Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ni Jesus—Ti Dalan, ti Kinapudno, ti Biag

 KAPITULO 34

Pinili ni Jesus ti Sangapulo ket Dua nga Apostol

Pinili ni Jesus ti Sangapulo ket Dua nga Apostol

MARCOS 3:13-19 LUCAS 6:12-16

  • TI 12 NGA APOSTOL

Nasuroken a maysa ket kagudua a tawen manipud idi impakaammo ni Juan a Mammautisar a ni Jesus ti Kordero ti Dios. Idi inrugi ni Jesus ti ministeriona, addada napudno a lallaki a nagbalin nga adalanna, kas kada Andres, Simon Pedro, Juan, nalabit ni Santiago (kabsat ni Juan), Felipe, ken ni Bartolome (maawagan met Natanael). Idi agangay, adu pay ti nagbalin a pasurot ni Kristo.—Juan 1:45-47.

Nakasaganan ni Jesus a mangpili kadagiti apostolna. Dagitoy dagiti nasinged a kakaduana ken maipaayandanto iti naisangsangayan a pannakasanay. Ngem sakbay a pinilina ida, napan ni Jesus iti bantay, a mabalin nga iti asideg ti Baybay ti Galilea a saan nga adayo iti Capernaum. Agpatnag a nagkararag ni Jesus, a kiniddawna ti sirib ken bendision ti Dios. Kabigatanna, inayabanna dagiti adalanna ket nangpili iti 12 nga apostol manipud kadagiti adalanna.

Pinili ni Jesus ti innem a nainaganan iti rugi, kasta met ni Mateo, nga inawis ni Jesus manipud iti pagbayadan iti buis. Ti lima pay a napili ket da Judas (naawagan met Tadeo ken “anak ni Santiago”), Simon a Cananeo, Tomas, Santiago nga anak ni Alfeo, ken Judas Iscariote.—Mateo 10:2-4; Lucas 6:16.

Nakaduan ni Jesus a nagdaliasat ti 12 nga apostol, ken am-ammona idan. Dadduma kadakuada ti kabagianna. Ti agkabsat a da Santiago ken Juan ket kasinsin ni Jesus. No kas iti ipagarup ti dadduma nga agkabsat da Alfeo ken Jose a pannakaama ni Jesus, agkasinsin ngarud da Jesus ken apostol Santiago nga anak ni Alfeo.

Wen, kabesado ni Jesus ti nagan dagiti apostolna. Ngem kabesadom met kadi ida? Makatulong no laglagipem nga adda dua nga agnagan iti Simon, dua ti agnagan iti Santiago, ken dua ti agnagan iti Judas. Ni Simon (Pedro) ket adda kabsatna nga agnagan Andres, ken ni Santiago (anak ni Zebedeo) ket adda kabsatna nga agnagan Juan. Kasta ti pamay-an ti pananglagip iti nagan dagiti walo nga apostol. Ti sabali pay nga uppat ket ti agsingsingir iti buis (Mateo), daydiay nagduadua idi agangay (Tomas), daydiay naayaban iti sirok ti kayo (Natanael), ken ti gayyem ni Natanael (Felipe).

Ti 11 kadagiti apostol ket manipud Galilea, ti teritoria ni Jesus. Taga-Cana ni Natanael. Idiay Betsaida ti naggapuan da Felipe, Pedro, ken Andres. Idi agangay, da Pedro ken Andres immakarda idiay Capernaum, a mabalin a pagnanaedan ni Mateo. Agnanaed met da Santiago ken Juan idiay Capernaum wenno iti asidegna, ken adda negosioda a panagkalap. Ni laeng Judas Iscariote, a nangtraidor ken Jesus idi agangay, ti apostol a mabalin a manipud Judea.