Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ni Jesus—Ti Dalan, ti Kinapudno, ti Biag

 KAPITULO 42

Binabalaw ni Jesus Dagiti Fariseo

Binabalaw ni Jesus Dagiti Fariseo

MATEO 12:33-50 MARCOS 3:31-35 LUCAS 8:19-21

  • IMBAGA NI JESUS TI MAIPAPAN ITI ‘MILAGRO A NAPASAMAK KEN JONAS’

  • NASINGSINGED DAGITI ADALAN NGEM PAMILIA

Idi saan a patien dagiti eskriba ken Fariseo a parparuaren ni Jesus dagiti demonio babaen ti pannakabalin ti Dios, ipakpakitada a tabtabbaawanda ti nasantuan nga espiritu. Gapuna, asino ti dasiganda—ti Dios wenno ni Satanas? Kinuna ni Jesus: “No nasayaat ti kayom, nasayaatto ti bungana; no dakes ti kayom, dakesto met ti bungana. Ta mailasin ti kayo babaen ti bungana.”—Mateo 12:33.

Saan nga umiso nga ibaga a ti nasayaat a resulta ti panangparuar ni Jesus kadagiti demonio ket gapu iti panagserbina ken Satanas. Inlawlawag ni Jesus dayta iti Sermonna iti Bantay idi kinunana a no nasayaat ti kayo, nasayaat ti bungana, saan a dakes. Ngarud, ania ti ipakita ti bunga dagiti Fariseo, ti di umiso nga ipabpabasolda ken Jesus? Ipakitana a dakesda. Kinuna ni Jesus kadakuada: “Dakayo nga annak ti uleg, kasano a makapagsaokayo iti naimbag idinto ta dakeskayo? Ta sawen ti ngiwat ti linaon ti puso.”—Mateo 7:16, 17; 12:34.

Wen, makita iti ibagatayo ti kasasaad ti pusotayo ken mangted iti pakaibatayan ti pannakaukom. Gapuna, kinuna ni Jesus: “Ibagak kadakayo nga inton Aldaw ti Panangukom, manungsungbatto dagiti tattao iti awan mamaayna nga imbagada; ta babaen ti sasaom maideklarakanto a nalinteg wenno nakabasol.”—Mateo 12:36, 37.

Uray no adu dagiti milagro nga ar-aramiden ni Jesus, kayat dagiti eskriba ken Fariseo ti ad-adu pay: “Mannursuro, mangaramidka man iti milagro.” Nakitada man ni Jesus a nagaramid iti milagro wenno saan, adun ti nakakita iti ar-aramidenna. Imbaga ngarud ni Jesus kadagiti lider dagiti Judio: “Agtultuloy nga agbirok iti milagro ti dakes ken di matalek a henerasion, ngem awanto ti makitada malaksid iti milagro a napasamak ken propeta Jonas.”—Mateo 12:38, 39.

Saan ida a pinagpanunot ni Jesus maipapan iti kayatna a sawen. Inlawlawagna: “No kasano nga adda idi ni Jonas iti tian ti dakkel nga ikan iti tallo nga aldaw ken tallo a rabii, addanto met ti Anak ti tao iti uneg ti daga iti tallo nga aldaw ken tallo a rabii.” Inalimon ti maysa a dakkel nga ikan ni Jonas ngem rimmuar a kasla napagungar. Ipakpakauna ngarud ni Jesus nga isu ket matay ken agungar iti maikatlo nga aldaw. Inton mapasamak dayta, saanto a patien dagiti Judio a lider ti ‘milagro a napasamak ken Jonas,’ ket saanda nga agbabawi ken agbalbaliw. (Mateo 27:63-66; 28:12-15) Ngem nagbabawi “dagiti taga-Nineve” idi kinasabaan ida ni Jonas. Gapuna, babalawendanto daytoy a henerasion. Imbaga pay ni Jesus a babaen iti ulidanna, babalawento met ida ti reyna ti Sheba a dimngeg ken nagsiddaaw iti sirib ni Solomon. Ita, kinuna ni  Jesus: “Adda ditoy ti natantan-ok ngem ni Solomon.”—Mateo 12:40-42.

Inyarig ni Jesus ti kasasaad daytoy a dakes a henerasion iti maysa a tao a rimmuaran ti dakes nga espiritu. (Mateo 12:45) Gapu ta saanna a sukatan iti naimbag a bambanag ti nagpanawan ti dakes nga espiritu, agsubli dayta ken mangikuyog iti pito a dakdakes pay nga espiritu ket lugananda manen. Kasta met, nadalusan ken nagbalbaliwen ti nasion ti Israel, kas iti tao a rimmuaran ti dakes nga espiritu. Ngem linaksid ti nasion dagiti propeta ti Dios isu a nalawag a binusorda idi agangay daydiay addaan iti espiritu ti Dios, ni Jesus. Ipakita daytoy a dakdakes ti kasasaad ti nasion ngem idi damo.

Bayat nga agsasao ni Jesus, simmangpet ti inana ken dagiti kakabsatna ket nagtakderda iti likudan dagiti tattao. Kinuna ti dadduma nga adda iti asidegna: “Nakatakder iti ruar ni nanangmo ken dagiti kakabsatmo. Kayatdaka a makita.” Impakita ni Jesus no kasano ti kasingedna kadagiti adalanna, a kasla pudno a kakabsatna a lallaki ken babbai, ken inna. Intudona dagiti adalanna, ket kinunana: “Ti inak ken dagiti kakabsatko ket isu dagitoy dumdumngeg iti sao ti Dios ken mangtungtungpal iti dayta.” (Lucas 8:20, 21) Impakitana ngarud a kasanoman kapateg ti relasionna kadagiti kabagianna, napatpateg ti relasionna kadagiti adalanna. Talaga a maragsakantayo ta addaantayo iti nadekket a relasion kadagiti naespirituan a kakabsattayo, nangruna no pagduaduaan wenno uyawendatayo ti dadduma ken ti nasayaat nga ar-aramidentayo!