Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ni Jesus—Ti Dalan, ti Kinapudno, ti Biag

 KAPITULO 59

Asino ti Anak ti Tao?

Asino ti Anak ti Tao?

MATEO 16:13-27 MARCOS 8:22-38 LUCAS 9:18-26

  • PINAIMBAG NI JESUS TI BULSEK A LALAKI

  • AWATEN NI PEDRO DAGITI TULBEK TI PAGARIAN

  • IMPAKPAKAUNA NI JESUS TI IPAPATAY KEN PANAGUNGARNA

Nakadanonen ni Jesus ken dagiti adalanna idiay Betsaida. Impanda ken Jesus ti maysa a bulsek a lalaki ken impakaasida a paimbagenna.

Kinibin ni Jesus ti lalaki ket impanna iti ruar ti purok. Kalpasan nga inyaprosna ti katayna kadagiti mata ti lalaki, dinamag ni Jesus kenkuana: “Adda kadin makitam?” Insungbat ti lalaki: “Adda tattao a makitkitak. Kasdala kaykayo a magmagna.” (Marcos 8:23, 24) Imparabaw ni Jesus dagiti imana iti mata ti lalaki ket nagsubli ti panagkitana. Pinagawidna a nalawagen ti panagkitana, ket imbilinna a saanen nga agsubli iti purok.

Nagpaamiananen ni Jesus ken dagiti adalanna idiay Cesarea Filipos. Agarup 40 a kilometro dayta a sang-atan. Dayta a purok ket 350 a metro ti kangatona manipud iti patar ti baybay. Adda iti amianan a daya ti nangato a Bantay Hermon a naabbungotan iti niebe. Mabalin a dua nga aldaw a daliasaten dayta.

Iti dalan, adda idi panawen nga agmaymaysa a napan nagkararag ni Jesus. Siam wenno sangapulo a bulan laengen sakbay ti ipapatayna, ket maseknan ni Jesus kadagiti adalanna. Nabiit pay nga adu ti saanen a simmurot kenkuana, ket mabalin a dadduma ti nariribukan wenno naupay. Pampanunotenda no apay a saanna nga inawat ti panangikagumaan dagiti tattao tapno aramidenda nga ari wenno apay a saan a nangted iti pagilasinan a mangipakita ti kinasiasinona.

Idi napan dagiti adalan iti pagkarkararaganna, dinamag ni Jesus: “Asino ti Anak ti tao iti panagkuna dagiti tattao?” Kinunada: “Adda dagiti agkuna nga isu ni Juan a Mammautisar, kuna met ti dadduma a ni Elias, ken adda pay dagiti agkuna a ni Jeremias wenno maysa kadagiti propeta.” Wen, pagarup dagiti tattao a ni Jesus ket maysa kadagiti tattao a napagungar manipud kadagiti natay. Tapno agpanunotda, insaludsodna kadagiti adalanna: “Dakayo ngay, asinoak iti panagkunayo?” Dagus nga insungbat ni Pedro: “Sika ti Kristo, ti Anak ti sibibiag a Dios.”Mateo 16:13-16.

Imbaga ni Jesus a naragsak ni Pedro ta impalgak ti Dios kenkuana dayta. Kinunana pay: “Ibagak met kenka: Sika ni Pedro. Bangonekto ti kongregasionko iti daytoy a bato, ket saanto nga agballigi ni patay iti dayta.” Kayat a sawen ni Jesus nga isu ket mangbangon iti kongregasion ket uray ti Tanem saan nga agballigi kadagiti miembrona no agtalinaedda a matalek ditoy daga. Inkarina ken Pedro: “Itedkonto kenka dagiti tulbek ti Pagarian ti langit.”Mateo 16:18, 19.

Saan a pinagbalin ni Jesus ni Pedro a kangrunaan kadagiti apostol. Saanna met a pinagbalin a pamuon ti kongregasion. Ni Jesus ti Bato a pakaibangonan ti kongregasionna. (1 Corinto 3:11; Efeso 2:20) Ngem makaawatto ni Pedro iti tallo a tulbek. Adda pribilehiona a manglukat iti gundaway para iti grupo dagiti tattao a makastrek iti Pagarian ti langit.

Usaren ni Pedro ti umuna a tulbek iti Pentecostes 33 C.E., nga ipakitana kadagiti agbabbabawi  a Judio ken proselita ti aramidenda tapno maisalakanda. Usarenna ti maikadua tapno maluktan ti gundaway kadagiti manamati a Samaritano tapno makastrekda iti Pagarian ti Dios. Kalpasanna, iti 36 C.E., usaren ni Pedro ti maikatlo tapno maaddaan iti gundaway dagiti di nakugit a Gentil, kas ken Cornelio ken ti dadduma pay.Aramid 2:37, 38; 8:14-17; 10:44-48.

Iti daytoy a pannakisaritana, mariribukan dagiti apostol idi impakpakauna ni Jesus ti panagrigat ken ti ipapatayna idiay Jerusalem. Gapu ta saan nga ammo ni Pedro a mapagungar ni Jesus ket agbiag idiay langit, inyadayona ni Jesus ket tinubngarna a kunkunana: “Kaasiam ta bagim, Apo; dinto pulos mapasamak kenka dayta.” Ngem tinallikudan ni Jesus ni Pedro ket kinunana: “Adaywannak, Satanas! Laplapdannak a mangaramid iti pagayatan ti Dios, ta saan a ti pampanunot ti Dios ti pampanunotem no di ket ti pampanunot dagiti tattao.”Mateo 16:22, 23.

Inayaban met ni Jesus ti dadduma, ket inlawlawagna a saan a nalaka ti agbalin a pasurotna. Kinunana: “Asinoman a mayat a sumurot kaniak, tallikudanna koma ti bagina ket bagkatenna ti kayona a pagtutuokan ken agtultuloy a surotennak. Ta asinoman a mayat a mangisalakan iti biagna, matayto. Ngem asinoman a matay maigapu kaniak ken iti naimbag a damag, agbiagto manen.”Marcos 8:34, 35.

Gapuna, tapno magun-od dagiti pasurot ni Jesus ti anamongna, masapul nga agbalinda a natured ken managsakripisio. Kinuna ni Jesus: “Ti mangibain kaniak ken iti ibagbagak iti daytoy di matalek iti Dios ken managbasol a henerasion, ibainto met ti Anak ti tao inton umay iti dayag ni Amana, a kaduana dagiti nasantuan nga anghel.” (Marcos 8:38) Wen, inton umay ni Jesus, “ipaayna ti maitutop iti tunggal maysa sigun iti aramidna.”Mateo 16:27.