Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ni Jesus—Ti Dalan, ti Kinapudno, ti Biag

 KAPITULO 88

Panagbalbaliw ti Kasasaad ti Baknang ken ni Lazaro

Panagbalbaliw ti Kasasaad ti Baknang ken ni Lazaro

LUCAS 16:14-31

  • ILUSTRASION MAIPAPAN ITI BAKNANG KEN NI LAZARO

JNangted ni Jesus iti nagsayaat a balakad kadagiti adalanna maipapan iti panangusar iti kinabaknang. Ngem saan laeng a dagiti adalanna ti dumdumngeg. Adda met sadiay dagiti Fariseo, ket masapul nga ipapusoda koma ti balakad ni Jesus. Apay? Gapu ta “naagumda iti kuarta.” Idi nangngegda ti ibagbaga ni Jesus, “inuy-uyawda.”Lucas 15:2; 16:13, 14.

Ngem saan a nagbuteng ni Jesus. Kinunana kadakuada: “Agpammarangkayo a nalinteg iti imatang dagiti tattao ngem ammo ti Dios ti linaon dagiti pusoyo. Ta ti ibilang dagiti tattao a napateg ket awan pategna iti Dios.”Lucas 16:15.

Dagiti Fariseo ket nabayagen nga itantan-ok dagiti tattao ngem panawenen ti panagbalbaliw, panawen a mabaliktad ti kasasaad. Maipababa dagiti maitantan-ok a nabaknang iti daytoy a lubong, dagiti agtuturay, ken dagiti dakkel ti impluensiada iti relihion. Maitan-ok dagiti gagangay a tattao a makabigbig iti naespirituan a kasapulanda. Inlawlawag ni Jesus a maar-aramiden ti dakkel a panagbalbaliw idi kinunana:

“Ti Linteg ken dagiti Propeta ket naiwaragawag agingga iti tiempo ni Juan. Nanipud idi, maiwarwaragawagen ti Pagarian ti Dios kas naimbag a damag, ket ikagkagumaan ti amin a kita ti tao ti sumrek iti dayta. Uray mapukaw ti langit ken daga, matungpal latta ti amin a naisurat iti Linteg.” (Lucas 3:18; 16:16, 17) Kasano nga ipakita ti sasao ni Jesus a mapaspasamaken ti panagbalbaliw?

Ipagpannakkel dagiti Judio a lider ti relihion a tungtungpalenda ti Linteg a naited babaen ken Moises. Laglagipem nga idi pinaimbag ni Jesus ti bulsek a lalaki idiay Jerusalem, sipapannakkel nga imbaga dagiti Fariseo: “Adalannakami ni Moises. Ammomi a nagsao ti Dios ken ni Moises.” (Juan 9:13, 28, 29) Ti maysa a panggep ti Linteg a naited babaen ken Moises ket tapno maiturong dagiti napakumbaba a tattao iti Mesias, ni Jesus. Impakaammo ni Juan a Mammautisar ni Jesus kas ti Kordero ti Dios. (Juan 1:29-34) Manipud iti rugi ti ministerio ni Juan, nangngegen dagiti napakumbaba a Judio, nangruna dagiti napanglaw, ti maipapan iti “Pagarian ti Dios.” Wen, adda “naimbag a damag” para kadagiti mayat nga agpaituray iti Pagarian ti Dios ken magunggonaanda iti dayta.

Masapul a matungpal ti Linteg a naited babaen ken Moises; naiturong dayta iti Mesias. Kasta met, dandanin agpatingga ti panangtungpal iti dayta. Kas pagarigan, ipalubos idi ti Linteg ti panagdiborsio gapu iti nagduduma a rason, ngem kinuna ni Jesus nga “asinoman a lalaki a mangidiborsio iti asawana sa mangasawa iti sabali ket makabasol iti pannakikamalala. Asinoman a mangasawa iti naidiborsio a babai ket makabasol iti pannakikamalala.” (Lucas 16:18) Nakapungtot dagiti panatiko a Fariseo iti imbagana!

