Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ni Jesus—Ti Dalan, ti Kinapudno, ti Biag

 KAPITULO 82

Ti Ministerio ni Jesus Idiay Perea

Ti Ministerio ni Jesus Idiay Perea

LUCAS 13:22–14:6

  • IKAGUMAAN TI SUMREK ITI AKIKID A RUANGAN

  • MASAPUL NGA IDIAY JERUSALEM TI PAKATAYAN NI JESUS

Nangisuro ken nangagas idi ni Jesus idiay Judea ken Jerusalem. Kalpasanna, binallasiwna ti Karayan Jordan tapno mangisuro kadagiti siudad idiay Perea. Ngem di agbayag, agsublinto idiay Jerusalem.

Idi adda ni Jesus idiay Perea, insaludsod ti maysa a lalaki: “Apo, manmano laeng kadi ti maisalakan?” Mabalin nga ammo ti lalaki a pagdedebatean dagiti lider ti relihion no adu wenno manmano laeng ti maisalakan. Imbes a sungbatan ni Jesus dayta, imbagana no ania ti masapul nga aramiden tapno maisalakan. Kinunana: “Ikagumaanyo ti sumrek iti akikid a ruangan.” Wen, masapul ti panagregget. Apay? Inlawlawag ni Jesus: “Ibagak kadakayo nga adu dagiti mayat a sumrek ngem saanda a kabaelan.”Lucas 13:23, 24.

Impaganetget ni Jesus a masapul ti panagregget. Inyilustrarna: “Inton bumangon ti bumalay ken iserranan ti ruangan, agtakderkayto iti ruar nga agtuktok iti ruangan, a kunkunayo: ‘Apo, pastrekennakami.’ . . . Ngem ibagananto kadakayo, ‘Saankayo nga am-ammo! Pumanawkayo, dakayo amin nga agar-aramid iti kinakillo!’”Lucas 13:25-27.

Iladawan dayta ti napasaran ti lalaki nga immay iti rabii—a mabalin a dayta ti tiempo a kombiniente kenkuana—ngem nakarikepen ti ruangan. Nasapsapa koma nga immay, uray no saan a kombiniente dayta kenkuana. Kasta ti kasasaad ti adu a mabalin a nagunggonaan koma iti panangisuro ni Jesus bayat ti kaaddana sadiay. Saanda a pinagbalin a kangrunaan a panggep ti biagda ti pudno a panagdayaw. Kaaduan kadagiti nakaibaonan ni Jesus ti saan a nangawat iti impaay ti Dios a gundaway a maisalakan. Kinuna ni Jesus nga ‘agsangitdanto ken agngaretngetto dagiti ngipenda’ inton maipuruakda iti ruar. Ngem “dagiti tattao manipud iti daya, laud, amianan, ken abagatan,” wen, manipud iti amin a nasion, “makisangodanto iti lamisaan iti Pagarian ti Dios.”Lucas 13:28, 29.

Inlawlawag ni Jesus: “Addanto dagiti maudi [kas kadagiti saan a Judio ken dagiti maipabpababa a Judio] nga umuna, ket addanto met dagiti umuna [dagiti maipangpangruna a Judio a mangipampannakkel a kaputotan ida ni Abraham] a maudi.” (Lucas 13:30) Natukoy a “maudi” dagitoy a saan a managyaman a Judio gapu ta saandanto a pulos nga agbalin a paset ti Pagarian ti Dios.

Dadduma a Fariseo ti napan ken Jesus ket kinunada: “Rummuarka. Pumanawkan ditoy, ta kayatnaka a patayen ni Herodes [Antipas].” Nalabit ni Ari Herodes a mismo ti nangrugian dayta a damag tapno pumanaw ni Jesus sadiay. Mabalin a mabuteng ni Herodes a mairaman iti pannakapapatay ti sabali manen a propeta, kas ti pannakairamanna iti pannakapapatay ni Juan a Mammautisar. Ngem imbaga ni Jesus kadagiti Fariseo: “Inkay ibaga iti dayta a sora: ‘Ita ken inton bigat, paruarek dagiti demonio ken paimbagek dagiti masakit, ngem inton maikatlo nga aldaw, malpaston ti trabahok.’”  (Lucas 13:31, 32) Idi inawagan ni Jesus a “sora” ni Herodes, mabalin a tuktukoyenna ti kinasikap dagiti sora. Ngem ni Jesus ket saan a madiktaran wenno mapapanaw ni Herodes wenno uray asinoman. Tungpalenna ti impaaramid kenkuana ni Amana, nga aramidenna dayta iti tiempo nga inkeddeng ti Dios, saan a ti inkeddeng ti tao.

Intuloy ni Jesus ti ipapanna idiay Jerusalem ta kas iti kinunana, “saan a mabalin a mapapatay ti propeta iti ruar ti Jerusalem.” (Lucas 13:33) Awan ti padto iti Biblia nga agkuna a masapul a matay ti Mesias iti dayta a siudad. Apay ngarud nga ibagbaga ni Jesus a mapapatay sadiay? Gapu ta ti Jerusalem ti kabesera, nga ayan ti nangato a korte ti Sanhedrin, nga addaan iti 71 a miembro ken dayta ti pakabistaan dagiti maakusaran kas ulbod a propeta. Kasta met, idiay ti pagidatonan kadagiti animal. Gapuna, ammo ni Jesus nga isu ket saan a mabalin a mapapatay iti uray sadino lattan.

Insennaay ni Jesus: “Jerusalem, Jerusalem, a nangpapatay kadagiti propeta ken nangubor kadagiti imbaon ti Dios! Namin-adu a kayatko nga ummongen dagiti annakmo a kas iti panangummong ti upa kadagiti piekna iti sirok dagiti payakna! Ngem saanyo a kinayat. Gapuna, mabaybay-anto ti balayyo.” (Lucas 13:34, 35) Laklaksiden ti nasion ti Anak ti Dios isu a masapul nga apitenna dagiti resultana!

Sakbay a nakadanon ni Jesus idiay Jerusalem, maysa a lider dagiti Fariseo ti nangawis kenkuana iti balayna tapno makipangan iti aldaw ti Sabbath. Sipsiputan dagiti naawis no ania ti mabalin nga aramiden ni Jesus iti maysa a lalaki nga imbal (gapu iti sobra a naurnong a pluido iti bagina, masansan nga iti gurong ken saka). Nagsaludsod ni Jesus kadagiti Fariseo ken kadagiti eksperto iti Linteg: “Maiparbeng kadi ti mangpaimbag iti Sabbath wenno saan?”Lucas 14:3.

Awan ti simmungbat. Pinaimbag ni Jesus ti lalaki sa insaludsodna kadakuada: “No matnag ti anakyo wenno ti bakayo iti bubon iti aldaw ti Sabbath, saanyo kadi nga aonen a dagus?” (Lucas 14:5) Awan manen ti simmungbat iti imbaga ni Jesus.

Ammuem ti Ad-adu Pay

Ania ti Pagarian ti Dios?

Idi adda ditoy daga, nangipakita ni Jesus iti panirpatan iti aramiden ti Pagarian.

Insuro ni Jesus ti Maipapan iti Pagarian ti Dios

Ania ti tema ti panangasaba ni Jesus? Kasanona nga impakita nga agturay buyogen ti ayat ken hustisia?