakayo ti agsao, no di ket tulongannakayo ti espiritu ni Amayo.” Kinuna pay ni Jesus: “Ipapatayto met dagiti tattao ti mismo a kabsatda, wenno anakda, ket busorento dagiti annak dagiti nagannakda ken ipapataydanto ida. Guraendakayto ti amin a tattao gapu iti naganko, ngem ti makapagibtur agingga iti panungpalan, maisalakanto.”—Mateo 10:19-22.

Gapu ta ti panangasaba ti kapatgan, impaganetget ni Jesus a masapul a naannad dagiti pasurotna tapno maitultuloyda daytoy a trabaho. Kinunana: “No idadanesdakayo iti maysa a siudad, mapankayo iti sabali; ngem laglagipenyo a saanyonto pay a maileppas a kasabaan dagiti tattao kadagiti siudad ken ili ti Israel, dumtengton ti Anak ti tao.”—Mateo 10:23.

Nagsayaat dagita a bilin, pakdaar, ken pammaregta nga imbaga ni Jesus iti 12 nga apostolna! Ngem maawatantayo nga agpaay met dagita a sasao kadagiti makiraman iti trabaho a panangasaba kalpasan ti ipapatay ken panagungar ni Jesus. Makita dayta idi imbagana a dagiti adalanna ket ‘guraento ti amin a tattao,’ saan laeng a kadagidiay nakaibaonan dagiti apostol a kasabaanda. Kasta met, saantayo a mabasa a naipan dagiti apostol kadagiti gobernador ken ari bayat ti apagbiit a panangasabada idiay Galilea ken saan ida a pinapatay dagiti kapamiliada.

Nalawag nga idi imbaga ni Jesus dagita kadagiti apostol, pampanunotenna ti masanguanan. Paliiwem ti imbagana a saanto pay a maileppas dagiti adalanna a kasabaan dagiti nakaibaonanda, “dumtengton ti Anak ti tao.” Ibagbaga ni Jesus a saan pay a maileppas dagiti adalanna nga ikasaba ti Pagarian ti Dios, dumtengton ti nadayag nga Ari a ni Jesu-Kristo kas ukom ti Dios.

Bayat nga itungtungpalda ti panangasaba, saan koma a masdaaw dagiti apostol no maidadanesda, ta imbaga ni Jesus: “Saan a natantan-ok ti adalan ngem iti mangisursuro kenkuana, wenno ti adipen ngem iti amona.” Nalawag ti kayat a sawen ni Jesus. Naidadanes ken namaltrato  ni Jesus gapu iti panangikasabana iti Pagarian ti Dios, isu a maipasangoda met iti kasta. Ngem imparegta ni Jesus: “Dikay agbuteng kadagiti mangpapatay iti bagi ngem saanda a madadael ti biag; no di ket agbutengkayo iti daydiay makabael a mangdadael iti bagi ken iti biag idiay Gehenna.”—Mateo 10:24, 28.

Impakita ni Jesus ti ulidan. Situtured a nagibtur agingga iti ipapatay imbes a mapukawna ti kinamatalekna iti daydiay Mannakabalin-amin, ni Jehova. Ti laeng Mannakabalin-amin a Dios ti makabael a mangikkat iti namnama ti maysa a tao nga agbiag wenno makabael a mangpagungar kenkuana tapno maaddaan iti agnanayon a biag. Makapabileg la ketdi daytoy kadagiti apostol!

Inyilustrar ni Jesus ti naayat a panangaywan ti Dios kadagiti pasurotna. Kinunana: “Saan aya a ti dua a billit-tuleng ket mailako iti sinsilio a bassit ti pategna? Ngem no adda maysa kadakuada a matnag iti daga, ammo dayta ni Amayo. . . . Dikay ngarud agbuteng; napatpategkayo ngem iti adu a billit-tuleng.”—Mateo 10:29, 31.

Ti mensahe nga ikasaba dagiti adalan ni Jesus ket mamagsisina kadagiti pamilia, ta dadduma a miembro ti pamilia ket umawat ngem saan ti dadduma. Inlawlawag ni Jesus: “Diyo panunoten nga immayak mangyeg iti talna ditoy daga.” Wen, kasapulan ti maysa a miembro ti pamilia ti tured no awatenna ti kinapudno iti Biblia. Kinuna ni Jesus: “Ti dakdakkel ti panagayatna iti ama wenno inana ngem kaniak, saan a maikari kas adalak; ken ti dakdakkel ti panagayatna iti anakna a lalaki wenno babai ngem kaniak, saan a maikari kas adalak.”—Mateo 10:34, 37.

Ngem addanto dagiti mangawat kadagiti adalanna. Kinunana: “Ti mangted iti uray sangabaso laeng a nalamiis a danum iti maysa kadagitoy a nanumo a tattao gapu ta maysa nga adalan, sigurado a magunggonaanto.”—Mateo 10:42.

Napabileg dagiti apostol kadagiti bilin, pakdaar, ken pammaregta ni Jesus, isu a napanda “iti amin a purok tapno ikasabada ti naimbag a damag ken paimbagenda dagiti masakit.”—Lucas 9:6.

Ammuem ti Ad-adu Pay

TI BIBLIA—ANIA TI MENSAHENA?

Situtured a Nangasaba Dagiti Apostol

Ania ti napasamak idi Piesta ti Pentecostes? Ania ti reaksion dagiti kabusor iti panangasaba dagiti adalan ni Jesus?

AKTIBIDAD PARA ITI PANAGADAL ITI BIBLIA

Siraragsak nga Agibtur!

Ammuem dagiti nakatulong kada Pablo ken Silas a nagtalinaed a naragsak nupay naidadanesda.