Kalpasanna, imbaga ni Jesus ti ilustrasion a mangipaganetget iti mapaspasamak a dakkel a  panagbalbaliw. Maipapan dayta iti dua a lallaki nga agpada a dakkel ti nagbalbaliwan ti kasasaadda. Bayat a mausig ti ilustrasion, laglagipem a karaman kadagiti dumdumngeg dagiti naagum iti kuarta a Fariseo nga itantan-ok dagiti tattao.

“Adda idi maysa a baknang,” kinuna ni Jesus, “a kanayon a nakabado iti purpura ken puraw a lupot, ket inaldaw nga agnamnam-ay iti biag. Adda met idi maysa nga agpalpalimos ken ginaddil nga agnagan iti Lazaro, a kanayon a maipan iti ruangan ti balay ti baknang. Kayatna a kanen dagiti maregregreg iti lamisaan ti baknang. Pasaray umay pay dagiti aso a mangdilpat kadagiti gaddilna.”Lucas 16:19-21.

Naagum iti kuarta dagiti Fariseo, isu nga adda kadi pay sabali nga iladladawan ti “baknang” iti ilustrasion ni Jesus? Kaykayat met dagitoy a Judio a lider ti relihion ti agbado kadagiti nangina ken nagarbo a bado. Malaksid iti kinabaknangda, adu pay dagiti pribilehio ken oportunidad a tagtagiragsakenda. Wen, ti panangiladawan kadakuada a nakabado iti nagarbo ken purpura ket mangipakita iti nagsayaat a kasasaadda, ket ti puraw a lupot ti mangipakita iti panangibilangda iti bagida a nalinteg.Daniel 5:7.

Kasano a matmatan dagitoy a baknang ken natangsit a panguluen dagiti napanglaw ken gagangay a tattao? Uy-uyawenda dagitoy nga ibilangda nga ‛am ha·’aʹrets, wenno tattao iti daga, a saan a makaammo iti Linteg wenno maikari a masursuruan iti Linteg. (Juan 7:49) Dayta ti mangipakita iti kasasaad ti ‘agpalpalimos nga agnagan  Lazaro,’ a kayatna payen a kanen “dagiti maregregreg iti lamisaan ti baknang.” Kas iti ginaddil a ni Lazaro, maipabpababa dagiti gagangay a tattao nga arigna agsakitda iti naespirituan.

Nabayagen a mapaspasamak dayta a nakalkaldaang a kasasaad, ngem ammo ni Jesus a dimtengen ti tiempo ti dakkel a panagbalbaliw ti kasasaad dagiti nabaknang ken ti tattao a maibilang a kas ken Lazaro.

PANAGBALBALIW TI KASASAAD TI BAKNANG KEN NI LAZARO

Inladawan ni Jesus daytoy dakkel a panagbalbaliw ti kasasaad. Kinunana: “Idi natay ti agpalpalimos, impan dagiti anghel iti abay ni Abraham. Natay met ti baknang ket naipumpon. Idi adda iti Tanem, timmangad ti baknang gapu ta matutuok ket nakitana ni Abraham iti adayo ken ti kaabayna a ni Lazaro.”Lucas 16:22, 23.

Ammo dagiti dumdumngeg ken Jesus a nabayagen a natay ni Abraham ken addan iti Tanem. Nalawag nga ibaga ti Kasuratan nga awan ti adda iti Tanem, wenno Sheol, a makakita wenno makasao, agraman ni Abraham. (Eclesiastes 9:5, 10) Ania ngarud ti pampanunoten dagiti lider ti relihion a kayat a sawen ni Jesus iti daytoy nga ilustrasion? Ania ti mabalin nga ipamatmatna maipapan kadagiti gagangay a tattao ken kadagiti naagum iti kuarta a lider ti relihion?

Kaibagbaga ni Jesus ti panagbalbaliw a mapasamak idi kinunana a ‘ti Linteg ken dagiti Propeta ket naiwaragawag agingga iti tiempo ni Juan a Mammautisar ngem nanipud idin, maiwarwaragawagen ti Pagarian ti Dios kas naimbag a damag.’ Gapuna, idi nangasaba ni Juan ken ni Jesu-Kristo, agpada a natay da Lazaro ken ti baknang iti dati a kasasaadda, ket naaddaanda iti baro a kasasaad iti sanguanan ti Dios.

