Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ni Jesus—Ti Dalan, ti Kinapudno, ti Biag

 KAPITULO 134

Awan Nagyan ti Tanem ta Nagungaren ni Jesus!

Awan Nagyan ti Tanem ta Nagungaren ni Jesus!

MATEO 28:3-15 MARCOS 16:5-8 LUCAS 24:4-12 JUAN 20:2-18

  • NAGUNGAR NI JESUS

  • DAGITI PASAMAK ITI TANEM NI JESUS

  • NAGPARANG ITI NAGDUDUMA A BABBAI

Nakigtot dagiti babbai a nakakita nga awan nagyan ti tanem! Napan a dagus ni Maria Magdalena ken “Simon Pedro ken iti sabali pay nga adalan, a patpatgen ni Jesus”—ni apostol Juan. (Juan 20:2) Nupay kasta, nakakita iti anghel ti dadduma a babbai nga adda idi iti tanem. Ket iti uneg ti pakalaglagipan a tanem, adda pay sabali nga anghel a “nakabado iti puraw.”—Marcos 16:5.

Imbaga ti maysa nga anghel kadakuada: “Dikay agbuteng, ta ammok a sapsapulenyo ni Jesus a nailansa iti kayo. Awan ditoyen, napagungaren kas iti imbagana. Umayyo kitaen ti nakaikabilanna. Kalpasanna, darasenyo, ibagayo kadagiti adalanna a napagungaren. Mapmapanen idiay Galilea.” (Mateo 28:5-7) Gapuna, “agpigpigerger ken napalalo ti siddaawda.” Nagtaray dagiti babbai a napan nangipadamag kadagiti adalan.—Marcos 16:8.

Iti dayta a tiempo, nakitan ni Maria da Pedro ken Juan. Umanangsab nga impadamagna: “Adda nangala iti Apo iti nakaitanemanna, ket saanmi nga ammo ti nangikabilanda.” (Juan 20:2) Nagtaray da Pedro ken Juan. Naparpartak ni Juan isu nga immuna a nakadanon iti tanem. Simmirip ket nakitana dagiti bedbed, ngem nagtalinaed iti ruar.

Idi simmangpet ni Pedro, simrek iti tanem. Nakitana dagiti lupot a lienso ken ti lupot a nangbungon iti ulo ni Jesus. Simrek met laeng ni Juan, ket namati iti imbaga ni Maria. Saanda a napanunot a nagungaren ni Jesus nupay imbagana idin. (Mateo 16:21) Gapu ta mariribukanda, nagawiddan. Ngem ni Maria, a nagsubli iti tanem, ket nabati sadiay.

Kabayatanna, nagtaray ti dadduma a babbai a mapan mangibaga kadagiti adalan a nagungaren ni Jesus. Ngem bayat nga agtartarayda, nasabatda  ni Jesus ket kinunana: “Naimbag nga aldawyo!” Nagrukobda ket “nagruknoyda kenkuana.” Kinuna ni Jesus: “Dikay agbuteng! Inkay ipadamag daytoy kadagiti kakabsatko tapno mapanda idiay Galilea, ket makitadakto sadiay.”—Mateo 28:9, 10.

Sakbay dayta, idi nagginggined ken nagparang dagiti anghel, “nagpigerger dagiti guardia [nga adda iti tanem] gapu iti butengda kenkuana nga uray la dida nakagunay.” Idi nakagunaydan, napanda iti siudad ket “impadamagda kadagiti panguluen a papadi ti amin a napasamak.” Nakisarita dagiti papadi kadagiti panglakayen dagiti Judio. Inkeddengda a pasuksokanda dagiti soldado tapno saanda nga ibaga kadagiti tattao. Kinunada: “Immay dagiti adalanna iti rabii ket tinakawda ti bangkayna bayat a matmaturogkami.”—Mateo 28:4, 11, 13.

Mabalin a mapapatay dagiti soldado a Romano no makaturogda iti panagguardiada, isu nga inkari dagiti papadi: “No maammuan daytoy [ti panagulbodda maipapan iti pannaturogda] ti gobernador, saankay nga agdanag ta dakaminton ti makisarita kenkuana.” (Mateo 28:14) Inawat dagiti soldado ti pasuksok ket inaramidda ti imbilin dagiti papadi. Iti kasta, nagwaras kadagiti Judio ti damag a natakaw ti bangkay ni Jesus.

Agladladingit pay laeng ni Maria Magdalena idiay tanem. Idi mapanna kitaen ti tanem, nakitana ti dua nga anghel a nakabado iti puraw! Nakatugaw ti maysa iti uluanan idi ti bangkay ni Jesus ket adda iti sakaanan ti maysa. Dinamagda: “Apay nga agsangsangitka?” Insungbat ni Maria: “Innalada ti Apok, ket diak ammo ti nangikabilanda.” Kalpasan a naibagana dagitoy, timmaliaw ket adda nakitana a nakatakder. Inulitna ti imbaga ti anghel ken kinunana: “Apay nga agsangsangitka? Asino ti sapsapulem?” Gapu ta impagarup ni Maria nga isu ti hardinero, kinunana: “Apo, no innalam ti bangkayna, ibagam ti nangikabilam, ta innak alaen.”—Juan 20:13-15.

Iti kinapudnona, kasarsarita ni Maria ti nagungaren a ni Jesus, ngem saan idi a nabigbig ni Maria. Nupay kasta, idi kinunana, “Maria!” nabigbig ni Maria a ni Jesus dayta, ta ammo ni Maria ti wagas ti pannakisasaona. “Rabboni!” (kayatna a sawen, “Mannursuro!”), siraragsak a kinuna ni Maria. Ngem gapu ta pampanunotenna a dandanin mapan idiay langit, iniggamanna ni Jesus. Gapuna, kinuna ni Jesus: “Ibbatannak, ta diak pay immuli iti Ama. Ngem inka ibaga kadagiti kakabsatko, ‘Umuliak ken Amak ken Amayo ken iti Diosko ken Diosyo.’”—Juan 20:16, 17.

Nagtaray ni Maria a napan iti naguummongan dagiti apostol ken ti dadduma nga adalan. Imbagana kadakuada: “Nakitak ti Apo!” ket imbagana ti nangngegda iti dadduma a babbai. (Juan 20:18) Ngem “impagarup dagiti apostol nga agar-aramidda laeng iti estoria, isu a saanda a pinati.”—Lucas 24:11.

Ammuem ti Ad-adu Pay

Napagungar ni Jesus!

Kasano a naammuan dagiti adalan ni Jesus nga isu ket pinagungar ti Dios?