Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ni Jesus—Ti Dalan, ti Kinapudno, ti Biag

 KAPITULO 102

Simrek ti Ari iti Jerusalem a Nakasakay iti Urbon nga Asno

Simrek ti Ari iti Jerusalem a Nakasakay iti Urbon nga Asno

MATEO 21:1-11, 14-17 MARCOS 11:1-11 LUCAS 19:29-44 JUAN 12:12-19

  • NAGRAGRAGSAKDA IDI SIMREK NI JESUS ITI JERUSALEM

  • NAIPADTO TI PANNAKADADAEL TI JERUSALEM

Iti sumaganad nga aldaw, Domingo, Nisan 9, pimmanaw ni Jesus idiay Betania a kaduana dagiti adalanna ket napanda idiay Jerusalem. Idi asidegdan idiay Betfage, iti Bantay Dagiti Olibo, imbaga ni Jesus iti dua nga adalanna:

“Mapankayo iti masungad a purok, ket makakitakayto iti naigalut nga asno nga adda urbonna. Warwaranyo dagita ken iyegyo kaniak. No adda agsaludsod kadakayo, ibagayo, ‘Kasapulan dagitoy ti Apo.’ Iti kasta, dagus nga itednanto dagita.”Mateo 21:2, 3.

Saan a napanunot dagiti adalan a mainaig ti bilin ni Jesus iti padto ti Biblia. Ngem idi agangay, naawatanda ti kaitungpalan ti padto ni Zacarias. Impadtona a ti inkari ti Dios nga Ari ket umayto iti Jerusalem a “napakumbaba ken nakasakay iti asno, iti kalakian nga urbon ti asno.”Zacarias 9:9.

Idi nakagteng dagiti adalan idiay Betfage ket alaendan ti kalakian nga urbon nga asno ken ti inana, dinamag dagiti tattao nga agtaktakder sadiay: “Apay a warwarwaranyo ti urbon nga asno?” (Marcos 11:5) Ngem idi nangngegda a para iti Apo dayta, impalubosda nga alaen dagiti adalan tapno ipanda ken Jesus. Inyaplag dagiti adalan ti makinruar a badoda iti asno ken iti urbonna, ngem nagsakay ni Jesus iti urbon nga asno.

Immadu dagiti tattao bayat nga agturong ni Jesus idiay Jerusalem. Adu ti nangyaplag kadagiti kawesda iti kalsada. Dadduma ti nangtukkol kadagiti sanga ti kayo wenno “bulbulong iti igid ti dalan” ket inyaplagda. Ipukpukkawda: “Pangngaasim, isalakanmo! Mabendisionan koma daydiay umay iti nagan ni Jehova! Bendisionan koma ti Dios ti um-umay a Pagarian ni amatayo a David!” (Marcos 11:8-10) Narurod dagiti Fariseo kadagiti ibagbaga dagiti tattao. Kinunada ken Jesus: “Mannursuro, ibagam kadagiti adalam nga agulimekda.” Insungbat ni Jesus: “No agulimekda, agpukkaw dagiti bato.”Lucas 19:39, 40.

Bayat a kitkitaen ni Jesus ti Jerusalem, nagsangit ket kinunana: “No naawatam la koma ita nga aldaw no ania ti mangyeg iti talna—ngem saanmon a makita dayta.” Madusanto ti Jerusalem gapu iti inggagara a panagsukirna. Impadto ni Jesus: “Dumtengto dagiti aldaw nga aladan dagiti kabusormo ti aglawlawmo babaen kadagiti dadakkel ken natirad a kayo ket aggapudanto iti amin a direksion a mangraut kenka. Dadaelendakanto a mamimpinsan, sika ken dagiti annakmo, ket awanto ti nagtinnuon a bato a mabati kenka.” (Lucas 19:42-44) Kas iti imbaga ni Jesus, nadadael ti Jerusalem idi tawen 70 C.E.

Idi simrek ni Jesus iti Jerusalem, “nagaariwawa dagiti tattao iti siudad ket kinunada: ‘Asino daytoy?’” Imbaga dagiti tattao: “Daytoy ni Jesus a propeta, a taga-Nazaret idiay Galilea!” (Mateo 21:10, 11) Dagiti nakakita ken Jesus idi pinagungarna ni Lazaro impadamagda dayta a milagro. Nagsakit ti rikna dagiti Fariseo ta awanen ti maaramidanda. Kinunada iti maysa ken maysa: “Simmuroten kenkuana ti intero a lubong!”Juan 12:18, 19.

No mapan ni Jesus idiay Jerusalem, mangisuro idiay templo kas iti ar-aramidenna. Pinaimbagna sadiay dagiti pilay ken bulsek. Nakapungtot dagiti panguluen a papadi ken dagiti eskriba no makitada dagita ken mangngegda nga ipukpukkaw dagiti ubbing a lallaki iti templo, “Maisalakan koma ti Anak ni David!” Imbaga dagiti lider ti relihion ken Jesus: “Mangmangngegmo kadi ti ibagbagada?” Insungbatna: “Wen. Saanyo kadi a nabasa daytoy, ‘Insurom dagiti ubbing ken maladaga a mangidaydayaw kenka’?”Mateo 21:15, 16.

Inwaras ni Jesus ti panagkitana iti templo. Rumabii idin, isu a pimmanaw a kadua dagiti apostol. Sakbay ti Nisan 10, nagsubli idiay Betania, ket imyan sadiay iti rabii ti Domingo.