Kinapudnona, nabayagen a maikapkapis iti naespirituan dagiti nanumo wenno napanglaw. Ngem natulonganda ken impangagda ti mensahe ti Pagarian nga impakaammo idi ni Juan a Mammautisar ken kalpasanna ni Jesus. Idi, kontentodan iti bassit a ‘maregregreg manipud iti naespirituan a lamisaan’ dagiti lider ti relihion. Ngem mapakpakandan kadagiti kinapudno iti Kasuratan, nangruna dagiti nagsayaat a bambanag nga inlawlawag ni Jesus. Kasla addadan iti nagsayaat a kasasaad iti imatang ni Apo Jehova.

Ngem saan a kasta dagiti baknang ken dagiti dakkel ti impluensiada a lider ti relihion. Saanda nga akseptaren ti mensahe ti Pagarian nga impakaammo ni Juan ken inkaskasaba ni Jesus iti intero a pagilian. (Mateo 3:1, 2; 4:17) Kinapudnona makapungtotda, wenno matutuokda, iti dayta a mensahe, a mangibagbaga iti umay nga umap-apuy a panangukom ti Dios. (Mateo 3:7-12) Mabang-aran dagiti naagum iti kuarta a lider ti relihion no saanen nga ipakaammo ni Jesus  ken dagiti adalanna ti mensahe ti Dios. Umasping dagitoy a lider iti baknang iti ilustrasion, a nagkuna: “Ama Abraham, kaasiannak koma, ken ibagam ken Lazaro nga isawsawna iti danum ti murdong ti ramayna ket umayna palamiisan ti dilak, ta matutuokak iti daytoy dumardarang nga apuy.”Lucas 16:24.

Ngem saan a napasamak dayta. Saan a nagbalbaliw ti kaaduan kadagiti lider ti relihion. Saanda a kayat ti “dumngeg ken Moises ken kadagiti Propeta,” a dagiti insuratda ti mangiturong koma kadakuada a mangawat ken Jesus kas ti inkeddeng ti Dios a Mesias ken Ari. (Lucas 16:29, 31; Galacia 3:24) Saanda a nagpakumbaba ken saanda a tinulad dagiti napanglaw a nangawat ken Jesus ken an-anamonganen ti Dios. Ngem dagiti adalan ni Jesus, saanda a mabalin nga ikompromiso wenno palag-anen ti kinapudno tapno mabang-aran laeng wenno mapagustuanda dagiti lider ti relihion. Iti ilustrasion ni Jesus, inladawanna daytoy a kasasaad iti imbaga ni “Ama Abraham” iti baknang:

“Anak, laglagipem a nagpempennekka iti agkakaimbag a banag bayat ti panagbiagmo, ngem nagrigrigat idi ni Lazaro. Maliwliwa itan ditoy, ngem sika, matutuokka dita. Maysa pay, adda dakkel a giwang iti nagbaetantayo, tapno saan a makaballasiw dagiti aggapu ditoy a mayat nga umay dita, wenno dagiti aggapu dita a mayat nga umay ditoy.”Lucas 16:25, 26.

Nainkalintegan laeng ken umiso a mapasamak ti kasta a dakkel a panagbalbaliw! Nabaliktad ti kasasaad dagiti natangsit a lider ti relihion ken dagiti napakumbaba a nangawat iti awit ni Jesus ken nabang-aran ken napakan iti naespirituan. (Mateo 11:28-30) Ad-adda pay a madlaw dayta a panagbalbaliw kalpasan ti sumagmamano a bulan, idi sinukatan ti baro a tulag ti Linteg ti tulag. (Jeremias 31:31-33; Colosas 2:14; Hebreo 8:7-13) Idi imparukpok ti Dios ti nasantuan nga espiritu idi Pentecostes 33 C.E., nalawagen a dagiti adalan ni Jesus ti inanamongan ti Dios imbes a dagiti Fariseo ken dagiti kakaduada a lider ti relihion.