Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ni Jesus—Ti Dalan, ti Kinapudno, ti Biag

 KAPITULO 90

“Ti Panagungar ken ti Biag”

“Ti Panagungar ken ti Biag”

JUAN 11:17-37

  • NATAYEN NI LAZARO IDI SIMMANGPET NI JESUS

  • “TI PANAGUNGAR KEN TI BIAG”

Manipud Perea, nakadanon ni Jesus iti asideg ti Betania, purok nga agarup tallo a kilometro manipud iti daya ti Jerusalem. Agladladingit da Maria ken Marta gapu ti ipapatay ti kabsatda a ni Lazaro. Adu ti napan nangliwliwa kadakuada.

Adda nangibaga ken Marta nga asidegen ni Jesus, isu a nagdardaras a napan simmabat. Imbagana ken Jesus ti pampanunotenda nga agkabsat iti uppat nga aldaw: “Apo, no addaka koma idi ditoy, saan koma a natay ti kabsatko.” Ngem saan a gapu ta naawananen iti namnama. Kinunana: “Mamatiak latta nga aniaman a kiddawem iti Dios, patgannanto.” (Juan 11:21, 22) Ammona a matulongan pay ni Jesus ti kabsatda.

Simmungbat ni Jesus: “Agbiagto ti kabsatmo.” Impapan ni Marta a ti tuktukoyenna ket ti masanguanan a panagungar ditoy daga, ti namnama ni Abraham ken ti sabsabali pay. Imbagana a mamati a mapasamak dayta: “Ammok nga agbiagto inton panagungar iti maudi nga aldaw.”Juan 11:23, 24.

Ngem kabaelan kadi ni Jesus ti mangipaay a dagus iti solusion iti daytoy a kasasaad? Impalagipna ken Marta nga adda inted ti Dios kenkuana a pannakabalin a mangpagungar. Kinunana: “Ti agtultuloy a mangipakita iti pammati kaniak, uray no matay, agbiagto; ken asinoman a sibibiag nga agtultuloy a mangipakita iti pammati kaniak, saanto a matay.”Juan 11:25, 26.

Saan nga ibagbaga ni Jesus a saanen a matay dagiti sibibiag idi nga adalanna. Uray ni Jesus masapul a matay, kas imbagana kadagiti apostolna. (Mateo 16:21; 17:22, 23) Ipagpaganetgetna a mangiturong iti biag nga agnanayon ti panangipakita iti pammati kenkuana. Adu ti mamati a magun-odan ti kasta a biag babaen ti panagungar. Nupay kasta, mabalin a saan a matay dagiti matalek a makalasat iti panungpalan daytoy a sistema. Iti aniaman kadagitoy, sigurado a saan a makapasar iti agnanayon nga ipapatay dagiti mangipakita iti pammati kenkuana.

Imbaga ni Jesus: “Siak ti panagungar ken ti biag.” Ngem matulonganna ngata ni Lazaro nga uppat nga aldawen a natay? Dinamag ni Jesus ken Marta: “Mamatika kadi iti daytoy?” Simmungbat ni Marta: “Wen, Apo, mamatiak a sika ti Kristo, ti Anak ti Dios, daydiay umay ditoy lubong.” Mamati ni Marta nga adda aramiden ni Jesus iti dayta nga aldaw isu a nagdardaras a nagawid ket imbagana iti kabsatna: “Addan ti Mannursuro ket damdamagennaka.” (Juan 11:25-28) Gapuna, pimmanaw ni Maria iti balay, ket simmurot met ti dadduma ta impagarupda a mapan iti tanem ni Lazaro.

Napan ni Maria ken Jesus, nagruknoy iti sakaananna, ket nagsangit nga inulitna ti imbaga ti kabsatna: “Apo, no addaka koma idi ditoy, saan koma a natay ti kabsatko.” Nagladingit, nariribukan, ken nagsangit ni Jesus idi nakitana nga agsangsangit ni Maria ken dagiti tattao. Nagladingit met dagiti agbuybuya. Ngem insaludsod ti dadduma: ‘No napaimbag ni Jesus ti lalaki a nayanak a bulsek, saan kadi a kabaelanna met koma a linapdan ti ipapatay ni Lazaro?’Juan 11:32, 37.