Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Ni Jesus—Ti Dalan, ti Kinapudno, ti Biag

 KAPITULO 135

Nagparang iti Adu ti Napagungar a ni Jesus

Nagparang iti Adu ti Napagungar a ni Jesus

LUCAS 24:13-49 JUAN 20:19-29

  • NAGPARANG NI JESUS ITI DALAN A MAPAN IDIAY EMMAUS

  • MAULIT-ULIT NGA INLAWLAWAGNA TI KASURATAN KADAGITI ADALANNA

  • SAANEN A NAGDUADUA NI TOMAS

Iti Domingo, Nisan 16, malmaldaang dagiti adalan. Saanda a naawatan no apay nga awan nagyan ti tanem. (Mateo 28:9, 10; Lucas 24:11) Kamalmanna, pimmanaw da Cleopas ken ti sabali pay nga adalan iti Jerusalem a mapan idiay Emmaus, a 11 kilometro ti kaadayona.

Bayat a magmagnada, pagsarsaritaanda ti napasamak. Idi kuan, adda estranghero a nakikuyog kadakuada. Dinamagna: “Ania ti pagsarsaritaanyo bayat a magmagnakayo?” Kinuna ni Cleopas: “Saanka kadi a taga-Jerusalem ta dimo man la ammo dagiti mapaspasamak ita sadiay?” Insaludsod ti estranghero: “Ania a paspasamak?”—Lucas 24:17-19.

Kinunada: “Maipapan ken Jesus a Nazareno. . . . Namnamaenmi idi nga isu daydiay mangisalakan iti Israel.”—Lucas 24:19-21.

Insalaysay ni Cleopas ken ti kaduana dagiti napasamak iti dayta nga aldaw. Imbagada a napan ti dadduma a babbai iti nakaitaneman ni Jesus ngem nakitada nga awan nagyan ti tanem ken adda nakitada a nakaskasdaaw a pasamak—nagparang dagiti anghel a nangibaga a nagungaren ni Jesus. Imbagada a napan met ti dadduma iti tanem ket “napaneknekanda nga agpayso ti imbaga dagiti babbai.”—Lucas 24:24.

Nalawag a saan a naawatan ti dua nga adalan ti kaipapanan ti napasamak. Addaan iti autoridad a simmungbat ti estranghero tapno korehirenna ti panagpampanunotda a mangrirriro kadakuada: “Nagkapuy ketdin ti pannakaawatyo! Apay a diyo patien ti amin nga imbaga dagiti propeta? Saan kadi a nasken a sagabaen ti Kristo dagitoy a banag tapno maipadayag?” (Lucas 24:25, 26) Inlawlawagna kadakuada ti adu a salaysay iti Kasuratan maipapan iti Kristo.

Nakadanon met laengen ti tallo iti Emmaus. Kayat ti dua nga adalan nga ad-adu pay ti maammuanda, isu a kinunada iti estranghero: “Makidaguska pay la kadakami ta sumipngeten.” Simmurot kadakuada, ket nanganda. Kalpasan a nagkararag ti estranghero, pinispisina ti tinapay, sa intedna kadakuada. Iti kasta, nailasinda, ngem nagpukaw iti imatangda. (Lucas 24:29-31) Gapuna, ammodan a nagungaren ni Jesus!

Maragsakan ti dua nga apostol a nangipadamag iti kapadasanda. Kinunada: “Isu met la gayam a natukay ti pusota idi makisarsarita kadata iti dalan, bayat nga inlawlawagna a naimbag kadata dagiti Kasuratan!” (Lucas 24:32) Nagdardarasda a nagsubli idiay Jerusalem, ket nasangpetanda a naguurnong dagiti apostol ken ti dadduma a kakaduada. Sakbay a makaipadamag da Cleopas ken ti kaduana, kinuna ti dadduma: “Talaga a napagungaren ti Apo ket nagpakita ken Simon!” (Lucas 24:34) Kalpasanna, imbaga ti dua nga adalan a nagparang met ni Jesus kadakuada. Wen, nagpakita met kadakuada.

Nakigtot ti amin ta nagparang ni Jesus iti kuarto! Kasla di nakappapati daytoy gapu ta nakarikep a naimbag ti amin a ridaw gapu ta mabutengda kadagiti Judio. Ngem adda ni Jesus iti tengngada. Siaalumamay a kinunana: “Adda koma kadakayo ti talna.” Ngem nagbutengda. Kas iti naminsan, “impagarupda a nakakitada iti maysa nga espiritu.”—Lucas 24:36, 37; Mateo 14:25-27.

Tapno maipakitana nga isu ket saan nga espiritu wenno imahinasion laeng no di ket pudno a tao, impakita ni Jesus dagiti ima ken sakana ket kinunana: “Apay a mabutengkayo, ken apay nga agduaduakayo? Kitaenyo dagiti ima ken sakak, siak daytoy; sagidendak ket kitaenyo, ta awan ti lasag ken tulang ti maysa nga espiritu idinto ta adda kaniak kas iti makitayo.” (Lucas 24:36-39) Naragsakanda ken nasdaawda ngem kasla saanda pay la a mamati.

Tapno ad-adda a mamatida nga isu ti kasasaoda, dinamagna: “Adda kadi makanyo ditoy?” Inikkanda iti tinuno nga ikan ket kinnanna. Kalpasanna,  kinunana: “Dagitoy ti ibagbagak kadakayo idi agkakaduatayo pay laeng, a masapul a matungpal ti amin a naisurat maipapan kaniak iti Linteg ni Moises ken kadagiti Propeta ken kadagiti Salmo.”—Lucas 24:41-44.

Iti kasta, tinulongan ni Jesus ni Cleopas ken ti kaduana tapno maawatanda ti Kasuratan, ket kasta ti inaramidna iti amin a nagtataripnong sadiay: “Kastoy ti naisurat: a masapul nga agsagaba ti Kristo ken mapagungar iti maikatlo nga aldaw, ket maigapu iti naganna, ti panagbabawi a maipaay iti pannakapakawan dagiti basol ket maikaskasabanto iti amin a nasion—mangrugi iti Jerusalem. Dakayo ti saksi kadagitoy a banag.”—Lucas 24:46-48.

Awan idi ni Tomas, ket iti sumaganad nga al-aldaw, siraragsak nga impadamagda kenkuana: “Nakitami ti Apo!” Ngem kinuna ni Tomas: “Saanak a mamati no saanko a makita ken maarikap dagiti nalansaan nga imana ken no diak maiggaman ti bakrangna.”—Juan 20:25.

Walo nga aldaw kalpasanna, naguummong manen dagiti adalan a kaduadan ni Tomas. Nupay nakakandado dagiti ridaw, nagparang ni Jesus iti tengngada ket kinunana: “Adda koma kadakayo ti talna.” Kalpasanna, kinunana ken Tomas: “Kitaem ken iggamam dagiti imak ken ti bakrangko tapno isardengmon ti agduadua ket mamatikan.” Kinuna ni Tomas: “Apok, Diosko!” (Juan 20:26-28) Wen, saanen nga agduadua ni Tomas a nagungaren ni Jesus kas maysa a mannakabalin nga espiritu a parsua a pannakabagi ni Apo Jehova.

Kinuna ni Jesus: “Mamatika kadin gapu ta nakitanak? Naragsak dagidiay mamati nupay saandak a nakita.”—Juan 20:29.

Ammuem ti Ad-adu Pay

Ti Panagungar ni Jesus—Talaga Kadi a Napasamak?

Yantangay ti panagungar ni Jesus ket kangrunaan a pannursuro ti Biblia, napateg a maammuantayo no talaga a napasamak dayta.