Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ni Jesus—Ti Dalan, ti Kinapudno, ti Biag

 KAPITULO 87

Nasaksakbay nga Agplano—Usaren ti Kinasirib

Nasaksakbay nga Agplano—Usaren ti Kinasirib

LUCAS 16:1-13

  • ILUSTRASION MAIPAPAN ITI DI MAPAGTALKAN A MAYORDOMO

  • “USARENYO A PAKIGAYYEM” DAGITI KINABAKNANGYO

Ti ilustrasion nga insalaysay ni Jesus maipapan iti napukaw nga anak ti namagpanunot koma kadagiti dumdumngeg nga agsingsingir iti buis, eskriba, ken Fariseo a situtulok ti Dios a mangpakawan kadagiti agbabbabawi a managbasol. (Lucas 15:1-7, 11) Ita, kasarita ni Jesus dagiti adalanna. Nagusar iti sabali nga ilustrasion maipapan iti baknang a nakadamag a saan a nasayaat ti inaramid ti agay-aywan iti balayna, wenno mayordomo.

Insalaysay ni Jesus a saan nga umiso ti panangaywanna iti sanikua ti amona. Gapuna, imbaga ti amona nga ikkatenna ti mayordomo. “Ania ngatan ti aramidek?” kinuna ti mayordomo, “Ikkatennak metten ni amok iti trabahok. Diak kabaelan ti agtalon, ken mabainak nga agpalimos.” Tapno masolusionan ti problemana, kinunana: “A, ammokon ti aramidek, tapno inton maikkatak iti trabahok, awatendakto dagiti tattao kadagiti pagtaenganda.” Inayabanna ngarud dagiti nakautang iti amona ket kinunana: “Mano ti utangmo iti amok?”Lucas 16:3-5.

Kinuna ti umuna: “100 a bariles a lana ti olibo.” Agarup 2,200 a litro ti lana dayta. Mabalin nga addaan ti immutang iti nalawa a pagmulaan ti olibo wenno mabalin nga agnegnegosio iti lana. Imbaga ti mayordomo: “Alaem ti listaan ti utangmo. Agtugawka ket darasem nga isurat ti 50 [1,100 a litro].”Lucas 16:6.

Dinamagna met iti sabali: “Mano met ti utangmo?” Insungbatna: “100 a sako a trigo.” Agarup 22,000 a litro dayta. Kinuna ti mayordomo iti daytoy nga immutang: “Alaem ti listaan ti utangmo ket isuratmo ti 80.” Ngarud, kinissayanna ti utang iti 20 a porsiento.Lucas 16:7.

Ay-aywanan pay laeng ti mayordomo dagiti sanikua ti amona, isu nga adda karbenganna a mangkissay iti utang dagiti tattao iti amona. Gapu iti dayta, makigaygayyem ti mayordomo kadagiti mabalin a tumulongto kenkuana inton maikkat iti trabahona.

Naammuan ti amo ti napasamak. Nupay napukawan ti amo gapu iti napasamak, pinadayawanna ti mayordomo, “ta uray no dakes, nainsiriban ti inaramidna.” Kinuna pay ni Jesus: “Nalalaing nga agipamuspusan dagiti tattao iti daytoy a sistema ngem kadagiti agserserbi iti Dios.”Lucas 16:8.

Saan a pampanuynoyan ni Jesus ti inaramid ti mayordomo, wenno iparparegta ti panagkusit iti negosio. Ania ngarud ti iparparegtana? Imbagana kadagiti adalanna: “Usarenyo a pakigayyem dagiti kinabaknang iti daytoy a lubong, tapno inton maibus dagita, awatendakayto kadagiti agnanayon a pagnaedan.” (Lucas 16:9) Wen, adda maadaltayo maipapan iti panagsakbay ken ti panangusar iti kinasirib. Dagiti annak ti lawag, wenno dagiti “agserserbi iti Dios,” masapul nga usarenda dagiti sanikuada iti nainsiriban a pamay-an, a pampanunotenda ti agnanayon a masanguanan.

 Ni laeng Jehova a Dios ken ti Anakna ti mabalin a mangawat iti maysa iti nailangitan a Pagarian wenno iti Paraiso a daga nga iturayan ti Pagarian. Ikagumaantayo koma ti makigayyem kadakuada babaen ti panangusartayo iti material a sanikuatayo a mangsuportar iti trabaho a mainaig iti Pagarian. No kasta, masiguradotayo ti agnanayon a masanguanantayo inton awanen ti pateg ti balitok, pirak, ken dadduma pay a kinabaknang.

Imbaga met ni Jesus a dagiti mapagtalkan iti panangaywan ken panangusarda iti kinabaknang wenno material a sanikuada ket mapagtalkandanto met a mangaywan kadagiti napatpateg a bambanag. Imbaga ni Jesus: “Isu a no saanyo a maipakita a mapagtalkankayo iti kinabaknang daytoy a lubong, asinonto ngarud ti mangitalek kadakayo iti agpaypayso a kinabaknang [kas iti sanikua ti Pagarian]?”Lucas 16:11.

No kasta, ipakpakita ni Jesus kadagiti adalanna nga ad-adu ti makalikaguman kadakuada no kayatda ti maawat nga agnaed “kadagiti agnanayon a pagnaedan.” Saan nga agbalin a pudno nga adipen ti Dios ti maysa nga adipen met ti kinabaknang. Kinuna ni Jesus: “Awan ti makapagserbi iti dua nga amo; ta mabalin a guraenna ti maysa ket ayatenna ti sabali, wenno matalek iti maysa ket tallikudanna ti sabali. Diyo mapaggiddan ti agserbi iti Dios ken iti Kinabaknang.”Lucas 16:9, 13.