Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ni Jesus—Ti Dalan, ti Kinapudno, ti Biag

 KAPITULO 56

Ania a Talaga ti Mangrugit iti Maysa a Tao?

Ania a Talaga ti Mangrugit iti Maysa a Tao?

MATEO 15:1-20 MARCOS 7:1-23 JUAN 7:1

  • IMBUTAKTAK NI JESUS TI TRADISION DAGITI TATTAO

Dandani idin ti Paskua ti 32 C.E. Okupado ni Jesus a mangisursuro idiay Galilea. Kalpasanna, mabalin a nagturongen idiay Jerusalem para iti Paskua, kas ibilin ti Linteg ti Dios. Nupay kasta, naannad ni Jesus gapu ta kayat a papatayen dagiti Judio. (Juan 7:1) Kalpasanna, nagsubli idiay Galilea.

Nalabit adda ni Jesus idiay Capernaum idi napan kenkuana dagiti eskriba ken Fariseo manipud Jerusalem. Apay a napanda kenkuana? Agsapsapulda iti pangidarumanda ken Jesus mainaig iti relihionda. Insaludsodda: “Apay a saan a sursuroten dagiti adalam ti nagkauna a tradision? Kas pagarigan, saanda a bugbugguan ti imada sakbay a manganda.” (Mateo 15:2) Pulos a saan nga imbilin ti Dios nga aramidenda daytoy a kaugalian a ‘panangbuggo iti ima agingga iti siko.’ (Marcos 7:3) Ngem ibilang dagiti Fariseo a nadagsen a basol ti saan a panagbuggo agingga iti siko.

Imbes a sungbatan ni Jesus ti pammabasolda, impamatmatna nga igaggagarada a salungasingen ti Linteg ti Dios. Insaludsodna: “Apay a saanyo a tungtungpalen ti bilin ti Dios gapu iti tradisionyo? Kas pagarigan, kinuna ti Dios, ‘Respetuem ni tatang ken nanangmo,’ ken, ‘Mapapatay ti agsao iti dakes maibusor iti ama wenno inana.’ Ngem kunayo, ‘Asinoman nga agkuna iti ama wenno inana: “Ti adda kaniak ket naikarin nga itedko iti Dios isu a saankayon a matulongan,” saannan a kasapulan a tulongan ni amana.’”—Mateo 15:3-6; Exodo 20:12; 21:17.

Ibaga dagiti Fariseo a ti kuarta, sanikua, wenno aniaman a naited kas sagut iti Dios ket agpaay iti templo, isu a saan a mabalin nga usaren iti sabali a panggep. Ngem iti kinapudnona, saan pay met a naited iti templo ti naidedikar a sagut. Kas pagarigan, mabalin nga ibaga ti anak a ti kuartana wenno sanikuana ket “corban,” sagut a naidedikar iti Dios wenno iti templo, a kasla ketdin ti templo ti kangrunaan a pagpaayan ti sagut. Ti kuarta wenno sanikua ket adda pay laeng iti anak, ngem ibagana a saan a mabalin nga usaren dayta a pangtulong iti lakay ken baketen a nagannakna nga agkasapulan. Iti kasta, likliklikanna ti rebbengenna kadakuada.Marcos 7:11.

Talaga a makapungtot ni Jesus iti kastoy a panangtiritir iti Linteg ti Dios ket kinunana: “Pagbalbalinenyo nga awan serserbi ti sao ti Dios gapu iti tradisionyo. Dakayo a managinsisingpet, agpayso ti impadto ni Isaias maipapan kadakayo: ‘Daydayawendak dagitoy a tattao iti bibigda ngem adayo kaniak ti pusoda. Awan serserbina a daydayawendak, ta dagiti isursuroda ket bilin laeng ti tattao.’” Awan ti maisungbat dagiti Fariseo iti nakaro a panangbabalaw ni Jesus kadakuada. Gapuna, pinaasidegna dagiti tattao. Kinunana kadakuada: “Dumngegkayo ken tarusanyo daytoy: Ti mamagbalin a narugit iti tao ket saan a ti sumrek iti ngiwatna no di ket ti rummuar iti dayta.”Mateo 15:6-11; Isaias 29:13.

Idi addan ni Jesus iti maysa a balay, insaludsod dagiti adalan: “Ammom kadi a nakapungtot dagiti Fariseo iti imbagam?” Insungbatna: “Tunggal mula a saan nga immula ni Amak idiay langit maparutto. Bay-anyo ida. Bulsekda a mangidaldalan. No ti bulsek idalanna ti padana a bulsek, matnagdanto iti abut.”Mateo 15:12-14.

Agparang a nasdaaw ni Jesus idi kiniddaw ni Pedro nga ilawlawagna kadagiti adalan no ania ti mangrugit iti maysa a tao. Insungbat ni Jesus: “Saanyo kadi nga ammo a ti sumrek iti ngiwat ket mapan iti tian sa rummuar iti bagi? Ngem ti rummuar iti ngiwat agtaud iti puso, ket dagita ti mamagbalin a narugit iti maysa a tao. Kas pagarigan, ti puso ti pagtaudan ti dakes a panagpampanunot, pammapatay, pannakikamalala, seksual nga immoralidad, panagtakaw, panagulbod, ken panangpadakes. Dagitoy ti mamagbalin  a narugit iti maysa a tao, saan a ti pannanganna a di nabugguan ti imana.”Mateo 15:17-20.

Saan nga iparparit ni Jesus ti panagbalin a nadalus ken saanna nga ibagbaga a saan nga agbuggo ti maysa a tao sakbay nga agisagana iti taraon wenno sakbay a mangan. Imbes ketdi, kagurana ti kinamanaginsisingpet dagiti lider ti relihion a mangsuksukir kadagiti linteg ti Dios ket sursurotenda dagiti tradision ti tao. Kinapudnona, dagiti dakes nga aramid nga agtaud iti puso ti mangrugit iti maysa a tao.