Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ni Jesus—Ti Dalan, ti Kinapudno, ti Biag

 KAPITULO 100

Ti Ilustrasionna Maipapan iti Sangapulo a Mina

Ti Ilustrasionna Maipapan iti Sangapulo a Mina

LUCAS 19:11-28

  • ILUSTRASION NI JESUS MAIPAPAN ITI SANGAPULO A MINA

Nupay mapan idiay Jerusalem ni Jesus, mabalin nga adda pay laeng iti balay ni Zakeo a kaduana dagiti adalanna. Mamatida a maipasdek “ti Pagarian ti Dios” ket ni Jesus ti Ari. (Lucas 19:11) Saanda a naawatan daytoy, a kas met idi saanda a naawatan a masapul a matay ni Jesus. Gapuna, nangted iti ilustrasion tapno maawatanda a mabayag pay nga umay ti Pagarian.

Kinunana: “Adda maysa a tao manipud iti natan-ok a pamilia a napan iti sabali a pagilian tapno makoronaan nga ari sa agsubli met laeng.” (Lucas 19:12) Mabayag ti kasta a panagdaliasat. Nalawag a ni Jesus ti “tao manipud iti natan-ok a pamilia” a mapan iti “sabali a pagilian,” idiay langit, a sadiay ited kenkuana ni Amana ti panagturay kas Ari.

Iti ilustrasion, sakbay a pumanaw ti “tao manipud iti natan-ok a pamilia,” inayabanna ti sangapulo nga adipen ket inikkanna ida iti pirak a mina, a kunkunana: “Inegosioyo dagitoy agingga nga agsubliak.” (Lucas 19:13) Napateg dagiti pirak a mina. Ti maysa a mina ket aggatad iti sueldo ti agtaltalon iti nasurok a tallo a bulan.

Mabalin a maawatan dagiti adalan a mayarigda kadagiti sangapulo nga adipen iti ilustrasion, ta inyarig ni Jesus idan kadagiti agani. (Mateo 9:35-38) Siempre, saanna idi a kinalikaguman a mangyegda iti naani a trigo. Imbes ketdi, ti naani ket buklen ti dadduma pay nga adalan a maikari iti Pagarian ti Dios. Usaren dagiti adalan ti aniaman a sanikuada tapno makasarakda iti ad-adu pay nga agtawid iti Pagarian.

Ania pay ti imbaga ni Jesus iti daytoy nga ilustrasion? Imbagana a “kinagura dagiti kailianna [ti tao manipud iti natan-ok a pamilia] ken nangibaonda iti maysa a grupo dagiti embahador a mangibaga kenkuana, ‘Dimi kayat nga agarika kadakami.’” (Lucas 19:14) Ammo dagiti adalan a saan nga awaten dagiti Judio ni Jesus—dadduma ti mayat pay a mangpapatay kenkuana. Kalpasan a natay ni Jesus ken napan idiay langit, impakita ti kaaduan a Judio ti panangmatmatda kenkuana babaen iti panangidadanesda kadagiti adalanna. Nalawag a saan a kayat dagiti bumusbusor a ni Jesus ti agbalin nga Ari.Juan 19:15, 16; Aramid 4:13-18; 5:40.

No maipapan kadagiti sangapulo nga adipen, kasano nga inusarda dagiti mina a naited kadakuada sakbay nga agsubli ti “tao manipud iti natan-ok a pamilia” kalpasan a ‘nakoronaan nga ari’? Insalaysay ni Jesus: “Idi nakoronaanen nga ari, nagsubli ket inayabanna dagiti adipen a nangtedanna iti kuarta. Kayatna a maammuan no mano ti naganansiada iti pananginegosioda iti kuartana. Immasideg ti umuna nga adipen ket kinunana, ‘Apo, ti intedmo a mina ket nakaganansia iti 10 a mina.’ Imbagana kenkuana, ‘Nasayaat ti inaramidmo, naimbagka nga adipen! Gapu ta mapagtalkanka uray iti nakabasbassit a banag, iturayam ti 10 a siudad.’ Immay met ti maikadua ket kinunana, ‘Apo, ti intedmo a mina ket nakaganansia iti 5 a mina.’ Kinunana met iti daytoy nga adipen, ‘Uray sika, iturayam ti 5 a siudad.’”Lucas 19:15-19.

No naawatan dagiti adalan a mayarigda kadagiti adipen a nangusar a naan-anay kadagiti sanikuada tapno makasarakda iti ad-adu pay nga adalan, manamnamada a maragsakan ni Jesus. Manamnamada met a gunggonaannanto ida iti kinagagetda. Siempre, saan nga agpapada ti kabibiag dagiti adalan ni Jesus wenno agpapada dagiti kasasaad wenno abilidadda. Ngem ti “nakoronaanen nga ari” a ni Jesus, bigbigennanto ken bendisionanna ti panagreggetda a mangaramid kadagiti adalan.Mateo 28:19, 20.

Ngem paliiwenyo ti panagduma iti maudi a paset ti ilustrasion ni Jesus: “Ngem immay ti sabali pay nga adipen ket kinunana, ‘Apo, daytoy ti intedmo a mina. Binungonko iti lupot ken indulinko. Mabutengak ngamin kenka gapu ta nauyongka, ken alaem ti kuarta a saanmo nga indeposito  ket aniem ti saanmo nga immula.’ Kinunana iti adipen, ‘Ti mismo nga imbagam ti pangdusaak kenka, dakes nga adipen. Ammom la ngaruden a nauyongak, ken alaek ti saanko nga indeposito ken aniek ti saanko nga immula, apay ngarud a saanmo nga indeposito ti kuartak iti banko, tapno inton agsubliak, alaek agraman ti interesna?’ Gapuna, imbilin ti ari kadagiti agtaktakder sadiay, ‘Alaenyo ti mina nga adda kenkuana ket itedyo iti addaan iti 10 a mina.’”—Lucas 19:20-24.

Gapu ta saanna a pinaadu ti sanikua ti pagarian ti apona, napukawan daytoy nga adipen. Namnamaen dagiti apostol ti panagturay ni Jesus iti Pagarian ti Dios. Gapu iti imbagana maipapan iti maudi nga adipen, mabalin a naawatanda a no saanda nga agbalin a nagaget, awanto ti lugarda iti dayta a Pagarian.

Dagiti sasao ni Jesus ti mangtignay koma kadagiti matalek nga adalan a nayonanda pay ti panagreggetda. Inngudona: “Ibagak kadakayo a ti asinoman nga addaan, ad-adunto pay ti maited kenkuana, ngem daydiay awanan, maalanto uray ti adda kenkuana.” Imbagana pay a dagiti kabusorna a di mangayat kenkuana “kas ari,” ket mapapatayda. Kalpasanna, intuloy ni Jesus ti mapan idiay Jerusalem.Lucas 19:26-28.

Ammuem ti Ad-adu Pay

TI PAGWANAWANAN —PAGADALAN NGA EDISION

Ti Maadal iti Ilustrasion Maipapan Kadagiti Talento

Ilawlawag daytoy nga artikulo ti baro a pannakailawlawag ti pangngarig maipapan kadagiti talento.